Bible in duytsche (Delftse bijbel 1477)

§ Ca .xi.

1

ALs die morgenstont voerbi gaet soe doergaet die coninc israhel: want israhel een kint is ende ic heb hem ghemint. Ende wt egipten heb ic mijnen soen gheroepen.

2

Si riepense ende alsoe ghinghen si van horen aensichte. Sij offerden baalim: ende gauen sacrificie den afgoden.

3

Ende ic als een voeder effraym. Ic droechse in mijnen armen: ende si en hebben niet gheweten dat icse gesont maecte.

4

Inden banden adam sal icse trecken: inden banden der mynnen Ende ic sal hem sijn als opborende dat iuck op hoer wanghen. Ende ic heb mij gheneycht tot hem om dat hi eten soude.

5

Hi en sal niet weder keren in egipten ende assur sal sijn coninc wesen: want si niet en wouden bekeert worden

6

Dat zwaert heeft begonnen in horen steden: ende sal verteren sijn wtuercoren. ende sal eten hoer hoefden.

7

Ende mijn volc sal hangen twiuelachtich tot mijn weder coemst. Mer een iuck sal hem te samen opgheleit worden: dat niet ofghehaelt sal worden:

8

Hoe sal ic di effraym gheuen inden handen dijnre vianden dattu verdient hebtste. Ic sal dij bescermen israhel dattu niet verdient en hebste. Hoe sal ic di geuen? Ic sal di setten als adama: ende seboim. Mijn hert is in mi te samen bekeert: mijn berou is verstoert.

9

Ic en sal niet doen die gramscap mijns torens. Ic en sal niet worden bekeert dat ic verderuen sal israhel. want ic god bin ende gheen mensch Int middel van di is die heilige di heilich makende : ende ic sal niet ingaen in die stede.

10

Si sullen wanderen nae den here. Als een leeuwe sal hi briesschen. want hi sal briesschen. ende die sonen des sees sullen ontfruchten.

11

Ende sullen ofulyegen als een voghel wt egipten: ende als een duue van den lande van assyrien Ende die heer seit ic salse setten in horen husen

12

Effraym heeft mi onbeuangen in versakinghe. ende thuys israhel in bedriechnisse. Mer iudas is neder geclommen tuuch mit god: ende mit den heylighen ghelouighen.