Bible in duytsche (Delftse bijbel 1477)

§ Capittel x

1

AChab had in samarien tseuentich sonen. Hier om screef iehu litteren: ende santse in samarien totten voerbaersten vander stat ende totten meeste van gheboerten ende tot achabs voestere here ende seide

2

Te hant als gi dese lettere ontfaen hebt die uwes heren sonen hebt ende waghenen ende peerden ende die vaste steden ende die wapenen:

3

kiest den besten ende den ghenen die v ghenogen sal van uwes heren sonen. dien settet op sijns vader troen: ende vecht ouer uwes heren huys

4

Ende die van samarien ontsaghen hem anxtelike seer: ende seiden. Siet twee coninghen en moghen voer hem niet staen. hoe sullen wi hem wederstaen?

5

Ende die prouoest vanden huyse ende die voerbarichste vander stede ende die meeste van gheboerten ende die voestere heren senden tot iehu: ende seiden. Wi sijn dijn knechten: ende soe wat dattu ons beueelste dat sulleu wi doen: noch wi en sullen ons ne genen coninc setten. Doch so wat dattu wilste.

6

Ende iehu screef anderwarf letteren ende seide. Of ghi mijn knechten sijt ende ghi mij ghehoersaem sijt: so brenct die hoofden van uwes heren tseuentich sonen: ende coem te mi in dese selue vre morgen in iesrahel. Want achab sconincs sonen waren tseuentich mannen ende men voedse mitten voerbarichsten vander stede

7

Ende doe die letteren te hem gecomen waren: so namen si sconincs sonen ende slogen se doot tseuentich mannen: ende si leiden haer hoofden in coffers ende sendense tot iehu in iesrahel.

8

Ende een bode quam tot hem: ende boetscaptet hem segghende. Si hebben sconincs sonen hoefden ghebracht. Hi antwoerde. Legtse tot twee hopen neuen den inganc vander poorten tot morghen.

9

Ende doet dach geworden was so ghinc iehu wt: ende hi stont ende seide tot alden volke. Ghi sijt gherechtich. Of ic ghesworen heb ieghen minen here ende ic hem ghedoot hebbe: wie heeft alle dese versleghen?

10

Nu besiet dat niet van sheren woerden in die aerde geuallen en is die die here ghesproken heeft op achabs huys: ende die here heeft gedaen dat hi ghesproken heeft in helyas sijns knechts hant.

11

Dus sloech iehu al die ghene die van achabs huys ouerbleuen waren in iesrahel. ende al sijn voerbarighe ende sijn vrienden ende sijn papen: soe langhe dat van hem luden nyemant ouer en bleef.

12

Ende iehu sont op: ende quam in samarien ende doe hi gecomen was inder herden camere inden wech.

13

soe vant hi ochozias sconincs van iuda bruederen: ende hi seide tot hem. Wie sijdi Ende si antwoerden. Wi sijn ochosias bruederen: ende wi comeu neder om te grueten sconincs sonen ende der coninghinnen sonen.

14

Ende iehu seide. Begrijptse leuende. Ende doe sijse leuende begrepen hadden: soe sloghen sijse doot. in enen putte neuen die camer twee ende veertich man: ende hi en liet nyemant van hem luden leuende

15

Ende doe iehu van daer wech gheuaren was so quam ionadab rechabs so-

[p. *500]

ne in sijn ghemoete: ende hi ghebenedide iehu. Ende iehu seide tot hem Is dijn herte recht mit mijnre herten also mijn herte is mit dijnre herten. Ende ionadab seide. Iaet. Ofte het is seide iehu: soe ghif mi dijn hant Ende hi gaf hem sijn hant. Ende iehu hief hem op sijnen wagen:

16

ende seide tot hem Coem mit mi: ende besich minen toren die ic om den here heb. Ende hi setteden op sijnen waghen

17

ende voerden in samarien. Ende hi sloech alle die ouerbleuen waren van achab in samarien al tot enen: na sheren woert dat hi bi helyam ghesproken hadde.

18

Ende iehu vergaderde alt volc: ende seide tot hem Achab oeffende baal luttel: mer ic sallen meer oeffenen.

19

Daer om vergadert nv te mij al baals propheten. ende al sijn knechten: ende alle sijn papen Niemant en si hi en come. Want nv is mi ene grote sacrificie an baal. Soe wie datter ghebreken sal hi en sal niet leuen. Mer iehu dede dit bi verradenisse: om dat hi baals oeffenaren doden soude. Ende hi seide.

20

Heylicht baal enen feesteliken dach.

21

Ende hij riep ende sant binnen alle den terminen van israhel: ende alle baals knapen quamen. Ende tot ene en bleeffer niet ouer: die niet en quam. Ende si ghingen in baals tempel. Ende baals huys wort veruolt: van bouen tot beneden

22

Ende iehu seide den ghenen die bouen den clederen waren Brenct alle baals knapen clederen voert. Ende si voertbrachten hem die clederen.

23

Ende iehu ende ionadab rechabs soen ghingen in baals tempel: ende iehu seide tot baals oeffenaers Ondersoect ende besiet: dat onder v nyemant en si van sheren knechten: mer dat hier allene baals knechten sijn.

24

Ende si ghinghen in om victime ende holocauste te doen: ende iehu hadde daer buten bereet tachtich mannen: ende hi had hem gheseit. So wie dat ontvlien sal van alle dese menschen die ic in uwen handen leveren sal: sijn siele sal wesen voer des geens ziele dier ontuliet.

25

Ende het gesciede doe si holocauste ghedaen hadden: soe beual iehu sinen princen ende ridders Gaet in ende slaetse doot Ende nyemant van hem en ontgae. Ende si sloghen se in swaerts mont ende die princen ende die ridders worpense in enen putte neuen den tempel. Ende tvolc ginc in die stede in baals tempel:

26

ende sloghen baals beelden ontween ende brachtense wt baals tempel ende verbrandense

27

ende brakense in cleynen stucken. ende sij braken baals tempel: ende si maectenre cleine stillecameren of tot in desen dage

28

Dus dede iehu baal af wt israhel:

29

mer nochtant en ghinc hi niet af van iheroboams nabaths soens sonden die israhel sondighen dede: ende hi en liet die gulden calueren niet die waren in bethel ende in dan.

30

Ende die here seide tot iehu. Om dattu naerstelijc gedaen hebste dat gherechtelic was ende ghenoechtelic in minen oghen. Ende al dat in mijn herte was hebstu ghedaen iegen achabs huys: so sullen dijn sonen totten vierden geslachte sitten opten trone van israhel.

31

Mer iehu en wachte hem niet dat hi wanderde in sheren

[p. *501]

gods van israhels wet in alle sijn herte. Want hi en ghinc niet af van iheroboams sonden. die israhel sondigen dede.

32

In sinen daghen begontste den here te verdrieten bouen israhel. Ende asahel die coninc van syrien versloech hem binnen al den terminen van israhel:

33

vander iordanen ieghen die oestzide al tlant van galaad. ende van gad. ende van ruben. ende manasse. ende van aroer die optie vluet van arnon is ende galaad ende basan.

34

Mer dander van ieheu woerden ende alle dat hij dede ende sijn starcheit: en sijn si niet bescreuen inden boke der woerden vanden daghen der coninghen van israhel?

35

Ende iehu sliep mit sinen vaders: ende si grouen in samarien: ende iochas sijn soen regneerde ouer hem.

36

ende die dagen dat iehu regneerde bouen israhel in samarien waren. acht ende twintich iaer