Bible in duytsche (Delftse bijbel 1477)

§ Ca .x.

1

EEn wijnstoc mit veel twigen is israhel: ende die vrucht is hem gelijct. Na veelheit sijnre vrucht heeft hi ghemaect veel outaren: nae vruchtbaerheit sijns lands heeft hi oueruloedich gheweest in afgoden.

2

Hoer hert is ghedeelt uv sullen si sterven. Hi sal breken hoer afgoden: ende sal verderuen hoer outaren.

3

Want nv sullen sij seggen.. Ons en is gheen coninc. Want wi en vresen god niet. Ende wat sal ons die coninc doen?

4

Spreect woerden des onnutten visioens: ende ghi sult vrede maken: ende hi sal voertbrenghen oerdeel als bitterheit op die voren des ackers.

5

Die woenrers van samarien hebben geeert die coeyen bethauen. Want sijn volc heeft ghescreyt op hem: ende die bewaerers hebben verblijt op hem in sijnre glorien: want hi is ghegaenvan hem

6

Want hi is gedraghen in assyrien tot enen gifte den coninc vltori. Dat is een wraker. Bescameniffe sal effraym vangen ende israhel sal worden bescaemt in sinen wille.

7

Samaria heeft sijnen coninc doen gaen: als scuym opt opperste des waters.

8

Ende die hoecheden des afgods sullen worden verderuet. die sonde waren israhel. Clit ende dijstel sullen opclimmen. op hoer outaren. Ende sie sullen segghen den berghen bedect. ons ende den hoeuelen valt op ons.

9

Wt den daghen gabaa heeft israhel gesondicht. Daer hebben si ghestaen. Die strijt en salse niet beuangen in gabaa: mer op die sonen der boesheit.

10

Na mijnre begeerten sal icse castien. Die volken sullen vergaderen op hem als si gecastijt sullen worden om twee hoer boesheden.

11

Ephraym is alseen veerse gheleert te minnen die dorscherie: ende ic heb gegaen op die scoenheit haers hals. Ic sal opclimmen op effraym Iudas sal eren. ende iacob sal hem breken die voeren.

12

Saeyt v in rechtuaerdicheit: ende maeyt in den mont der barmherticheit. verniewet v acker die ghesaeyt is. Mer het is tijt den heer te soeken: als hi ghecomen is die v leren sal rechtuaerdicheit.

13

Ghi hebt gheeert onghenade. ende ghemaeyt boesheit: ende hebt ghegheten saet des loegens. Want du betrout hebste in dijnen wegen: ende in veelheit dijnre starcken.

14

Een gherucht sal opstaen in dijn volc: ende alle dijn bescermenisse sullen verderft worden. als verderft is salmana. vanden ghesin des gheens die baal oerdelde: in den dach des strijts doe

[p. *535]

die moeder ghequetst was op die kinderen.

15

Also heeft v ghedaen betel: van den aenschijn uwer boesdheden