Bible in duytsche (Delftse bijbel 1477)

§ Capittel .iiij

1

HOert dat woert des heren gi sonen israhel: want oerdel is den heer mit den woenrers der aerden.Want niet en is waerheit: noch bermherticheit: ende niet en is kennisse gods inder aerden.

2

Achterclap ende logen ende dootslach ende diefte ende ouerpeel hebben bouenmaten ouergeuloeyt: ende dat een bloet heeft tander geraect.

3

Daer om sal die aerde screyen: ende al die daer in woent sal cranc worden. Inden beesten des ackers ende inden voghelen der lucht: mer oec die visschen des zees sullen vergadert worden.

4

Nochtan en moet een yegelic niet oerdelen ende een man moet nyet berispt worden. Want dijn volc is als die den priester wedersegghen.

5

Ende du sultste huden vallen: ende die propheet sal oec vallen mit dij. Inder nach heb ic dijn moeder doen swighen

6

Mijn volc heeft geswegen: want nyet gehad en heeft wetennisse der godliker wet. Want du verdreuen hebste die wetetenisse van di: so sal ic di verdriuen dattu niet en sultste gebruken die priesterscap in mijnen dienst. Ende du hebste vergeten die wet dijns gods: ende ic sal vergheten dijnre sonen.

7

Na hoerre menichfoudicheit so hebben si mi gesondicht: haer glorie sal ic verwandelen in bescamenisse.

8

Si sullen eten die sonden mijns volcs: ende tot hoerre boesheit sullen si opboren hoer zielen.

9

Ende als tvolc: alsoe sal wesen die priester. Ende ic sal op hem visiteren sijn weghen: ende ic sal hem weder gheuen sijn ge-

[p. *530]

dachten.

10

Ende si sullen eten ende niet sat worden. Sij hebben ouerspeel gedaen ende nyet ofghelaten: want sij den heer gelaten hebben in niet te bewaren sijn wet.

11

Oncuusheit ende wijn ende dronckenscap ofnemen dat verstant.

12

Mijn volc heeft ghevraecht in sijnen houter ende sijn stock heeft hem geboetscapt Want die geeft der oncuusheden heeft se bedroghen: ende si hebben ouerspeel ghedaen van horen god.

13

Opt ouerste der berghen hebben si gheoffert: ende op die houelen hebben si ontsteken thimiaem onder den akerboem ende populeoen boom ende terpentijn boom: want sijn scaduwe guet was. Daer om sullen v dochteren oncuusheit doen: ende v wijuen sullen ouerspeelsters sijn

14

Ende ic sal niet visiteren op v dochteren als sij oncuusheit ghedaen hebben ende op v wijuen wanneer si ouerspeel ghedaen hebben: want sij mitten meenwiuen verkeert hebben: ende mitten ontmandan gheoffert hebben. Ende tvolc niet verstaende sal worden gheslagen.

15

Want du israhel ouerspeel doetste: iuda en moet niet sondighen. Ende wilt niet ingaen in galgala. ende wilt niet opclimmen in bethauen: noch en wilt niet zweren die here leeft.

16

Want als een weeldighe coe heeft israhal geweken van den iuck gods. Nv salse die heer voeden als een lan inder breetheit.

17

Mede deelachtich der afgoden effraim: laet hem

18

Haer werscap is ghescheiden: si hebben ouerspeel gedaen mit oncuusheit haer bescermers hebben ghemint te brengen bescamenisse.

19

Die bose geest heeft hem ghebonden in sinen wieken ende si sullen worden bescaemt van haren offerhanden