Bible in duytsche (Delftse bijbel 1477)

§ Capittel ix.

1

HElizeus die propheet riep enen vanden propheten sonen: ende seide hem. Gorde dijn lendenen toe ende neem dit vaetkijn olye in dijn hant ende ganc in ramoth van galaad.

2

Ende alstu daer gecomen biste: so sultstu sien iheu iosaphats soen die namsi sone was. Ende du sultste daer ingaen ende verwecken hem van midden sinen bruederen ende du sultsten leiden in die binnenste camer:

3

ende du sultste houden tvaetken mitter olyen ende stortent op sijn hooft: ende segghen. dit seit die here. Ic hebbe di ghesaluet coninc bouen israhel. Ende du sultste die doren op doen ende vlien: ende daer niet letten.

4

Dus ginc die ionghelinc wech des propheten kint in ramoth van galaad:

5

ende hi quam daer in. Ende siet die princen vanden heeren saten. Ende hi seide. O prince ic heb sheren woert an di. Ende iheu

[p. *497]

seide. An wien van ons allen? Ende hij seide. Aen die o prince.

6

Ende iheu stont op: ende ghinc in een camer. Ende die iongelinc storte die olye op sijn hoeft Ende seide. Dit seit die here god van israhel. Ic heb di gesalft coninc op sheren volc van israhel:

7

ende du sultste achabs dijns heren huys slaen. Ende ic sal worden ghewroken ouer al mijnre knechten der propheten bluet: ende ouer tbluet alre gods knechten van iesabels hant

8

ende ic sal al achabs huys verliesen. Ende ic sal doden achabs huse van die ter wantwaert seict: ende die ghesloten ende den achtersten in sirahel

9

Ende ic sal achabs huys geuen als iheroboams nabaths soens huys ende als baasa huys achya soen.

10

Ende die honden sullen iesabel eten in die acker van iesrahel: ende nyemant en sal wesen diese begrauen sal. Ende hi ondede die dore ende hi vloe wech.

11

Ende ieheu quam voert tot sijns heren knapen. Ende sij seiden hem. Sijn alle dinghen gerechtelijc? Wat quam dese sot totti? Ende hi seide hem Ghi kent den man: ende dat hi gesproken heeft?

12

Het is valsch. mer bet segt ons. Ende hi seide hem. Dit ende dit heeft hi mi ghesproken. ende gheseit. Dit seit die here. Ic heb di coninc ghesaluet bouen israhel

13

Ende hier om haesten si hem: ende elc nam sinen mantele ende leidene onder sine voeten in die gelikenisse datmen voer die vonnisse zetele duet: ende si luden mit trompen ende seiden. Iheu sal regneren.

14

Dus swoer iheu iosaphats soen die namsi sone was ieghen ioram. Want ioram had omleit ramoth van galaad. hi ende al israhel ieghen asahel den coninc van syrien:

15

ende hi was wederghekeert datmen ghenesen soude in iesrahel om die wonden: want die van syrien haddenen ghewont doen hi vacht ieghen asahel den coninc van syrien Ende ieheu seide Duncket v guet so en ontvlie nyeman vter stede: die gaet ende boetscappe in iesrahel.

16

Ende ieheu toech op: ende tide in iesrahel. want ioram was daer sieck: ende ochosias die coninc van iuda was neder getoghen om hem te visiteren.

17

Ende een wachter die doe stont op enen toerne voer iesrahel: hi sach ieheu hoop die quam. Ende seide. Ic sie een hoop. Ende ioram seide Neem enen waghen: ende senden in haer gemoet. ende die gene die daer gaet hi sal seggen. Sijn alle dingen te punte?

18

Ende die opten wagen was geseten hi ginc wech in haer gemoet. Ende seide. Dit seit die coninc. Ist al gepaeyst? Ende iheu seide. Wat hebtstu te doen mitten payse? Com ouer ende volch mi. Ende die wachter boetscaptet ende seide. Die bode is tot hem ghecomen: ende hi en keert niet weder.

19

Ende die coninc sant anderweruen een wagen mit paerden: ende hi quam tot hem: ende seide. Dit seit die coninc. Ist paeys? Ende iheu seide. Wat hebstu mitten paeyse te doen? Com ouer ende volch mi.

20

Ende die wachter boetscaptet ende seide. Hi is tot hem gecomen: ende hi en keert niet weder Want sijn ganc is gelijc iheu namsi soen gange. Want hi gaet bockende.

21

Ende ioram seide. Ghereit enen wa-

[p. *498]

ghen. Ende si ghereiden enen wagen. Ende ioram die coninc van israhel ginc op sinen waghen sitten. Ende ochosias die coninc van iuda sat op sinen waghen. Ende si voeren wt iehu gemoet: ende si vonden hem in naboths van iesrahels ackere.

22

Ende doe ioram iehu gesien had: soe seide hi. Iehu ist paeis? Ende hi antwoerde. Wat paeyse? Want noch groyen iesabels dijnre moeder onkuyscheden. ende vele haerre touerien

23

Ende iehu keerde sijn hant om: ende vliende soe seide hi tot ochosias. Ochosia verradenisse verradensse.

24

Ende iehu spande mitter hant sinen boghe: ende hi scoet ioram tusschen sinen scouderen. ende tghescutte quam wt tot sijnre herten: ende te hant viel hi in sinen wagen

25

Ende iehu seide tot badacher den maerscalc. nemen ende werpen of in naboths acker van iesrahel. Want ic ghedencke doe ic ende ghi saten op enen waghen ende wi achab dese iorams vader volgheden dat die here dit last op hem hief ende seide.

26

Ofte ic niet om naboths bluet. ende om sijnre sonen bluet dat ic gisteren sach seit die here: di geuen sal in desen acker seide die here. Daer om nemen nv ende werpen af in naboths ackere: na sheren woert.

27

Ende ochosias die coninc van iuda doe hij dit sach so vloe hi alden wech van thuus des hofs: ende iehu volghede hem na: ende seide. Dese slaet oec op sinen wagen. Ende si slogen hem inden opganc van gaber: die neuen ieblaam is. Ende hij uloe in mageddo: ende starf daer.

28

Ende sijn knapen leidenen op sijn waghen ende si voerdenen in iherusalem: ende si grouen in enen graue mit sinen vaders in dauids stede.

29

Inden elften iaer iorams achabs soen sconincs van israhel regneerde ochosias bouen iudam:

30

ende iehu quam in iesrahel. End doe iesabel hoerde dat iehu in israhel gecomen was so blancketse haer ogen met blanckette. ende sij maecte haer hooft behagel: ende si sach doer een venster

31

iehu incomende doer die poorte: ende sij seide Sal paeys mogen wesen zamri. die sinen here dootsloech?

32

Ende iehu hief sijn aensichte op ter vensteren waert ende seide. Wie is dat? Ende twee of drie ghelubde camerlinghen nygheden hem tot iehu waert: ende seiden. Dat is iesabel.

33

Ende hi seide tot hem. Werpt se nederwaert of. Ende si worpense neder. Ende die want wort besprayt mit haren bluede: ende die paerden houen vertraden haer.

34

Ende doe iehu inghecomen was om te eten ende om te drincken so seide hi. Gaet ende besiet die vermaledide ende begraeftse: want si is eens sconincs dochter.

35

Ende doe si gegaen waren om dat sijse grauen souden: so en vonden sijse niet sonder therssebecken ende die voeten ende tbouenste vanden handen.

36

Ende sij keerden weder ende seident hem. Ende iehu seide Het is sheren woert dat hi ghesproken heeft bi helyam sinen knechte van thesbi ende seide. Die honden sullen iesabels vleysch eten inden ackere van iesrahel.

37

Ende iesabels vleysch sal wesen als missche opt aensichte vanden lande inden acker van iesrahel: so

[p. *499]

dattie gene diere liden. sullen seggen. Is dit iesabel