Bible in duytsche (Delftse bijbel 1477)

§ Ca xvij

1

INden twalefsten iaer achas sconincs van iuda so regneerde ozee hela soen in samarien bouen israhel neghen iaer:

2

ende hij dede voerden here quaet: mer niet als die coninghen van israhel die voer hem geweest hadden

3

Ieghen desen quam op salmanaser die coninc van assirien: ende ozee wort sijn man: ende hi gaf hem tribuut.

4

Ende doe die coninc van assyrien gewaer wort dat ozee iegen hem soude willen striden ende dat hi ghesonden hadde tot sua den coninc van egipten om salcoers. om dat hi den coninc van assyrien neghene tribuut gheuen en soude. alle iaer so hi plach: so beleide hi hem. ende leiden in enen kerker gheuaen:

5

ende hij voer al tlant doer: ende beleiden drie iaer in samarien.

6

Ende in ozee negende iaer soe wan die coninc van assyrien samarien: ende hi voerde israhel ouer in assyrien: ende hi settese in hyalam ende in abor bider riuieren gozan in die steden van meden.

7

Ende het ghesciede na dat die kinderen van israhel voer den here ghesondicht hadden haren god diese vten lande van egipten gheleit hadde van pharaons handen coninc van egipten: ende sij vreemde goden geoeffent hadden.

8

ende si gewandert hadden nader heidenre zeden die de here verderft had inden aenscouwen der kinderen van israhel ende der coninghen van israhel: die oec alsoe ghedaen hadden.

9

Ende die kinderen van israhel verbolghen den here haren god mit ongerechten woerden: ende si maecten te haren behoef hoecheden in al haren poerten vander wachters toorne totter ghemuerder steden.

10

Ende si maecten te haren behoef beelden ende busschen op elcen hoghen berch. ende op elcke ghelouert hout:

11

ende si verbranden daer wieroec op die outaren na die zeden vanden heidenen die de here verdreuen had van haren aensichte. Ende si daden alte quade woerden om den here te vergrammen:

12

Ende si oeffenden die onsuuerheden daer die here af beual dat sij dit woert niet doen en souden.

13

Ende die here oerconde in israhel ende in iuda bi alle propheten ende der siender hant ende seide. Keert weder van uwen alten quaden weghen. ende wacht minen geboden ende mine oeffeninghe: nae alle die wet dien ic uwen vaders beual: ende also ic tot v ghesonden hebbe in mijnre knechten der propheten hant.

14

Ende si en hoerden niet: mer si verherden haer necke na haerre vaderen necken die niet ghehoersaem en wouden sijn den here haren god.

15

Ende si verworpen sijn wette. ende sijn belofte dien hij gheset hadde mit haren vaders ende die oercontscappen daer daer hi hem mede oerconde: ende sij volgheden ydelheden ende si daden ydelic: ende si volgheden den

[p. *511]

heidenen die al om en romme hem waren daer hem die here af beuolen had dat si niet doen en souden also si daden

16

Ende si lieten al sheren haers gods geboden: ende si maecten te haren behoef twee ghegoten calueren ende bosschen: ende si aenbeden alle dat ridderscap des hemels ende sij dienden baal

17

ende sij consacreerden hem haer sonen ende haer dochteren doer tvyer Ende si dienden waersagherien ende touerien: ende sij leuerden hem seluen dat si quaet doen souden voerden here: ende si verbolghen hem.

18

Ende die here wort anxtelike gram op israhel: ende hi deedse wech van sinen aenscouwen ende daer en bleef niet sonder tgeslacht van iuda allene

19

Mer iudas en wachte oec sheren sijns gods geboden niet: mer hi wanderde ende doelde in israhels dolinge. die hi ghedaen had.

20

Ende die here verwarp al tsaet van israhel ende quelledse ende hi leuerdse inder genere hande diese rouede. tot dat hi se van sinen aensichte geworpen had.

21

van dier tijt dat israhel ghesceiden wort van dauids huse: ende dat si te haren behoef coninc maecten iheroboam nabaths soen. Want iheroboam sceide israhel vanden here: ende hi deedse sondigen een grote sonde.

22

Ende die kinderen van israhel wanderden in alle iheroboams sonden die hi gedaen hadde: ende si en gingen niet af

23

voer dat die here israhel af dede van sinen aensichte. also hi ghesproken had in alle sijnre knechten der propheten hant. Ende israhel wort ouer geuoert wt sinen lande onder die van assyrien tot in desen daghe.

24

Ende die coninc van assyrien brachtse van babilonien ende van cutha ende ahaiath ende van emath ende van sefaruaym heidenen ende settese in den steden van samarien voer die kinderen van israhel. Ende sij besaten samarien: ende woenden in haren poorten

25

Ende doe si daer begonsten te wonen so en ontsagen si den here niet: ende die here sant onder hem leeuwen: ende si dodense.

26

Ende men boetscaptet den coninc van syrien ende seidet hem. Die heidenen die du ouergeuoert hebste ende hebste doen wonen inden steden van samarien si en weten niet die wet dies gods van dien lande: ende die here senter leeuwen onder. ende siet die dodense: om dat si niet en weten dit zede vanden lande.

27

Ende die coninc van alsyrien geboet ende seide. Voert darwaert een vanden papen die ghi hier geuanghen gebracht hebt: ende hi gae ende woen mit hem: ende leer hem des gods wet van den lande.

28

Ende doe daer ghecomen was een vanden papen die gheuanghen ghebracht waren van samarien so woende hi in bethel: ende hi leerde hem hoe si den here dienen souden.

29

Ende elc manier van dien luden maecten haren god. Ende die setten si inden hogen tempels die de luden van samarien ghemaect hadden ende die luden in haren poorten daer si in woenden.

30

Want die mannen van babilonien maecten sochot benoth: ende die mannen van cutheni maecten nergel: ende die mannen van emath maecten asuna.

31

Ende die mannen van eueen maecten nebaaz ende tachaz.

[p. *512]

Mer die gene die waren van sefaruaym si verbranden haer kinderen mitten vyer tot ramelech ende anamelech die goden van sefaruaym:

32

ende oec oeffenden si den here. Ende si maecten vanden achtersten papen vanden hoecheden: ende si leidense in hogen tempels.

33

Ende als si den here oeffenden: soe dienden sij oec haren goden na die castume vanden heidenen vanden welcken si gebracht waren in samarien.

34

Ende tot in desen daghen so volghen si haer oude zeden Ende si en ontsien den here niet: noch en wachten sine oeffeninghe niet noch sijn vonnisse noch sijn wette noch tghebot dat die here iacobs sonen gheboden hadde dien hi israhel ghetoenaemt had:

35

Ende hi had mit hem belofte gesleghen. ende hi had hem beuolen ende gheseit. En wilt niet ontsien vreemde goden ende aenbeedse niet noch en oeffentse niet noch en offert hem niet:

36

mer den here uwen god die v vten lande van egipten gheleit heuet in groter starcheit ende mit wtghestrecten armen. hem ontsiet ende hem aenbeet: ende hem offert.

37

Ende wacht oec die vonnissen ende die oeffeninghen ende die wet ende tgebot dat hij v gescreuen heeft so dat gijt doet tot allen daghen: ende ontsiet die vreemde goden niet.

38

Ende en wilt niet vergeten die belofte die hij met v heeft gedaen: ende en oeffent ne gene vreemde goden

39

mer ontsiet den here uwen god: ende hij sal v verlossen van alle uwer vianden handen.

40

Mer si en hoerdens niet: mer si daden na die eerste ghewoente.

41

Dus waren dese heidenen ontsiende den here: mer nochtant so dienden si haren afgoden. Want haer kinderen ende haer neuen doen tot in desen daghen: also haer vaders daden