Bible in duytsche (Delftse bijbel 1477)

§ Capittel .xiij

1

INden drie en twintichtsten iare ioas ochosias soen sconincs van iuda. regneerde ioachas iehu sone bouen israhel in samarien seuentien iaer.

2

ende hi dede quaet voerden here. Ende hi volgede iheroboams nabaths soens sonden die israhel sondighen dede: ende hi en keerder hem niet af.

3

Ende sheren toern wort vergramt ieghen israhel: ende hi leuerdese in asahels sconincs van syrien hant ende in benadab azahels soens hant tallen daghen.

4

Ende ioachas bat sheren aensichte: ende die here hoerde hem Want hi ansach israhels vernoye. datse die coninc van syrien tonderghe-

[p. *504]

daen had.

5

Ende die here gaf israhel enen verlosser: ende hi wort verlost van sconincs hant van syrien: ende die kinder van israhel woenden in haer woninghen also si ghisteren ende eerghisteren daden.

6

Mer nochtan en ginghen si niet van iheroboams huys sonden die israhel sondighen dede: mer si wanderdenre in. Want die bussche bleef in samarien:

7

ende ioachas en bleuen vanden volke mer vijftich ridders ende thien waghenen ende tien dusent man te voete. Want die coninc van syrien hadse dootghesleghen: ende hadse al te ghemul ghemaect alst puluere opten dorsche voloer blijft.

8

Mer tander van ioachas woerden ende al dat hi dede ende sijn starcheit: en sijn niet bescreuen inden boke der woerden vanden daghen der coninghen van iuda?

9

Ende ioachas sliep mit sinen vaders. ende si begrouen in samarien: ende ioas sijn soen regneerde over hem.

10

Inden seuen ende dertichsten iare ioas sconincs van iuda regneerde ioas ioachas soen bouen israhel in samarien sestien iaer:

11

ende hi dede dat quaet was in sheren aenscouwen Ende hij en keerde hem eiet van alle iheroboams nabaths soens sonden die israhel sondigen dede: mer daer in wanderde hi.

12

Mer tander van ioas redenen ende al dat hi dede: ende sijn starcheit oec hoe hij vacht ieghen amasyam die coninc van iuda. en sijn si niet bescreuen inden boke der woerden vanden daghen der coningen van israhel?

13

Ende ioas sliep mit sinen vaders. Ende is begrauen in samarien mitten coninghen: ende ieroboam sijn soen sat opten throen

14

Helizeus lach siec vander siecheit daer hi of starf. Ende ioas die coninc van israhel. ghinc neder tot hem ende weende voer hem: ende seide vader mijn vader mijn: israhels wagen ende sijn waghenmenre.

15

Ende helizeus seide hem. Brengt enen boghe ende gescutten. Ende doe hi tot hem enen boge ghebracht hadde ende gescutten:

16

so seide hi totten coninc van israhel. Leg dijn hant opten boge. Ende doe die coninc sijn hant daer op geleit hadde: soe leide helizeus sijn hant op sconincs handen:

17

ende seide. Doch op die venster oestwaerts. Ende doe hijse opgedaen hadde so seide helizeus. Schiet enen gescutte. Ende hi schoet. Ende helizeus seide Dats tgescut van sheren salicheit: ende tghescut der salicheit ieghen syrien. Ende du sultste syrien verslaen in aphec tot dattuut verderft hebste.

18

Ende helizeus seide. Hael die gescutten. Ende doe hijse gebracht hade: so seide hem helizeus echter. Slach die aerde mit enen gescutte. ende doe hijse drieweruen geslegen hadde ende hi bleef staende:

19

so wort die man gods iegen hem gram: ende seide. Hadstu die aerde vijfweruen of ses weruen of seuenwerf geslegen: soe soutstu syrien altemael versleghen hebben. Mer nu sultstu hem drieweruen slaen

20

Ende helizeus starf: ende si begrouen hem. Binnen dien seluen iaer so quamen rouers van moab in tlant.

21

Ende enighe luden die enen man begrauen souden si saghen die rouers: ende worpen den doden cor-

[p. *505]

re in helizeus gracht. Ende doe hi helizeus beenre gheraecte so wort hi weder leuende. ende stont op sijn voeten

22

Ende aldus hielt asahel die coninc van sirien israhel tonder: al ioachas daghen

23

Ende die here ontfermde haers: ende hi wort te hem waert bekeert om sijn beloften wil die hi gedaen had tot abraham ysaac ende iacob: ende hi en woudse niet altemael verderuen noch verdriuen tot in deser tijt.

24

Ende asahel die coninc van syrien starf: ende benadab sijn soen regneerde ouer hem.

25

Ende ioas ioachas soen hi nam die poorten van benadabs hant azahels soen die hij ghewonnen hadde van ioachas hant sijns vaders: met rechte van stride. Ende ioas sloech hem driewaruen: ende hi gaf israhel die steden weder