Bible in duytsche (Delftse bijbel 1477)

§ Capittel .I.

1

DAt woert des heren dat gheschiet is tot osee den soen beheri inden dagen ozie ioathan acham ezechie der coningen iuda: ende inden daghen iheroboam des soens ioas die coninck was ouer israhel.

2

Dat beghin te spreken des heren tot osee. Ende die heer heeft geseit tot osee. Ganc ende neem di een onkuysch wijf: ende maec die sonen der onkuysheit want tlandt sal ouerspelende keren van den heer.

3

Ende hi is ghegaen ende heeft ghenomen gomer debelaims dochter. ende si heeft ontfanghen ende heeft hem voertghebrocht enen soen.

4

Ende die here heeft gheseit tot hem. Noemt sijnen naem iezrahel Want noch een wenich: ende ic sal vanden dat bluet ihezrahel op den huse yehu: ende ic sal doen rusten dat rijc des huys israhel.

5

Ende in dien daghe sal ik te wrijuen den booch israhel in den dal ihezrahel.

6

Ende si heeft noch ontfanghen: ende voertgebrocht een dochter. Ende die heer heeft gheseit tot hem Noemt horen naem sonder barmherticheit. Want ic en sal voertan niet barmhertich wesen den huse israhel. mer ic sal hoere vergheten mit vergetenisse.

7

Ende ic sal ontfermen den huyse iuda. ende salse gesont maken in den heer horen god: ende ic en salse niet ghesont maken inden booch ende inden zwaerde ende inden strijt ende in paerden ende in riders.

8

Ende sie speenden die die was sonder barmherticheit. Ende si heeft ontfanghen: ende voert ghebrocht enen soen

9

Ende die here heeft gheseit tot hem. Noemt sijnen naem. niet mijn volc. Want ghi en sijt mijn volc niet: ende ic en sal niet sijn v god.

10

Ende tghetal der kinderen israhel sal sijn als sant des zees welc sonder maet is: ende sal niet ghetelt worden. Ende sal wesen in die stede daer gheseit sal worden tot hem. nyet mijn volc ghi: hem sal gheseit worden sonen des leuende gods.

11

Ende die sonen iuda ende israhel sullen te samen vergadert worden. ende sullen hem seluen setten een hoeft: ende sullen

[p. *528]

opclimmen vander aerden: want groet is die dach ihezrahels.