Bible in duytsche (Delftse bijbel 1477)

§ Capit .xiiij

1

INden anderen iare ioas ioachas sone sconincs van israhel: so regneerde amasias ioas zoen sconincs zoen van iuda.

2

Hij was vijf ende twintich iaer out doe hi begontste te regneren: ende hi regneerde negen ende twintich iaer in iherusalem. Ende die name sijnre moeder hete ioaden van iherusalem

3

Ende hi dede gherechtelic voerden here: mer niet nochtan als dauid sijn vader. Na al da ioas sijn vader ghedaen had soe dede hi oec:

4

sonder alleen dat. dat hij die hoecheit niet af en dede. Want noch so offerde tvolc ende verbrande wieroec inden hoecheden.

5

Ende doe hi trike behouden hadde so sloech hi sijn knapen doot die den coninc sinen vader ghedoot hadden:

6

mer haer sonen die sinen vader gedoot hadden en dode hi niet: alsoe inden boke van moyses wet ghescreuen is alsoe die here moysen beual ende seide. Die vaders en sullen voer die sonen niet steruen noch die sonen voer die vaders Mer elc sal in sijn sonden steruen

7

Hi sloech edom in die soute valeye thien dusent man: ende hi wan inden strijt een casteel ende hi hete sinen naem iezechel tot in dien daghe.

8

Doe sant amasias sijn boden tot ioas ioachas soen die iehu sconincs van israhels sone was. ende seide. Com ende laet ons dene dander sien.

9

Ende ioas die coninc van israhel sant weder totten coninc van iuda amasiam ende seide. Die stekeldoren van libano sant totter cedren die in libano is. ende seide Gheef dijn dochter minen sone te wiue. Ende die beesten vanden woude ghinghenre ouer ende vertraden den stekeldoren die inden libano is.

10

Staende so hebstu edom gheslegen ende biste te bouen ghebleuen: ende hier om verhief di dijn herte. Laet dij ghenoghen mit dijnre eren: ende sitte in dijn huys. Waer om verporstu ieghen di quaet: om dattu nederuallen sultste ende iudas mitti?

11

Ende amasias en hielter niet af. Ende ioas die coninc van israhel toech op: ende si sagen hem onderlinghe. ende amasias die coninc van iuda was in bethsames een poort van iuda.

12

Ende iudas wort versleghen van israhel ende elc vloe in sijn woninghe.

13

Ende ioas die coninc van israhel vinc in bethsames amasiam ioas soen coninc van iuda die ochosias sone was: ende hi brachten in iherusalem. Ende hi brac die mu-

[p. *506]

re van iherusalem van ephrayms poorte totter horninc poorten. vier hondert cubitus lanc.

14

Ende hi nam al tgout ende al tsiluer ende alle die vaten diemen vant in sheren huys ende in sconincs tresoer ende hi nam ghijsele: ende keerde weder in samarien.

15

Mer dander van ioas redenen ende al dat hij dede ende sine starcheit daer hi mede vacht ieghen amasiam den coninc van iuda: en sijn si niet bescreuen inden boke der woerden vanden daghen der coningaen van israhel?

16

Ende ioas sliep mit sinen vaders ende wort begrauen in samarien mitten coninghen van israhel: ende iheroboam sijn soen regneerde voer hem.

17

Ende amasias ioas soen die coninc van iuda leefde na dat ioas ioachas soen die coninc van israhel doot was. vijf ende twintich iaer.

18

Mer tander van amasias redenen: en sijn si niet bescreuen inden boke der woerden vanden daghen der coningen van iuda?

19

Ende iegen hem wort een besweringe in iherusalem: mer hi vloe in lachis. Ende si sonden hem na in lachis ende daer slogen si hem doot:

20

ende si voerden hem wech mit paerden: ende hi is begrauen in iherusalem mit sinen vaders in dauids stede.

21

Ende al tvolc van iuda nam azariam die sestien iaer out was: ende si makeden coninc voer amasiam sinen vader.

22

Hi stichte ahylam. ende hi ghecreechse weder te iudas lande nae dien dattie coninc mit sinen vaderen sliep.

23

Inden vijftiensten iaer amasias ioas soen sconincs van iuda: soe regneerde iheroboam ioas soen sconincs van israhel in samarien een ende veertich iaer:

24

ende hi dede dat quaet was voer den here. Hi en ghinc niet af van al iheroboams nabaths soens sonden: die israhel sondighen dede.

25

Hij ghecreech weder israhels termine vanden inganghe van emath totter zee vander wildernissen: na sheren gods van israhels woert dat hi sprac bi sinen kechte ionam den propheet amathi soen: die van geth was die in opher is.

26

Want die here sach israhels vernoy dattet alte bitter was: ende dat si verderft waren totten ghenen die in kerkers laghen besloten ende totten achtersten: ende dat niemant en was die israhel halp.

27

Ende die here en had niet gheseit dat hij israhels name afdoen soude van onder den hemele: mer hi verlossedse in iheroboams ioas soens hant.

28

Mer tander van iheroboams redenen ende al dat hi dede: ende sine starcheit daer hi mede vacht. ende hoe hi weder ghecreechte iuda ende israhel damascum ende emath: en sijn si niet bescreuen inden boken der woerden vanden dagen der coningen van israhel?

29

Ende iheroboam sliep mit zinen vaders coninghen van israhel: ende zacharias sijn soen regneerde ouer hem