Bible in duytsche (Delftse bijbel 1477)

§ Ca .vij

1

DOe ic ghesont maken woude israhel is geopenbaert die boesheit ephraym ende die quaetheit samarie: want si hebben ghewrocht loghentael. Ende die dief is inghegaen berouende van binnen: ende die moerdenaer van buyten

2

Ende op dat si niet bi auonturen en moghen segghen in horen harten. dat ic al hoer boesheit niet en ghedencke. Nu hebben hem ombeuanghen hoer verzieringhe des gulden calfs: voer mijn aensicht sijnse gesciet.

3

Si hebben verblijt. den coninc in hoerre boesheit: ende die princen in horen logenen.

4

Alle ouerspeelres sijn als een ouen ontsteken vanden genen die coect. Die stat heeft een wenich gherust vander menghinghe der afgoden: also langhe dat si geheel daer mede besmit wort.

5

Die daghen ons conincs. die princen hebben

[p. *532]

begonnen te rasen vanden wijn Hi heeft wtgerect sijn hant mitten bespotteren::

6

want si hebben hoer hert toegeuoecht als een ouen doe hi hem lagen leide of om te keren van horen god. Alle den nacht heeft hi gheslapen ende heeftse heet ghemaect: des morghens is hi ontsteken als een vlamme viers.

7

Ende si sijn alle heet gheworden als een ouen: ende si hebben verslonden haer rechteren Alle hoer coninghen sijn geuallen ende niet en is onder hem die tot mi roept

8

Ephraym die is gemenghet onder den volken. Ephraym is geworden als broet ghebacken onder die assche dat niet weder en keert.

9

Die vreemde hebben ghegheten sijn starcheit: ende hi heeft des niet gheweten. Mer oec die graeuwe haren sijn wt ghestort in hem: ende hi heeft des niet gheweten.

10

Ende die houerdie israhel sal vernedert worden in hoer aensicht. Ende si en sijn niet weder ghekeert totten heer horen god: ende hebben hem niet ghesocht in al desen.

11

Ende ephraym is gheworden als een verleide duue. die gheen betrouwen en heeft inden heer. Si hebben aengheroepen die van egipten om hulp: ende sijn ghegaen tot die van assyrien.

12

Ende als sij ghereist sijn sal ic mijn nette op hem spreyden: ende als een voghel der lucht sal icse of trecken. Ic salse slaen na thoeren hoerre scaren.

13

Wee hem: want sij sijn wech ghegaen van mi. Si sullen worden verderft want si hebben ouerghetreden ieghen mi. Ic hebse verlost ende si hebben ghesproken teghen mij loghenen.

14

Ende sie en hebben niet geropen tot mi in hoerre herten: mer si hebben ghehuylt in horen slaepcameren. Sij hebben gheeercaut op tarwe ende wijn: ende sijn van mi ghegaen.

15

Ende ic hebse gheleert: ende ghestarct hoer armen: ende si hebben teghen mi gedocht boesheit

16

Si sijn wedergekeert op dat si wesen souden sonder iuck: ende sijn gheworden als een bedrieghende boech. Hoer princen sullen vallen inden zwaerde: van raserie hoerre tonghen. Dit is hoer bespottinge in den lande van egipten