Bible in duytsche (Delftse bijbel 1477)

§ Capit .xij.

1

EFfraym voedt den wint: ende volcht die heetste. Hi vermenichuoudicht alden dach loghentael ende verderfnisse.

2

Ende hi heeft ghemaect een vrede mit assyrien: ende droech olie in egipten Hier om ist oerdel des heren mit iuda: ende sijn vandinghe op iacop. Hi sal hem weder gheuen nae sijnen weghen ende na sijnen versieringen.

3

In den buyc heeft hi sijnen brueder onder die voet ghetreden: ende in sijnre starcheit is hij ghestuert mit den enghel wrastelende.

4

Ende hi vermocht bouen den engel ende hi is ghestarct. Hi heeft ghescreyt ende heeft hem ghebeden. In bethel heeft hi hem gheuonden: ende daer heeft hi mit ons ghesproken.

5

Ende die heer god der scaren heer. sal sijn ghedachtenisse sijn.

6

Ende du sultste worden bekeert totten heer dijnen god. Bewaert barmherticheit ende recht ende hoept altoes in dijnen god.

7

Chanaan. in sijnre hant is valsch ghewicht: hi heeft ghemint onrecht.

8

Ende effraym heeft gheseit.

[p. *536]

Nochtan bin ic rijk gheworden: ic heb mi gheuonden een afgod. Alle mijn arbeiden: en sullen niet vinden die boesheit die ic ghesondicht heb.

9

Ende ic bin die heer dijn god vten lande van egipten. Ic sal di noch doen sitten inden tabernaculen: als inden dagen des hoechtijts.

10

Ende ic heb ghesproken op die propheten. ende ic heb vermenichuoudicht die prophecie: ende in die hant der propheten bin ic ghelijkt.

11

Want in galgal was een afgod: nochtant te vergheefs waren si offerende den caluen in galgal. Want oec hoer outaren waren als hopen. op die voeren des ackers

12

Iacob is gheuloghen int lant van syrien. ende heeft ghedient om een wijf.

13

Die heer heeft israhel wtgheleit van egipten in den propheet: ende inden propheet is israhel behouden.

14

Effraym heeft mi verwect tot toernicheit in sijnen bitterheden ende sijn bluet sal comen op hem. ende sijn here sal hem wedersetten sijn lachter