Bible in duytsche (Delftse bijbel 1477)

§ Capittel .xv

1

INden seuen ende twintichsten iare iheroboams sconincs van israhels so regneerde azarias amasias soen sconincs van iuda.

2

Hij was sestien iaer out doen hi begonste te regneren: ende hi regneerde in iherusalem twee ende vijftich iaer. Ende sijnre moeder name was iecelia van iherusalem.

3

Ende hij dede dat genoechtliken was voerden

[p. *507]

here na al dat amasias sijn vader gedaen had:

4

mer nochtan en brac hij die hoecheden niet. Want noch so offerde tvolc ende verbrande wieroec inden hoecheden.

5

Ende die here sloech dien coninc ende hi was lazers totten daghe sijnre doot: ende hi woende beziden in een huys Ende ioatham des sconincs soen beleede tpalaeys ende vonniste tvolc vanden lande

6

Mer tander van azarie redenen ende al dat hi dede: en sijn si niet bescreuen inden boke der woerden vanden dagen der coninghen van iuda?

7

Ende azarias sliep mit sinen vaders: ende si grouenen mit sinen meesten in dauids stede: ende ioathan sijn soen regneerde ouer hem.

8

Inden acht ende dertichsten iaer sconincs van iuda azarias. so regneerde sacharias iheroboams soen bouen israhel in samarien ses maenden.

9

ende hij dede dat quaet was voerden here alsoe sijn vaders ghedaen hadden. Hij en keerde hem niet van iheroboams nabaths soens sonden: die israhel sondighen dede.

10

Ende zellum iabes soen swoer iegen hem in samarien ende hij sloech hem en doden openbaer: ende hi regneerde ouer hem.

11

Mer tander van sacharias redenen: en sijn si niet bescreuen inden boke der woerden vanden dagen der coningen van israhel?

12

Dit was die redene die de here tot iehu sprac ende seide Dijn sonen van di. sullen totten vierden gheslachte sitten opten throne van israhel. Ende het gesciede also.

13

Sellum iabes soen regneerde inden neghen ende dertichsten iare azarias sconincs van iuda Ende hi regneerde een maent in samarien.

14

Ende manahen gaddi soen quam op van thersa. ende sloech Zellum iabes soen in samarien ende hi sloech hem doot: ende hi regneerde ouer hem.

15

Mer tander van zellum redenen ende sijn besweringhe daer hi verradensse mede dede: en sijn si niet bescreun inden boke der woerden vanden daghen der coninghen van israhel?

16

Doe sloech manahen thapsa ende alle diere binnen waren: ende al haer terminen van thersa. Want sij en wouden hem die poorte niet opdoen Ende hi sloech doot alle die vrouwen die kint binnen drogen: ende hi sneetse op.

17

Inden neghen ende dertichsten iaer azarie des conincs van iuda: so regneerde manahen gaddi soen bouen israhel tien iaer in samarien:

18

ende hi dede dat quaet was voerden here. Hij en keerde hem niet van iheroboams nabaths soens sonden die israhel sondighen dede: binnen sinen daghen.

19

Doe quam phul die coninc van assyrien in thersa: ende manahen gaf phul dusent talenten siluers. om dat hi hem in hulpen sijn soude: ende sijn rike vast maken.

20

Ende manahen settede tsiluer op alle die machtighe van israhel ende die rike. dat sijt den coninc van assyrien geuen souden: elc vijftich sicle siluers. Ende die coninc van assyrien keerde weder: ende hi en duerde in thersa niet.

21

Mer tander van manahens redenen ende al dat hi dede: en sijn si niet bescreuen inden boke der woerden vanden daghe der coninghen van israhel?

22

Ende manahen sliep mit sinen vaders: ende phaceya sijn soen reg-

[p. 508]

neerde ouer hem.

23

Inden vijftichsten iare azarie sconincs van iuda regneerde phaceia manahens soen bouen israhel in samarien twee iaer.

24

ende hi dede dat quaet was voerden here. Hij en keerde hem niet van iheroboam nabaths soens sonden: die israhel sondighen dede.

25

Ende iegen hem swoer phacee romelien soen die maerscalc van sijnen heere. ende hi sloech hem in samarien inden torre van sconincs huse neuen argob ende neuen ariph. ende mit hem vijftich mannen vanden kinderen van galaad ende hi sloech hem doot: ende hij regneerde ouer hem.

26

Mer tander van phaceyen redenen ende al dat hi dede: en sijn si niet berscreuen inden boke der woerden vanden daghen der coningen van israhel? .

27

Inden twee ende twintichsten iaer azarie sconincs van iuda. soe regneerde phacee romelien sone bouen israhel in samarien twintich iaer:

28

ende hi dede dat quaet was voerden here Hi en keerde hem niet van iheroboams nabaths soens sonden: die israhel sondighen dede.

29

In phacee sconincs van israhels daghen quam teglat phalassar die coninc van assur. ende wan shyon ende maacha huys ende ianoe ende cedes. ende asor ende galaad ende galilea ende al neptalims lant: ende hi voerdese ouer in assirien. .

30

Ende ozee hela soen zwoer ende spiede iegen phacee romelien soen: ende hi sloech hem ende dodene: ende regneerde ouer hem inden twintichsten iare ioathans sconincs van iuda ozias soen

31

Mer tander van phacee redenen ende al dat hi dede: en sijn niet bescreuen inden boke der woerden vanden daghen der coninghen van israhel?

32

Inden anderen iare phacee romelien sone sconincs van israhel: regneerde ioathan ozie soen sconincs van iuda.

33

Hij was vijf ende twintich iaer out doe hi begontste te regneren: ende hi regneerde sestien iaer in iherusalem. Sijnre moeder name was iherusa: sadochs dochter.

34

Ende hi dede dat ghenoechlic was voerden here. na al dat ozias sijn vader gedaen hadde so dede hi:

35

mer nochtan soe en dede hi die hoecheden niet af Want noch soe offerde tvolc ende verbrande wieroec inden hoecheden. Hij stichte die alre hoechste poorte van sheren huis.

36

Mer tander van ioathans redenen ende al dat hi dede: en sijn si niet bescreuen inden boke der woerden vanden dagen der coninghen van iuda?

37

In dien daghe soe begonste die here in iudam te senden rasin den coninc van syrien: ende phacee romelien soen.

38

Ende ioathan sliep mit sinen vaders ende hi wort mit hem begrauen in dauids stede sijns vaders: ende achas sijn soen regneerde ouer hem.