Bible in duytsche (Delftse bijbel 1477)

§ Ca xxiij

1

ENde si wederboetscaptent den coninc dat si gheseit had. Ende

[p. *521]

hi sant: ende al die ouders van iuda ende iherusalem vergaderden te hem.

2

Ende die coninc ghinc op in sheren tempel. Ende alle die mannen van iuda ende alle die woenden in iherusalem mit hem die papen ende die propheten ende al tvolc vanden clenen totten groten: ende hi las daer sijt alle hoerden alle die woerden vanden boke van sheren beloften diemen vant in sheren huys

3

Ende die coninc stont op enen grade ende hi sloech belofte voerden here: dat si naden here wanderen souden. ende dat si sijn gheboden ende oercontscap ende sine oeffeninghe wachten souden in al hare herten ende in al hare zielen ende dat si verwecken souden die woerden van deser beloften die in dien boke ghescreuen waren. Ende tvolc oerlofde dese belofte.

4

Ende die coninc beual helchiam den bisscop ende die papen die vander ander ordinancie waren ende den doerwachters dat si vten tempel werpen souden alle die vaten die baal gemaect waren ende den bussche ende alle den ridderscepe des hemels: ende die verbrandense buten iherusalem in die valeye van cedron: ende hi droech tgemul daer of in bethel.

5

Ende hi dede die waersaghers of die de coninghen van iuda geset hadden om sacrilicie te doen inden hoecheden vanden steden van iuda ende al om en tomme iherusalem: ende den ghenen die wieroec verbranden baal ende der sonnen ende der manen ende der twalef teykenen ende alden ridderscap des hemels.

6

Ende hi dede den afgod vanden bussche draghen wt sheren huys buten iherusalem in die valeye cedron ende daer verbernede hine al ende maecten al te puluer: ende hij warpt op des volcs grauen.

7

Ende hij brac oec der verdroechden husekine die in sheren huse waren: daer die wiuen om weenden als huseken van bossches afgoden.

8

Ende hi vergaderde alle die papen vanden steden van iuda: ende hij ontreinde die hoecheden daer die papen gheoffert hadden. van gabaa tot barsabee. Ende hi brac die outaer van den poerten inganc vander doren iosias des princen vander stat: die was ter slinckerziden ter poorten vander stat:

9

Ende die papen vanden hoecheden en ghinghen niet op sheren outaer in iherusalem: mer sij aten allene die derue broden in midden haren brueders.

10

Ende hi ontreinde oec tophet dat in ennons soens valeye is: dat nyemant sinen soen consacreren en soude noch sijn dochter doer molochs vyer.

11

Hij dede oec die paerden wech die de coninghen van iuda hadden ghagheuen der sonnen in den inganc van sheren tempel neuen nathamelechs camere des gelubds camerlincs die in pharurim was: ende hi verbrande mit vyer der sonnen waghene.

12

Ende die coninc brac oec die outaren die in iherusalem waren opt dac van achas cameren. die de coninghen van iuda hadden ghemaect: ende die outaren die manasses ghemaect hadde inden twee vrijthouen vanden tempel: ende hi liep van daer ende stroeyde die assche daer af in die riuiere cedron.

13

Ende die coninc ontreynde oec die hoecheden

[p. *522]

die waren in iherusalem ter rechterzide vanden berghe der verbelghingen die salomon die coninc van israhel gesticht had astaroth den afgod dier van sydonen ende chamos diere van moabs afgod. ende melchon ammons kinderen afgod:

14

ende hi sloech die beelden ontween ende die busschen af: ende hi veruolde haer steden mit doder luden beenre.

15

Ende hier en bouen destrueerde die coninc den outaer die in bethel was ende die hoecheden die iheroboam nebaths soen gemaect had die israhel sondighen dede. ende dien outaer destrueerde hi ende hi verbrandene ende maecten te ghemul: ende hiewe die bussche af.

16

Ende iosias keerde hem omme ende sach daer die grauen die opten berch waren: ende hij sant ende nam die beenre vten grauen ende hi verbrandese opten outaer: ende hi besmette den outaer na sheren woert dattie gods man sprac die dese woerden voerseit had.

17

Ende die coninc seide Wat graft is dit dat ic hier sie? Ende die poerters van daer antwoerden hem Het is des gods mans graft die van iuda quam: ende die dese woerden voerseide die du gedaen hebste opten outare van bethel.

18

Ende die coninc seide Laten ligghen. Ende nyeman en porre sijn beenre. Ende sijn beenre en worden niet geporret. mit dies propheten beenre die van samarien gecomen was.

19

Ende iosias droech oec wech alle die hoecheden vanden temple die waren inden steden van samarien die de coninghen van israhel gemaect hadden om den here te verbelgene: ende hi dede hem na alle die wercken die hi ghedaen hadde in bethel.

20

Ende hi sloech doot opten outaren alle die papen vanden hoecheden die daer waren: ende hi verbrande opten outaer menschen beenre. Ende hi keerde weder in iherusalem:

21

ende hi beual alle den volcke ende seide. Doet den here uwen god phase: alsoe bescreuen is in desen boke der beloften.

22

Want alsulc phase en was niet gedaen inden rechters dagen die israhel vonnisten noch binnen alle der coninghen dagen van israhel ende die coninghen van iuda:

23

alsoe ghedaen was inden achtienden iare sconincs iosias dit phase voerden here. in iherusalem.

24

Ende iosias dede af die phitonen ende die waersaghers ende die figuren vanden afgoden. ende onsuuerheden ende die onwaerdicheden die in tlant van iuda gheweest hadden ende in iherusalem. om dat hi setten soude die woerden vander wet die gescreuen sijn inden boke die helchias die pape vant in sheren tempel

25

Ne ghene coninc en was voer hem sijns gelijc. die bekeerde ten here in alle sijn herte ende in alle sine siele ende in al sine machte na al moyses wet: noch na hem en stont ne gheen op sijns gelike

26

Mer nochtan so en keerde hem die here niet vander groter gramscap sijns toerns daer sijn toern mede vergramt was iegen iudam. om die onwaerdicheyt daren manasses mede gheporret had.

27

Ende die here seide. Ic sal iudam wegh doen van minen aensichte also ic israhel heb gedaen: ende ic sal dese stede die ic vercoren hebbe iherusalem verwer-

[p. *523]

pen ende thuys daer ic of gheseit hebbe. mijn name sal daer wesen.

28

Mer tander van iosias redenen ende al dat hi dede: en sijn si niet bescreuen inden boke der woerden vanden dagen der coninghen van iuda?

29

In sijn dagen so quam pharao nechao die coninc van egipten ieghen den coninc van assirien ter riuieren van eufraten. Ende iosias die coninc van iuda ghinc wech hem te ghemoete: ende hi wort gedoot in mageddo als hine ghesien had.

30

Ende sijn knapen voerden van mageddo doot. ende si voerdenen in iherusalem. ende si grouenen in sijn gracht Ende tvolck vanden lande nam iochas iosias soen. ende si sacreerden hem. ende maecten coninc ouer sinen vader.

31

Ioachas was drie ende twintich iaer out doe hi begontste te regneren: ende hi regneerde drie maenden in iherusalem. Sijnre moeder name was amithal ieremias dochter van lobna.

32

Ende hij dede quaet voerden here. na al dat sijn vaders ghedaen hadden.

33

Ende pharao nechao vincken in reblatha. dat in tlant van emath is: om dat hi in iherusalem niet regneren en soude. Ende hi sette die settinghe op tlant hondert talente siluers: ende enen talente gouts.

34

Ende pharao necho amaecte coninc heliachym iosias soen ouer iosiam sinen vader: ende hij keerde sinen name ioakim mer hij nam ioacham ende voerden in egipten

35

ende ioakim gaf pharao tsiluer ende tgout ende hi settet op tlant alle iare: datment gheuen soude na pharaons ghebot. Ende hi nam elken na dat hi gheuen mochte beide tsiluer ende tgout van den volcke van den lande om dat hijt pharao nechao gheuen soude.

36

Ioakim was vijf ende twintich iaer out doe hij begontste te regneren: ende hi regneerde elf iaer in iherusalem Sijnre moeder name was zebida phadaia dochter van ruma.

37

Ende hi dede quaet voerden here: nae al dat sijn vaders ghedaen hadden.