Bible in duytsche (Delftse bijbel 1477)

§ Ca .xii

1

IOsias was acht iaer out doe hi begontste te regneren. ende hi regneerde een ende dertich iaer in iherusalem. Ende sijnre moeder name was ydida phadaya dochter van besechat

2

Ende hi dede dat ghenoechtlic was voerden here: ende hi wanderde doer alle dauids sijns vaders wegen. Ende hi en keerde hem niet af noch ter rechter hant noch ter slincker hant.

3

Inden achtienden iare iosias sconincs so sant die coninc saphan asue soen die mesullam sone was die cancellier van sheren tempel: ende seide hem.

4

Ganc tot helchyam den groten pape datmen tgelt smelte dat in sheren huys ghebracht is dat die dorewachters vanden tempel vergadert hebben vanden volcke:

5

ende men gheuet den werckluden biden prouoest van sheren huus. Ende si deelent voert den ghenen die in sheren tempel wercken om te vermaken dat in sheren tempel te vermaken is.

6

Ende si gauent

[p. *520]

den tymmerluden ende den metsers ende den ghenen die maken datter ghescoert is: ende dat si copen hout ende steen vanden steenroetsen om te vermaken sheren tempel.

7

Mer nochtan en rekentmen niet tghelt dat si ontfaen. Mer sij sullent hebben in hare machte ende in hare gheloue.

8

Ende helchias die biscop seide tot saphan den cancellier. Ic heb gheuonden in sheren huys die boke vander wet. Ende helchias gaf en saphan den cancelier: ende hi lassene.

9

Ende saphan die cancellier quam tot den coninc: ende hi seide hem dat hi beuolen had: ende seide. Dijn knapen hebben tghelt gesmolten datmen vant in sheren huys: ende si hebbent gegeuen datment delen sal den werckluden bi den prouoest vanden wercke van sheren huys.

10

Ende saphan den cancellier vertelde den coninc ende seide. Helchias gods pape heeft mi ghegheuen enen boke. Ende doen saphan voerden coninc gelesen had

11

ende die coninc ghehoert hadde die woerden van sheren wet so scoerde hi sijn clederen:

12

ende hi beual helchiam den pape ende aycham saphans soen ende achobor mytha soen ende saphan den cancellier ende asaie sconincs knape ende seide.

13

Gaet ende gaet den here te rade op mij ende op tvolc ende op al iuda. vanden woerden van desen boke die hier gheuonden is Want ieghen ons is sheren grote gramscap ontsteken: om dat onse vaders niet en hebben ghehoert die woerden van desen boke soe dat si soude ghedaen hebben alle dat ons ghescreuen is.

14

Ende helchias die pape ende aycham ende achabor ende saphan ende asaia ghingen tot oldan der prophetinnen selluns wijf thecue soens die aras soen was des wachters vanden clederen die in iherusalem woende in dander muere: ende si spraken haer ane.

15

Ende si antwoerde hem Dit seit die here god van israhel Dit suldi die man seggen die v tot mi gesonden heeft.

16

Dit seit die here. Sich ic sal quaet inbrengen op dese stat ende op dier in wonen versmadende die woerde vander wet die de coninc van iuda las:

17

om dat si mi ghelaten hebben ende vreemde goden gheoeffent ende hebben mi vergramt in alle den wercken haerre handen. Ende mine onwaerdicheit sal worden ontsteken in deser stat: ende si en sullen niet worden geblusschet.

18

Mer den coninc van iuda die v gesonden heeft om dat ghi den here te rade gaen sout suldi segghen. Dit seit die here god van israhel. Om dat alstu hoerdeste die woerden van desen boke

19

dijn herte veruaert wort ende om dattu di veroetmoedichste ieghen den here doen du hoerdeste die redenen ieghen dese stat ende iegen die gene dier in wonen. dats dat si werden souden in een verwonderen ende in vermaledijtheden ende om dattu dine clederen scoerdeste ende weendeste voer mi soe heb ict gehoert seit die here:

20

hier om sal ic di vergaderen te dinen vaders. ende du sultste vergadert worden te dinen graue in paeyse: omdattu niet sien en sultste al tquaet dat ic brenghen sal op dese stat