Bible in duytsche (Delftse bijbel 1477)

§ Ca .I.

1

DAt woert des heren dat ghesproken is tot iohel fatuels soen.

2

Hoert gi ouden dese dinghen: ende alle die inder aerden woent: verneemt dese dinghen mit uwen oren. Of dit geschiet is in uwen daghen of inden daghen uwer vaderen

3

Van dien vertelt uwen sonen. ende v sonen horen sonen: ende hoer sonen den anderen gheslachte.

4

Dat ouergebleuen is der rupen heeft ghegheten die hippelcoren ende dat hem ouerbleuen is heeft ghegheten brucus. ende dat brucus ouerbleuen is heeft ghegheten die droghende wint.

5

Wort ontwaect ghi droncken menschen: screyt ende huylt alle die drinct den wijn in soeticheit: want hij is vergaen van uwen monde

6

want een sterc ende ontellic volc: sal opclimmen op mijn lant. Sijn tanden sullen sijn als tanden des leeuwen: ende sijn kyesen als eens iongen leeuwes.

7

Hi heeft geset mijnen wijngaert tot een woestenye: ende heeft ghescelt mijnen vijchboem Ende heeftse bloet ghemaect ende beroeft ende verworpen: ende sijn twighen sijn wit gheworden.

8

Screit als een maecht ghegort mit enen sac: op den man hore ioncheit.

9

Sacrifici ende offerhande is vergaen van den huse des heren: die priesteren ende dienre des heren hebben

[p. *538]

ghescreyt.

10

Tconincrijc is woest ghemaect. die aerde heeft gescreyt: want die tarwe verdorven is. Die wijn is verstoert: die olie is gebreclic geworden

11

Die ackermannen sijn bescaemt. die wijnbouwers hebben ghehuylt op den tarwe wijn ende garst. want die bouwe des ackers is vergaen.

12

Die wijngaert is verstoert: ende die vijchboem is cranc geworden. Die appel van garnaet. die palmboem ende die appel: ende alle bomen des ackers sijn dor gheworden: want die blijscap verstoert is vanden sonen der menschen.

13

Ghi priesteren gord v ende screyt. huilt gi dieners des outaers Ghi dieners mijns gods gaet in. ende rust in enen sac: want sacrifici ende offerhande is te niet ghegaen vanden huyse uwes gods

14

Heilich maect die vasten. roept die vergaderinge. vergadert die ouden al die woenrers der aerden in thuys uwes gods: ende roept totten heer.

15

A. a. a. den daghe: want die dach des heren is bi: ende sal comen als verderfnissen vanden machtigen

16

En sijn die voetsele niet vergaen voer uwen oghen blijscap ende vrolicheit vanden huyse uwes gods?

17

Die beesten sijn verrot in horen drec. Die scueren sijn verdoruen. ende die apoteken sijn verstroyt: want die tarwe is verstoert.

18

Waer om heeft versucht dat grote dier: ende waer om hebben die cleyn beesten ghebelct? Want hem gheen weye en is . Mer oec die scaren der beesten sijn vergaen.

19

Heer ic sal tot di roepen want tvier heeft gheghete die schoenheden des woestenijs: ende die vlamme heeft ontsteken alle die bomen des lands

20

Mer oec die beesten des ackers hebben op ghesien tot di als droghe aerde die reghen begheert. Want die fonteynen der wateren sijn verdroecht: ende tvier heeft verslonden die schoenheden des woestenijs