Bible in duytsche (Delftse bijbel 1477)

§ Ca .xix

1

ALs die coninc ezechias dese woerden hoerde so schoerde hi sijn clederen. ende toech enen sacroc aen: ende ghinc in sheren huus:

2

ende hij sant elyachim die prouoest vanden huse: ende sobnam die cancellier. ende die ouders vanden pape mit sacken ouerdect tot ysayam den propheet amons soen.

3

Ende seiden. Dit seit ezechias. Dese dach is die dach van berispene ende van vernoye ende van blasphemien. Die kinder sijn ghecomen totten ghebaerne: ende die ghebaren sal heeft ne ghene macht.

4

Ofte machscien die here dijn god wil horen al rapsaces woerden die den coninc van assyrien

[p. *515]

sijn here ghesonden heeft dat hi den leuenden god lachteren soude ende berispen mit woerden die de here dijn god ghehoert heeft: ende doch een bedinge ouer dese ouerbliue die hier gheuonden sijn.

5

Dus quamen des conincs ezechias knapen tot ysayam.

6

Ysayas seide hem. Dit segt uwen here. Dit seit die here. En wilt v niet ontsien van dier redenen aensien die du ghehoert hebste: daer mi mede geblasphemeert hebben sconincs kinderen van assyrien.

7

Sich ic sal hem enen gheest insenden ende hi sal ene bode horen. ende hi sal wederkeren in sijn lant: ende ic sallen ter nederwerpen metten zwaerde binnen sinen lande

8

Ende rapsaces keerde weder: ende hi vant den coninc van assyrien stormende op lobna Want hij hadde ghehoert dat hij van lachis ghetoghen was.

9

Ende doe hi ghehoert had van tharacha die coninc van ethiophien die hem seiden. Sich hi is wtghetoghen om te striden ieghen di. dat hi ieghen hem trecken soude: soe sant hi boden tot ezechiam ende seide.

10

Segt dit ezechien den coninc van iuda. Die here dijn god en bedrege di niet daer du betrouwen in hebste: noch en seg niet. iherusalem en sal niet worden gheleuert in sconincs handen van assyrien.

11

Want du hebste selue ghehoert wat die coninghen van assyrien hebben ghedaen in allen landen hoe sijse ghewoest hebben. Sultstu dan allene moghen verlost worden.

12

Hebben der heidene gode elken die mijn vaders gewoest hebeen verlost haer lant. dats te weten gozan ende aran ende reseph ende die kinderen van eden die waren in thelassar?

13

Waer is die coninc van emath ende die coninc van arphat ende die coninc vander stat sepharuaym ana ende aua?

14

Ende doe ezechias dus ontfaen hadde die letteren vander boden hant ende hijse ghelesen hadde: soe ginc hij op in sheren huus ende hij ondeedse voerden here:

15

ende hi bede in sinen aenscouwen ende seide. Here god van israhel du sitste bouen cherubin dus biste alleen here van allen coninghen van deser werelt: du makeste hemel ende aerde.

16

Helde neder dijn ore ende hore. Here doch op dijn oghen ende sich: ende hore al sennacheribs worden: die hi gesonden heeft om ons den leuenden god te lachteren.

17

Here waerliken soe hebben die coninghen van assyrien gedestrueert die heidenen ende al tlant:

18

ende hebben haer gode int vyer gheworpen. Want ten waren ne gene goden: mer het waren wercken van menschen handen van houte ende van stene: ende si verderfdense

19

Nu here onse god verlosse ons van haren handen: dat alle die riken van aertrike weten mogen dattu hem allene god biste.

20

Ende ysayas amos soen sant oec tot ezechiam ende seide. Dit seit die here god van israhel. Dattu mi ghebeden hebste op sennacherib den coninc van assyrien heb ic ghehoert.

21

Dit is twoert dattie here van hem ghesproken heeft. Die maghet die dochter van syon heefti versmaet ende veronwaert die dochter van iherusalem ruerde haer hoeft achter dinen rugge.

22

Wien hebstu ghelachtert: ende wien hebstu ge-

[p. *516]

blasphemeert? Ieghen wien hebstu dijn stemme opgheheuen: ende hebste dijn oghen inden hoecheden opgheheuen? Iegen den heiligen van israhel

23

Bi dijnre knechten hande hebstu den here gelachtert: ende gheseit. Inden menichten van minen waghenen soe bin ic op die hoecheit vanden bergen ghetoghen optie hoecheit vanden libano: ende ic heb af ghehouwen sijn hoge cederbomen: ende sine wtuercoren abyegne bomen. Ende ic tider binnen tot in sinen terminen: ende ic heb af ghehouwen die busschen van sinen carmele.

24

Ende ic heb vreemde wateren gedroncken. ende ic heb verdroget mitten voetstappen mijns voets alle besloten wateren.

25

En hebstu niet gehoert wat ic vanden beghinne gedaen hebbe? Vanden ouden daghen heb ic dat gescepen. ende nu heb ict toe bracht. Ende die gemuerde steden sullen wesen in valle van tsamen vechten den berghen:

26

ende dier binnen sitten veroetmoedicht beefden mitter hant ende si worden bescaemt. sij sijn gheworden gelijc den hoeye van den ackere. ende gelijc grueyende crude vanden dake: dat verdrogede eert ter rijpheit quam.

27

Dijn woninge ende dinen wtganc ende dinen inganc ende dinen wech voer wiste ic: ende dinen toern ieghen mij

28

Du biste versot ieghen mi: ende dine houaerde is opghecomen in minen oren Hier om sal ic enen rinc doen in dinen noselocken. ende enen hechtere in dinen lippen: ende ic sal di wederleiden al dien wech die du gecomen biste.

29

Ezechias dit saldi een teiken wsen.Eet dit iaer dattu vinden sultste: ende in dat ander iaer dat al willens wassen sal. Mer int derde iaer soe saeyt ende maeyt: ende plant wijngaert ende eet haer vruchten.

30

Ende dat ouerbliuen sal van iudas huyse dat sal die wortel nederwaert schieten: ende het sal die vruchte opwaert maken.

31

Want wt iherusalem sullen die ouerbliue wtcomen: ende dat behouden werden sal vanden berghe syon. Sheren toren vanden heeren sal dit doen.

32

Ende om dese sake seit die here dit vanden coninc van assyrien Hi en sal binnen deser poort niet comen. noch hi en salre ne ghene scutte schieten: noch ne ghenen schilt en sal haer becommeren: noch ne ghene heere en salse omme beleggen.

33

Hi sal wederkeren alle dien wech dien hi gecomen is: ende hi en sal binnen deser stat niet comen seit die here:

34

ende ic sal dese poert bescermen ende verlossen om minen wil. ende om dauid minen knecht

35

Ende het gheschiede binnen dier seluer nacht so quam sheren enghel: ende sloech in dier van assyrien ghetelde hondert dusen ende vijf ende tachtich dusent mans. Ende doe sennacherib inder dageraet opghestaen was so sach hi alder doder lichamen:

36

ende hi toech wech ende vloe henen. Ende sennacherib die coninc van assyrien keerde weder: ende woende in niniue.

37

Ende doe hi in nesrach tempel aenbede sinen gode. adramelech en sarasar sijn sonen sloghen hem doot mitten zwaerde: ende si vlouwen in tlant van armenien: ende asaraddon sijn soen regneerde ouer hem