Bible in duytsche (Delftse bijbel 1477)

§ Ca .xi

1

AThalia ochosias moeder doe si sach dat haer soen doot was: so stont si op ende dode al dat coniclike saet.

2

Mer iosaba iorams sconincs dochter. ochosias suster. nam ioas ochosias soen. ende si stallen van midden sconincs sonen diemen dootsloech ende sijnre voetster vander binnenster cameren: ende si verbarch hem van athalien aensichte datmen niet doden en soude:

3

ende hi was mit haer al heimelic in sheren huys ses iaren. Mer athalia regneerde bouen tlant seuen iaer.

4

Ende inden seuenden iare sant ioiada ende hi nam mit hem die hondert heren ende die ridders ende leydse in tot hem inden tempel des heren: ende hij sloech mit hem belofte. Ende hi beswoerse in sheren tempel ende toende hem sconincs zoen:

5

ende hi beual hem ende seide. Dit is die redene die ghi doen sult Dat ene derdendele van v luden sal en saterdaghe incomen: ende die sal bewaren die wachten van sconincs huse

6

Ende tander derden deel sal sijn ter poorten seyr: ende terde derdendeel sal sijn ter poorten die is achter die scildenaren woninge: ende die bewaren die wachten vanden huse messa.

7

Mer die twe pertien van v luden. alle die in saterdage wtgaen. sullen bewaren die wachte van sheren huys omtrent den coninc

8

ende ghi sult omtrent hem staen ende sult wapenen in v hande hebben. Ende so wie dat binnen den inganghe van den tempel comen sal: die salmen doden. Ende ghi sult mitten coninc wesen ingaende ende wtgaende.

9

Ende die hondert heeren deden na al dat hem ioiada die pape beuolen hadde. Ende si namen yghelic hoer mannen die inden saterdaghe wtghinghen mitten genen die in dien saterdach inghinghen: ende quamen tot ioiada den priester.

10

Ende hi gaf hem dauid sconincs speren ende wapenen: die in sheren huys waren.

11

Ende elc stonden ende hadden wapenen in haer hant ter rechterziden vanden tempel totter luchterziden vanden outare ende vanden huse: omtrent den coninc.

12

Ende ioiada brachte sconincs soen voert: ende hi sette op hem die crone ende die oercontscap. ende si maecten hem coninc ende consacreerden: ende si sloghen handen te gadere ende seiden. Die coninc moet le-

[p. *502]

ven.

13

Ende doe athalia hoerde die stemme vanden volcke dat liep: so quam si in totter scaren van sheren tempel.

14

ende sach die coninc staen op die dinge trone nae costume. ende die canters ende die scaren neuen hem. ende al tvolc vanden lande verblidende ende trompende mitten trompen: ende si scoerde haer clederen ende riep. Besweringhe. besweringhe.

15

Ende ioiada beual den hondert heren die bouen theere waren: ende seide hem. Leytse buyten den omvange vanden tempel: ende wie dat haer volghen sal: sla mitten swaerde. Want die priester had geseit dat mense niet doden en soude inden tempel.

16

Ende si sloghen die hande an haer ende si hurtense wt. doer den wech aldaer die paerden in quamen neuen tpalais: ende daer sloechmense doot.

17

Dus sloech ioiada belofte tusschen den here ende den coninc ende tvolc. dattet sheren volc wesen soude tusschen den coninc ende tusschen tvolc.

18

Ende al tvolc vanden lande ghinc in baals tempel vanden lande. ende sloech sijn outaer ontween: ende braken vromelike sijn beelden: ende mathan baals pape sloghen sij doot voerden outaer. Ende die pape leide hoeden in sheren huys

19

ende hi nam die hondert heren ende die scaren serethi ende pheleti ende al tvolc vanden lande: ende si leiden den coninc wt sheren huys. Ende si quamen doer die schildenaere poorte in tpalays: ende hij sat opter coninghen trone

20

Ende al tvolc vanden lande verblide: ende die stat gherustede. Mer athalia was dootgeslegen int sconincs huys mitten zwaerde

21

Ioas was seuen iaer out doen hi begontste te regneren