Bible in duytsche (Delftse bijbel 1477)

§ Ca xxi

1

MAnasses was twalef iaer out doe hi begontste te regneren: ende hij regneerde vijf ende vijftich iaer in iherusalem. Sijnre moeder name was aphsiba.

2

Ende hi dede quaet in sheren aenscouwen: nader heydenen afgoden die de here af dede vanden kinderen van israhels aensichte.

3

Ende hij keerde hem ende hi stichte die hoecheden die ezechias sijn vader te broken hadde: ende hij verhief baals outaren alsoe als achab: ende hij maecte busschen als die coninc van israhel ghedaen hadde: ende hi aenbede al tridderscap vanden hemele ende hi oeffendet.

4

Ende hi maecte outaren in sheren huys daer die here af seide. in iherusalem sal ic minen name setten:

5

ende hij stichte outaren alden ridderscip vanden hemele. in twee vrijthouen van sheren tempel

6

Ende hi toech sinen soen doer tvyer: ende hij touerde ende hilt waersagerie. ende hi maecte phitonen. ende die waersagers menichfoudichde hi: om dat hi qualiken doen soude voerden here ende hem verwecken tot toerne.

7

Ende hi stichte den afgod vanden bussche die hij ghemaect had in sheren tempel: daer die here af tot dauid sprac ende tot salomon sinen soen. In desen tempel ende in ierusalem dien ic vercoren hebbe wt alden gheslachten van israhel daer sal ic minen name ewelike setten:

8

ende ic en sal voertmeer niet doen verrueren israhels voet vanden lande dat ic haren vaders ghegeuen hebbe: ist nochtant dat si wachten mit wercken al dat ic hem beuolen hebbe: ende al die wet die hem moyses minen knecht beuolen heeft

9

Mer si en hoerdens niet: mer si worden verleit bi manasse: dat si quaet doen souden bouen den heidenen die de here verderfde vander kinderen van israhels aensichte.

10

Ende die here sprac in sijnre knechten der propheten hant ende seide.

11

Om dat manasses die coninc van iuda dese alte quade onwaerdicheit ghedaen heeft bouen allen dien dattie amorreen ghedaen hebben voer hem. ende om dat hi oec iudam heeft doen sondighen in sinen onsuuerheden:

12

hier om seit die here god van israhel dit. Siet ic sal quaet inbrenghen op iherusalem ende iudam: soe wie dat horen sal hem sullen beide sijn oren tuten

13

Ende ic sal op iherusalem wttrecken die line van sa-

[p. *519]

marien ende tlast van achabs huse: ende ic sal iherusalem afdoen also men pleghet tafelen te plamen. Afdoende sal ic verderuen ende die wijle die griffie keren ende striken op haer aensichte.

14

Mer ic sal reliquien van mine erfachticheit laten ende leuerense in haren vianden handen: ende si sullen wesen in woestheden ende in roue al haren wedersaken

15

om dat si voer mi quaet ghedaen hebben: ende om dat si gedurich bleuen sijn mi vergrammende van dien daghe dat haer vaders wt egipten quamen tot in desen daghe.

16

Hier en bouen so storte manasses seer veel onsculdichs bluets wt tot dat hi iherusalem daer of veruolde totten monde. al sonder sine sonden daer hi iudam mede dede sondighen dat si voerden here quaet doen souden.

17

Mer tander van manasses redenen ende al dat hi dede. ende sijn sonden die hi sondichde: sijn si niet bescreuen inden boke der woerden vanden daghen der coningen van iuda?

18

Ende manasses sliep mit sinen vaders ende hi wort begrauen inden hof sijns huys. ende inden hof ozam: ende amon sijn soen regneerde ouer hem.

19

Amon was twee ende twintich iaer out doe hi begontste te regneren: ende hi regneerde twee iaer in iherusalem Sijnre moeder name was messallemeths dochter van arus van ietheba.

20

Ende hij dede quaet in sheren aenscouwen alsoe manasses sijn vader had ghedaen:

21

ende hi wanderde in alden wegen daer sijn vader in wanderde. Ende hij diende die onsuuerheden die sijn vader ghedient had ende hi aenbedese:

22

Ende hi liet den here sijnre vaderen god. Hi en wanderde in des heren weghen niet.

23

Ende sijn knapen spieden na hem mit verradenisse: ende si sloghen den coninc doot in sijn huys.

24

Ende tvolc vanden lande slogen doot alle die ieghen den coninc amon ghesworen hadden: ende si maecten hem haren coninc iosiam sinen soen voer hem

25

Mer tander van amons redenen die hi dede: en sijn si niet bescreuen inden boke der woerden vanden dagen der coninghen van iuda?

26

Ende si grouenen in sinen graue inden hof ozam: ende iosias sijn soen regneerde ouer hem.