Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–
Auteursrechtelijk beschermd1[3:14]WIe volcken inden dal der scheydinghe. want bi is die dach sheren in den dal der scheidinghe. | |
2[3:15]Son ende maen sijn verdonckert: ende die sterren hebben horen schijn tot hem ghetoghen. | |
3[3:16]Ende die heer sal roepen van syon: ende van iherusalem sal hi gheuen sijn stemme Ende hemel ende aerde sullen beroert worden: ende die here is hoop sijns volcs ende starcheit der sonen israhel. | |
4[3:17]Ende ghi sult weten want ic bin die heer v god wonende in syon in mijnen heylighen berch. Ende iherusalem sal heylich sijn ende die vreemden en sullen voertmeer daer niet doergaen. | |
5[3:18]Ende het sal sijn. in dien daghe sullen die berghen wtstortten soeticheyt: ende die houelen sullen vloeyen mit melc. Ende die wateren sullen gaen doer alle riuieren iuda. ende een fonteyn sal wtgaen vanden huyse sheren: ende sal vucht maken die beeck der doernen. | |
6[3:19]Egipten sal sijn in mistroest: ende ydumea in een woestijn der verderffenisse: daer om dat si quaet gedaen hebben teghen die sonen iudea. ende hebben wtghestort onnosel bloet in horen lande. | |
7[3:20]Ende iudea sal int ewich bewoent worden: ende iherusalem van gheslachten tot gheslachten. | |
8[3:21]Ende ic sal reyn maken hoer bloet dat ic niet gereinicht en had: ende die heer sal wonen in syon. |
|