Bible in duytsche (Delftse bijbel 1477)

§ Capittel xii

1

INden seuenden iaer van iehu soe regneerde ioas. Ende hij regneerde veertich iaer in iherusalem: ende sijnre moeder name was sebia van barsabee.

2

Ende ioas dede wel voerden here. tallen daghen datten ioiada die pape leerde:

3

mer nochtan die hoechede en dede hi niet af. Want tvolc offerde ende verbrande noch wieroec inden hoecheden

4

Ende die coninc ioas seide totten papen. Alle der heilighen ghelt datmen in sheren tempel brenghen sal vanden ghenen diere voer liden sullen ende dat men ouer die loen der sielen sende ende dat si al willens ende bij haers herten vrien wille brengen in sheren tempel.

5

dat sullen die papen ontfaen bi haren ordinancie: ende si vermaken dat in sheren huys te vermaken is so wat si sien sullen dat vermaken te doen heeft.

6

Ende totten drie ende twintichsten iaer ioas sconincs soen vermaecten die papen niet. dat anden tempel te vermaken was

7

Ende die coninc ioas riep ioiada den bisscop ende die papen: ende seide hem Waerom en vermaecti niet dat inden tempel te vermaken is? Daer om en ontfaet niet meer tgelt bi uwen ordinancien: mer gheuet weder. om den tempel te vermaken.

8

Ende hi verboet den papen dat si niet meer ghelt ontfaen en souden vanden volcke: ende te vermaken dat an thuys te vermaken was.

9

Ende ioiada die bisscop nam een scrine: ende hi maecter een gat bouen: ende

[p. *503]

hi settet neuen den outare ter rechterziden also die luden inquamen in sheren huys: ende die papen die de dore wachten worpen daer in al tghelt dat men tot sheren tempel brachte.

10

Ende doe si saghen dat alte veel gelts was in die scrine. so quam sconincs cancelier op ende die bisscop. ende stortent wt ende telden tghelt datmen vant in sheren huys:

11

ende si gauent bi ghetale ende bi maten in haren handen den ghenen die bouen den metsers van sheren huys waren. Ende si gauent wt. den tymmerluden ende den metsers ende die wrachten in sheren huys. ende die vermaecten dat te vermaken was:

12

ende die ghene die stene hiewen. ende om dat si copen souden houten ende stene diemen hiewe: soe datmen volmaken soude al dat an thuys te vermaken was.

13

Mer nochtan so en maectemen niet die cannen van sheren tempel van desen gelde noch die trauwels noch die wieroecuaten noch die trompetten. noch men en maecte ne ghene gulden noch silueren vaten : vanden ghelde datmen in sheren huys brachte.

14

Want men gaft den ghenen die twerc maecten: om datmen sheren tempel vermaken soude.

15

Ende men dede den mannen ne ghene rekeninghe die tghelt ontfinghen om den wercluden te gheuen: mer si gauent wt met haren sekerheit.

16

Mer tghelt datmen brachte in sheren tempel ouer die misdaet. ende ouer die sonde: dat was der papen.

17

Doe toech op asahel die coninc van syrien ende vacht ieghen geth: ende hi want. Ende hi keerde sijn aensicht om te iherusalem waert te trecken.

18

Ende om dese sake soe nam ioas die coninc van iuda al dat gheheilicht was dat iosapaht ende ioram ende ochosias sine vaderen die coningen van iuda verghift hadden: ende die hi gheoffert hadde. ende al tsiluer datmen vinden mochte in die tresoren van sheren tempel. ende in tsconincs palays: ende hi santet asahel den coninc van syrien: ende hi toech wech van iherusalem.

19

Mer dat anderde van ioas redenen ende al dat hi dede: en sijn sij niet bescreuen inden boken der woerden vanden daghen der coninghen van iuda?

20

Ende sijn knapen stonden op ende swoeren onderlinghe: ende si sloghen ioas int huys vander passadien inder nederganc van sela

21

Want iosachar semaths soen ende iosabath somers sone sijn knapen sloghen hem: ende hij is doot. Ende si grouen mit sinen vaders in dauids stede. ende amasias sijn soen regneerde ouer hem