Bible in duytsche (Delftse bijbel 1477)

§ Ca .ij.

1

SEgt uwen broderen mijn volc ende uwer suster. barmherticheit vercreghen

2

Oerdelt v moeder oerdelt. want si en is mijn wijf niet: ende ic bin hoer man niet. Si moet ofdoen hoer onkuysheden van horen aenschijn ende hoer ouerspelen vant middel hoerre borsten:

3

op dat icse niet en beroue naect ende setse nae den dach hore gheboerten: ende ic salse setten als een woestenie. ende ic salse setten als lant daermen niet doer en gaet ende ic salse doden mit dorste:

4

ende ic en sal niet ontfermen hoerre sonen. want sonen der onkuysheden sijn si:

5

want hoer moeder heeft ouerspel gedaen. Si is bescaemt diese otfanghen heeft: want si heeft geseit. Ic sal gaen na mijn mijnres die mij geuen broet ende mijn wateren mijn wolle ende mijn vlas mijn oli ende mijn dranc.

6

Daer om siet ic sal tuynen dijnen wech mit doernen ende ic sal dien heynen mit een stenen want

7

Ende si en sal niet vinden hoer weghen ende navolghen hoer mijnres ende salse niet vercrighen: si salse soeken ende niet vinden. Ende si sal segghen. Ic sal gaen ende werderkeren tot mijnen eersten man want mi doe wel was meer dan nu.

8

Ende dese heeft niet gheweten want ic hoer ghegheuen heb tarwe ende wijn ende oly ende heb hoer vermenichuoudicht siluer ende gout welc si ghemaect hebben tot baal.

9

Daer om sal ic worden bekeert ende sal ofnemen mijn tarwe in sijnre tijt. ende mijn wijn in sijnre tijt: ende sal verlossen mijn wolle ende mijn vlas die bedecten hoer scaemte.

10

Ende nv sal ic openbaren hoer sotheit inden ogen hoerre mynres: ende gheen man en salse verlossen van mijnre hant

11

Ende ic sal doen ophouden alle hoer blijscap ende hoer hoechtiden als die hoechtijt der nyewer manen ende horen sabboth ende alle hoer hoechtiden.

12

Ende ic sal verderuen horen wijngaert ende hoer vijchboem. van welcken si geseit heeft. Dit sijn mijn lonen. die mijn mijnres mij ghegheuen hebben.Ende ic sal se setten tot een bosch: ende die beest des ackers salse eten.

13

Eij ic sal visiteren op hoer die daghen baalim in welcken si ontsteken heeft wieroec ende verchierden hoer mit horen hecsele: ende ghinc nae hoer mijnres ende heeft mijns vergeten seit die here.

14

Daer om siet ic salse troesten: ende leidense inder enicheit. Ende ic sal spreken tot hoerre herten:

15

ende sal hoer gheuen wijnbouwers vter seluer stede: ende den dal achor om op te doen den hoep Ende si sal daer singen naden dagen hare ioecht: ende naden daghen hoerre opclimminghe vanden lande egipti.

16

Ende in dien daghe sal sijn seit die here dat se mi noemen sal mijn man: ende en sal mi niet meer noemen baalim.

17

Ende ic sal ofhalen die namen baalim van horen monde: ende si en sal voertmeer niet ghedencken hoers naems.

18

Ende ic sal hem slaen enen vrede in dien dage: mit die beeste des ackers mit den vogel des luchts ende mit den dier dat cruypt op der aerden. Ende ic sal te wrijuen den booch ende zweert ende strijt vanden lande: ende ic salse doen slapen ghetrou-

[p. *529]

welic.

19

Ende ic sal dij trouwen mi inder ewicheit: ende ic sal di trouwen mi in rechtuaerdicheit ende oerdel ende in barmherticheit ende ontfermenissen.

20

Ende ic sal di trouwen mi in gelouen. ende du weten sultste want ic die here bin

21

Ende in dien daghe sal sijn: ic sal verhoren seit die here. Ic sal verhoren die hemelen ende si sullen verhoren die aerde:

22

ende die aerde sal verhoeren tarwe wijn ende olye: ende dese sullen verhoren ihezrahel

23

Ende ic salse sayen mij tot enen lande: ende sal hoerre ontfermen die was sonder bermherticheit.

24

Ende ic sal segghen nyet mijn volc. du biste mijn volc: ende hij sal segghen du biste mijn god.