Bible in duytsche (Delftse bijbel 1477)

§ Capit .xviij

1

IN ozee hela soen derde iaer sconincs van israhel soe regneerde ezechias achas soen sconincs van iuda.

2

Hi was vijf ende twintich iaer out doe hi begontse te regneren: ende hij regneerde neghen ende twintich iaer in iherusalem. Sijnre moeder name was abisa zacharien dochter

3

Ende hij dede dat guet was voerden here na al dat dauid sijn vader ghedaen hadde.

4

Dese ezechias scheyde die hoecheden: ende brac die beelden ende hi hyewe die busschen af: ende hi brac tmetalen serpent dat moyses gemaect hadde.Want tot dier tijt hadden hem die kinder van israhel wieroec verbrant. Ende hi hete tserpents name nehestaz.

5

Ende hi had betrouwen inden here god van israhel. Want na hem en was sijns gelijc niet in alden coningen van iuda noch in die ghene oec die voer hem waren.

6

Ende ezechias hielt hem anden here: ende hi en keerde hem niet van sinen voetstappen: ende hi dede sine geboden die de here moysen geboden hadde

7

ende daer bi so was die here mit hem ende te alle dien dat hi wt toech so dede hi wijselic. Ende hi settede hem iegen den coninc van assirien: ende hi en diende hem niet.

8

Hij sloech die philistijm tot gazam. ende al haer terminen: vanden wachters toorne totter ghemuerder steden.

9

Inden vierden iaer ezechias dat ozee hela soen sconincs van israhels se-

[p. *513]

uende iaer was: soe quam op salmanasar die coninc van assyrien tot samarien ende stormder op ende namt.

10

Want na die drie iaeren in ezechias seste iaer dats inden neghenden iare ozee sconincs van israhel was samarien ghewonnen.

11

ende die coninc van assyrien voerde israhel ouer in assirien. ende hi settese in ahyla ende in abor ten riuieren gozan ende in die steden van meden:

12

om dat si niet en hoerden sheren haers gods stemme. mer si braken haer belofte. Al dat moyses sheren knecht beuolen had en hoerden si niet noch en daden

13

Inden viertienden iaer ezechias des conincs so quam sennacherib die coninc van assyrien te alden ghemuerden steden van iuda ende wanse.

14

Doe sant die coninc ezechias boden totten coninc van assyrien in lachis ende seide. Ic heb misdaen. Ganc wech van mi: ende al dattu op mi setten sultste dat sal ic draghen Ende hier om settede die coninc van assirien opten coninc van iuda drie hondert talenten siluers ende dertich talenten gouds.

15

Ende ezechias gaf al tsiluer datmen vant in sheren huys: ende in sconincs tresoer.

16

In dien tiden soe brac ezechias die coninc die doren van den tempel gods ende die gulden platen die hi daer an ghenaghelt hadde. ende hi gafse den coninc van assyrien

17

Mer die coninc van assyrien sant chartan ende rapsaris ende rapsacen van lachis te iherusalem waert mit starker hant totten coninc ezechiam. Ende doe si opgetoghen waren so quamen si te iherusalem op ende si stonden neuen twater corduut vander hogher fonteynen die inden wech vandes volres acker is.

18

Ende carthan ende rapsaris riepen ezechiam den coninc. Ende tot hem ginc wt elyachim helchias sone die grote pape van den tempel ende sobna die cancelier ende ioahe asaph soen die die gesten screef:

19

ende rapsacis seide tot hem. Segt ezechien. Dit seit die grote coninc: die coninc van assirien. Wat betrouwen is dit daer du di op houtste?

20

Machschien du hebste raet ghehat: dattu di heren den sultse te striden. Waer in hoepstu: dattu ieghen mi dorces vechten?

21

Ofte betrouwestu inden riedene stoc die te broken is in egipten? Maect datter een man op leende: soe soude hij breken ende gaen: ende doregaten sijn hant. Dusdane is pharao die coninc van egipten. alden ghenen die in hem ghetrouwen.

22

Ende ist dattu mi segste wi hebben betrouwen in onsen god den here. en is hi dit niet dies hoecheden ende outare ezechias afghedaen heeft. ende heeft die van iuda ende van iherusalem beuolen: voer desen outaer suldi aenbeden in iherusalem?

23

Nu hier om coemt ouer te minen here den coninc van assirien: ende ic sal v gheuen twee dusent paerden: ende besiet of ghi sult moghen hebben ridders daer op.

24

ende hoe moge di wederstaen ieghen enen vanden minsten barone mijns heren die sijn knapen sijn? Ofte hebste betrouwen in egipten om die waghenen ende om die gheredenen?

25

Bin ic te deser stat op ghecomen dat icse destrueren soude: sonder mijns heren wille? Die here seide mij

[p. *514]

Treet op te desen lande: ende destrueert

26

Ende heliachim elchie soen ende sobna die cancellier ende ioahe seiden tot rapsaten Wi bidden dattu ons dinen knechten spreecs in syerscher talen. want wi verstaen die tonghe: ende en spreect ons niet aen in ioedscher talen om dattet tvolc hoert: dat optie mure sittet.

27

Ende rapsaces antwoerde ende seide. heeft mi minen here gesonden te dinen here ende te di. dat ic dese redenen spreken soude. ende niet tot dien mannen die op die mure sitten. soe dat sij mit v luden moeten eten haer mes ende drincken haer orine?

28

Ende rapsaces stont. ende riep mit groter stemmen in ioedscher talen ende seide. Hoert des groten conincs woerden: die coninc van assyrien.

29

Dit seit die coninc. ezechias en verleide v niet Want hi en sal v niet mogen verlossen van mijnre hant:

30

noch hi en gheue v ne ghene betruwe opten here segghende. Verlossende sal ons die here bescermen: ende dese stat en sal niet worden gheleuert in sconincs hant van assyrien.

31

En wilt ezechiam niet horen Dit seit die coninc van assyrien Doet mit mi dat v oerbaerlijc is: ende coemt te mi wt. Ende elc eet van sinen wijngaerden: ende van sinen vighebomen ende drinket twater van uwer fonteinen:

32

tot dat ic comen sal ende v ouer uoeren sal in een lant dat uwen lande ghelijc is in een vruchtelic lant ende een drachtelic lant in een lant van wine ende van brode ende van wijngaerde. in een lant van olyue ende van olye ende van honighe: ende ghi sult leuen ende niet steruen. En wilt ezechiam niet horen die v bedrieghet ende seit. Die here sal ons verlossen.

33

Hebben der heidenen goden haer lant verlost van sconincs hant van assyrien?

34

Waer is is die god van emath ende arphat? Waer is die god van sepharuaym ana ende aua? Hebben si samarien verlost van mijnre hant?

35

Wie sijn die goden onder allen goden der werelt die hoer lantscap hebben mogen bescermen van mijnre hant: dattie here sal mogen iherusalem bescermen van mijnre hant?

36

Ende tvolc sweech: ende en antwoerde hem niet. Want si hadden ghebot vanden coninc ontfaen: dat si hem niet antwoerden en souden.

37

Ende helyachim helchie soen die prouoest vanden huse quam ende sobna die cancellier ende ioahe asaphs soen die scriueyne vanden gesten tot ezechiam met gescoerden clederen: ende boetscapten hem rapsacis woerden.