Bible in duytsche (Delftse bijbel 1477)

§ Ca .xiij

1

DOe effraym sprac viel die vrese op israhel ende heeft ghesondicht in baal: ende is gestoruen

2

Ende uv hebben si toe ghedaen te sondighen: ende si hebben hem ghemaect een ghegoten beeld van horen siluer: als na ghelikenissen der afgoden. Het is altemael making der wercluden. Desen segghen si. Ghi menschen offert aenbedende calueren.

3

Daer om sullen si sijn als een wolc des morgens: ende als douwe des morghens voer bi gaende. Als stof ghenomen vanden winde wter aerden: ende als roec vanden scoersteen.

4

Mer ic bin die heer. dijn god vten lande van egipten. ende sonder mi en suldi ghenen god bekennen: ende gheen gesontmaker en is dan ic.

5

Ic heb die bekent inder woestenyen: in den lande der enicheit

6

Bi hoer weyen sijn si veruult ende versadet. Ende si hebben verheft hoer herten: ende hebben mijns vergheten.

7

Ende ic sal hem wesen als een leeuwyn: ende als een pardus inden wech van assyrien.

8

Ic sal hem te moet loepen als een beere die hoer ionghen ghenomen sijn: ende sal scoren die binnenste hoerre leueren. Ende ic salse daer verderuen als een leeuwe: die beest des ackers salse snyen

9

Dijn verderfnisse israhel is vandi: dijn hulp is alleen in mi

10

Waer is dijn coninc? Nu soude hi alre meest di behouden in alle dijnen steden. Ende dijn rechters daer du of spraecste: gheeft mi enen coninc ende princen.

11

Ic sal di gheuen enen coninc in mijnre gramscap: ende weder ofnemen in mijnre onwaerdicheit.

12

Die boesheit effrayms ist samen ghebonden: sijn sonde is verholen

13

Die droefnisse eenre vrouwen die voertbrengt. sullen op hem comen. Hi en is gheen wijs soen: want nv en sal hi niet staen in die verderffenisse der sonen.

14

Ic salse verlossen van die hant des dodes: vander doot sal icse verlossen. O doot ic sal dijn doot wesen: o helle ic sal dijn beet sijn Troestinghe is verhuydt van mijnen oghen

15

want hi sal delen onder die broederen Die heer sal toeleiden enen barnenden wint opclimmende van der woestinen ende sal droghen sijn aderen. Ende sal verderuen sijn fonteyn: ende hi sal ofnemen den scat alre begeerliker vaten