Bible in duytsche (Delftse bijbel 1477)

§ Ca .vij

1

HElizeus seide: hoert sheren woert. Dit seit die here Morghen in desen tide. sal binnen der poorte van semarien wesen een modeken blomen om enen stoter ende twee modeken ghersten om enen stoter.

2

Ende enen vanden leidsmannen op wiens hant den coninc leende antwoerde. den gods man ende seide. Al dade oec die here. die wolken des hemels tarwe regenen salt moghen gheschien dattu segste? Hi seide. Du sultstet sien mit dinen oghen: ende du en sultster niet af eten.

3

Ende vier lazarsche mannen waren neuen den inganc vander stat: ende si seiden onderlinge. Wat willen wi hier sijn tot dat wi steruen?

4

Weder wi in die poort gaen willen. ofte bliuen wi hier: wi sullen steruen. Daer om coemt ende laet ons ouerulien ten getelden van syrien. Sparen si ons so sullen wi leuen: mer willen si ons doden: soe sullen wi oec steruen.

5

Dus stonden si tsauonts op: ende quamen ten ghetelden van syrien Ende doen si quamen ten beginne vanden ghetelden van syrien. So vonden si daer nyemant.

6

Want die here hadde doen horen een gheluut van paerden ende van waghenen: ende van enen groten heere inden ghetelden van syrien. Ende die van syrien seiden onderlinghe. Siet die coninc van israhel heeft ieghen ons ghehuert om gelt die coninc van getheen ende van egipten: ende si sijn op ons ghecomen.

7

Hier om stonden si op ende vloghen in dien nachte: ende si lieten die tenten ende haer paerden ende die malen ende die ezels inden ghetelden: ende

[p. *494]

si vloghen. ende begheerden alle haer zielen te lossen.

8

Doe die lazersche dus ghecomen waren totten beginsele vanden ghetelden so ghingen si in een tente. ende aten ende droncken ende droghen van daer gout ende siluer ende clederen: ende ghinghen wech ende hoedent Ende si keerden weder tot eenre ander tenten: ende si droghent oec van daer ende si hoedent.

9

Ende si seiden onderlinghe. Wi en doen niet rechte. Want dits een dagh van groter boetscappen Want swighen wi ende willens niet boetscappen voer morghen: soe salmen ons vander misdaet calengieren. Coemt ende laet ons gaen: ende boetscappen wijt in sconincs sale.

10

Ende doe si ghecomen waren ter poorten vander steden: soe vertelden sijt hem ende seiden. Wij ghinghen ten ghetelden van syrien ende wi en vonden daer ne ghene mensche sonder paerden ende ezels gebonden: ende die tenten staende.

11

Ende die poortwachters ghinghen: ende boetscaptent binnen in sconincs sale.

12

Ende die coninc stont op bi nachte: ende seide tot sinen knapen. Ic segt v wat al die van syrien eens hebben ghedaen. Si weten dat wi ghepijnt sijn van hongher: hier om sijn si ghetoghen vten getelden: ende si scuylen in die ackers ende segghen. Als si vter steden trecken sullen so zullen wijse leuende vaen: ende dan sullen wi in die stat trecken moghen.

13

Ende enen van sinen knapen antwoerde. Nemen wij die vijf paerden die binnen der poorten ghebleuen sijn want die sijn alle die menichte van israhel: want die ander sijn verteert: ende senden wi wt so sullen wijt moghen bespien.

14

Ende si brachten twee paarden ende die coinc sant in dier van syrien getelde ende seide. Gaet ende bespietse.

15

Ende si ghinghen na die van syrien totter iordanen. Ende sich alle die wech lach vol clederen ende vol vaten: dien die van syrien wech worpen doe si verstoert worden. Ende die boden quamen weder ende seident den coninc.

16

Ende tvolc toech wt ende roefden die van syrien ghetelden: ende men cochte een modekijn blomen om enen stoter ende twee modekijn ghersten om enen stoter: na sheren woert.

17

Ende die coninc sette die prince op wiens hant hij gheleent hadde ter poorten vander stede: ende die scare vertraden inden inganc vander poerte ende hi is daer doot: nae dat die gods man ghesproken had doe die coninc tot hem ghecomen was.

18

Ende het geschiede na des gods mans redene. die hi den coninc gheseit hadde doe hi sprac: twee modeken ghersten sullen wesen om enen stoter. ende een modekijn blomen om enen stoter te deser seluer tijt morghen binnen der poorte van samarien:

19

doe die prince gheantwoert had den gods man ende seide. ofte die here dade oec die wolcken des hemels meel reghenen salt gheschien moghen dattu segste: ende die gods man seide du sultstet sien mit dinen oghen: ende du en sultster niet af eten.

20

Ende het geschiede hem alsoet hem voerseit was: ende tvolc vertraden hem in die poort ende hi bleef doot