Bible in duytsche (Delftse bijbel 1477)

§ Ca .viij

1

IN dijnre kelen sal sijn een basuyn. als een aern op den huys des heren: daer om want si ouergetreden hebben mijn voerwaerd: ende sijn ouerghetreden mijn wet.

2

Si sullen mi aenropen mijn god: wi volc van israhel hebben di bekent.

3

Israhel heeft van hem geworpen guet dat is den dienst gods: die viant sal hem veruolgen.

4

Si hebben geregneert ende niet wt mi: si hebben princen gheweest ende ic hebse niet bekent. Hoer gout ende siluer hebben si ghemaect tot afgoden: op dat si steruen souden.

5

Dijn caluen zijn geworpen samaria: mijn gramscap is toernich gheworden in hem. Hoe langhe en sullen si niet moghen worden ghereynicht?

6

Want wt israhel is hi oec. Die wercman heeft hem ghemaect: ende god niet Want in spinnen raech sal worden verwandelt dat calf van samarien.

7

want si sullen wint saeyen: ende onweder mayen. Een stroe staende. in hem en is gheen vrucht: ende sal gheen meel maken. Ende ist sake dattet meel maket: die vreemde sullent eten.

8

Israhel is verslonden

[p. *533]

Nu is hi gheworden onder den heydenen als een onreyn vat:

9

want si sijn opgheclommen tot die van assur. Ephraym is hem seluen als een enich veltesel. Si hebben ghauen ghegheuen hoeren mynres:

10

mer si hebben oec gehuert mit loen die heydenen. Ik salse nv vergaderen: ende si sullen een wenich rusten van last des conincs ende der princen.

11

Want ephraym heeft vermenichuoudicht die outaren om te sondighen: ende die outaren sijn hem gheworden tot misdaet.

12

Ic sal hem scriuen menigherley mijn wetten: die als vreemde sijn gherekent.

13

Si sullen offeren offerhanden: si sullen oefferen vleisch ende ete: ende die heer en salse niet otfangen. Nu sal hi ghedencken hoer misdaet: ende sal visiteren haer sonden. si sullen gekeert worden in egipten.

14

Ende israhel heeft vergheten sijnen scepper: ende heeft ghetimmert tempelen den afgoden: ende iudas heeft ghemaect veel stercker steden. Ende ic sal vier senden in sijn steden: ende sal verslinden sijn husen