Bible in duytsche (Delftse bijbel 1477)

§ Capittel .xxiiij.

1

IN dien daghen quam nabuchodonosor die coninc van babilonien op: ende ioakim wort sijn man drie iaer lanc: ende doe settede hi hem weder ieghen hem.

2

Ende die here sant op hem rouers van caldeen ende rouers van syrien ende rouers van moab ende reuers van ammons kinderen: ende hi santse in iudam dat sien verderuen souden nae sheren woert dat hi ghesproken hadde bi sinen knechten den propheten.

3

Want dat gheschiede bi sheren woert iegen iudam om dat hine wech doen soude van voer hem: om manasses sonden ende om al dat hij dede

4

ende om dat ontsculdighe bluet dat hi wtstorte: ende hi veruolde iherusalem mit bluede van onsculdigen luden: ende om dese dinc en woude die here niet goedertieren worden.

5

Mer tandere van ioakims redenen ende al dat hi dede: en sijn si niet bescreuen inden woerden vanden daghen der coninghen van iuda? Ende ioakim sliep mit sinen vaders:

6

ende ioachym sijn soen regneerde ouer hem.

7

ende voertmeer en deder die coninc van egipten niet toe datti wt sinen lande trecken soude. Want die coninc van babilonien hadt hem al afghewonnen vander riuieren van egipten

[p. *524]

totter riuieren eufraten al dat sconincs van egipten gheweest had.

8

Ioachym was achtien iaer out doe hi begontste te regneren: ende hi regneerde drie maent in iherusalem. Sijnre moeder name was noescha helmathans dochter van iherusalen.

9

Ende hi dede quaet voerden here: na al dat sijn vader ghedaen had.

10

In dien tiden so quamen nabugodonosors sconincs van babiloniens knapen in iherusalem: ende men omleide die stat mit heeren.

11

Ende nabugodonosor die coninc van babilonien quam mit sinen knapen: dat hij op iherusalem stormen soude.

12

Ende ioachym ghinc wt die coninc van iuda totten coninc van babilonien hi ende sijn moeder ende sijn knapen ende sijn princen ende sijn gelubde camerlinghen: ende die coninc van babilonien nam hem inden achsten iaer van sinen rike.

13

ende hi brachte van daer voert al die tresoer van sheren huis ende van sconincs huys oec die tresoer. ende brac alle die gulden vaten die de coninc salomon had doen maken in sheren huis nae sheren woert:

14

ende hi voerde al iherusalem ouer ende alle die princen ende alle die starcke heeren thien dusent in gheuancnisse ende elcken vroetman ende beslutere: ende hi en lieter niet bliuen wtghenomen die arme luden vanden lande.

15

Ende hi voerde oec ioachym ouer in babilonien: ende sconincs moeder ende sconincs wiuen ende sconincs ghelubde mannen ende die rechters van den lande leide hi in gheuangenissen van iherusalem in babilonien:

16

ende alle die starcke mannen seuen dusent. ende wercluden ende besluters een dusent. ende al die starcke mannen ende vechters: die voerde die coninc van babilonien gheuanghen in babilonien.

17

Ende nabugodonosor maecte coninc mathathiam ioachims oem ouer hem. ende hi hete sinen naeme sedechiam.

18

Sedechias had een ende twintich iaer doe hij begontste te regneren: ende hi regneerde elf iaer in ierusalem. Sijnre moeder name was amithal: ieremias dochter van lobna.

19

Ende hi dede quaet voerden here: na al dat ioachym gedaen had

20

Want die here wort vergramt iegen iudam ende iegen iherusalem: tot dat hijse verworpen had van sinen aensichte. Ende sedechias ghinc af vanden coninc van babilonien