Bible in duytsche (Delftse bijbel 1477)

§ Ca .ix.

1

WIlt niet verbliden israhel. noch vrolicheit tonen als die heydenen: wanttu ouerspeel ghedaen hebtste van dijnen god. Du hebtste gemint loen bouen alle hoefsteden des tarwes.

2

Hofstede ende wijnpars salse niet voeden: ende die wijn sal hem liegen

3

Si en sullen niet wonen int lant des heren. Ephraym is weder gekeert in egipten: ende heeft onreyn dinc ghegheten onder die van assyrien.

4

Si en sullen den heer niet offeren wijn: ende sullen hem niet behaghen. Hoer offerhande sullen sijn: als broet der gheenre die screyen Alle diet eten. sullen besmit worden: want hoer broet hoers leuens. sal niet ingaen int huys des heren.

5

Wat suldi doen inden vierdach: inden dach der hoechtijt des heren?

6

Want siet si sijn ghereist vander verderffenisse. Egipten salse vergaderen: ende memphis salse begrauen. Hoer begheerlike siluer sal die netele te erue nemen: ende die clit in horen tabernaculen

7

Die daghen hoerre castiinge sijn ghecomen: die daghen des wedergeuens sijn ghecomen. Weet dat Israhel sot is ende propheet: rasende een man aen ghegrepen vanden bosen gheest. Om veelheit uwer boesheit: sal wesen veelheit der raserien.

8

Een bescouwer ephraym is mit mijnen god een propheet: een stric des vals is ghemaect op alle sijn weghen. Raserie is den huse sijns gods.

9

Diep hebben si ghesondilht: als inden daghen gabaa. Hi sal gedencken hoerre boesheit: ende sal visiteren hoer sonden.

10

Als een wijnbey heb ik gheuonden israhel inder woestenyen: als eerste vruchten des vijchboems in sijn hoechste. heb ic ghesien hoer vaderen. Mer si sijn ingegaen tot beelphegor: ende sijn vervreemt in bescamenisse. ende sijn gheworden versmadelijc als die dinghen die si lief ghehadt hebben.

11

Effraym is wech gheuloghen als een voghel. Hoer glorie is vander gheboerte: ende vanden buyck ende vander ontfanghenisse.

12

Ende ist dat si voeden hoer sonen: ic salse maken sonder kinderen onder den menschen. Mer oec wee hem als ic sal gaen van hem.

13

Ephraym als

[p. *534]

ic ghesien heb: was als tirus gesticht in schoenheden. Ende effraym sal wtleiden sijn sonen tot tot die dootslagers

14

Gheeft hem heer. Wat sultstu hem gheuen? Gheeft hem een vroulicheit sonder kinderen: ende droech borsten.

15

Al hoer scalcheden in galgala: want daer heb icse gehaet Om die boesheit hoerre versieringhe: sal icse wtwerpen van mijnen huse. Ic en salse niet meer lief hebben Al hoer princen sijn wechgaende.

16

Effraym is geslaghen: ende hoer wortel is verdroecht Si en sullen geen vrucht maken. Ende ist dat si voertbrenghen: ic sal die liefste hoers buycs doden.

17

Die heer mijn god salse wech werpen: want si hem niet ghehoert en hebben: ende sullen verstroeyt sijn onder den heyden.