Bible in duytsche (Delftse bijbel 1477)

§ Capittel iij

1

ENde die here heeft gheseit tot mi. Ganc noch ende heb lief een wijf die ghemint is van horen vrient ende een ouerspeelster als die here lief heeft die sonen israhel: ende si sien om tot vreemden goden ende minnen die wijnvaten.

2

Ende ic hebse mi gegrauen ende gecocht om vijftien silueren penningen ende om een hoedt gerstes ende om een half hoedt gerstes:

3

ende ic heb geseit tot haer: Veel dagen sultstu mi verwachten. Du en sultste geen ouerspeel doen ende nyet wesen mit dinen man: mer ic sal oec di verbeiden.

4

Want die sonen israhel sullen veel dagen sitten sonder coninc ende sonder prince ende sonder offerhande ende sonder outaer ende sonder ephot ende sonder theraphin.

5

ende daer nae sullen wederkeren die sonen israhel: ende soeken den here haren god ende dauid sinen coninc: ende sullen vresen totten here ende tot zijn guet in tleste der daghen