Bible in duytsche (Delftse bijbel 1477)

§ Capittel v

1

HOert dat ghij priesteren ende merct gi familie israhel: ende thuus des conincs toehoert: want v rechtuaerighe verdomenisse is. Want ghij een stric gheworden sijt der bescouwinge ende als een nette wtgerect onder den bergh thabor:

2

ende hebt die offerhanden vernedert int diepe. Ende ic bin een bekenre alle deser dinghen.

3

Ic weet die boesheit effrayms ende israhel is van mi niet verholen. Want nu heeft effraim ouerspeel gedaen: ende israhel is besmit.

4

Sij en sullen haer ghedachten niet gheuen om bekeert te worden tot horen god: want die gheest des ouerspeels int middel van hem is: ende si en hebben den heer niet bekent.

5

Ende die houerdie israhel sal antwoerden in sijn aensichte: ende israhel ende effraim sullen vallen in hoerre boesheit. Ende iudas sal oec vallen mit hem.

6

Si sullen in horen scapen ende geiten ende ossen ende coeyen gaen soken den here. ende sullen hem nyet vinden Hij is van hem of ghenomen.

7

Si hebben ouerghetreden tegen den here: want si hebben vreemde sonen gewonnen. Nv salse dese maendt verslinden mit horen landen.

8

Maect geluut mitter basunen in gabaa ende mitter trompetten in rama. Huylt in bethauen: achter dijn rugghe benyamin.

9

Effraim sal wesen in verderfenisse. Inden dach der berispinge heb ic ghetoent trouwe inden gheslachten israhel.

10

Die princen iuda sijn geworden als toenemende totten eynde haers lan-

[p. *531]

des: op hem sal ic wtstorten als water mijnen toern.

11

Verdriet lidende is effraym ghebroken ouermits den oerdel: want hi heeft begonnen te gaen na die onreynicheit.

12

Ende ic sal sijn als een mot ephraym: ende als atter den huys iuda Ende ephraym heeft ghesien sijn quale: ende iudas sijnen bant

13

Ende effraym is ghegaen tot assur: ende heeft gesent tot den coninc van egipten dat die hem wreken soude. Ende hi sal v niet moghen ghesont maken: noch ontbinden van v den bandt.

14

Want ic sal sijn als een leeuwinne effraym: ende als een ionck leeuwe den huys iuda Ic sal vanghen ende gaen ic sal ofdoen mijn hulp ende niemant en is die v verlossen mach.

15

Ic sal gaende wederkeren tot mijnre stat tot dat gi ontbreect. ende soect mijn aensicht