Bible in duytsche (Delftse bijbel 1477)

§ Capittel .vi

1

ENde der propheten sonen seiden tot helizeum. Sich dese stat daer wi in wonen voer di: is ons nauwe.

2

Gae wi totter iordanen ende elc hale vten bussche houte: dat wij ons daer een stat stichten moghen om te wonen. Ende hi seide hem. Gaet.

3

Ende een van hem luden seide. Com du met dinen knechten. Hi antwoerde. Ic sal comen.

4

Ende hi ghinc mit hem. Ende doe si ter iordanen ghecomen waren: so hiewen si houten.

5

Ende het gesciede: doe die een hout hiewe. dat tyser vander aex int water viel. Ende hi riep ende seide. Ay mi ay mi ay mi here mijn: ende dit selue heb ic ontleent.

6

Ende die gods man seide. Waer vielt? Ende hi thoende hem die stat. Ende helizeus hiewe een hout af: ende warpt daer in. Ende tyser vlote

7

Ende hi seide. Neemt. Ende hij stac sijn hant wt: ende hi namt.

8

Ende die coninc van syrien vacht ieghen israhel ende hi had raet mit sinen knapen ende hi seide. In die stat ende in die stat. sullen wi laghen legghen.

9

Ende hier om sant die gods man totten coninc van is-

[p. *492]

rahel ende seide. Wachte di dattu niet en lijtste doer die stat: want daer sijn laghen van die van syrien.

10

Ende hier om sant die coninc van israhel te dier stat die de gods man hem gheseit had ende omleidse: ende hielt daer niet een warf of twee warf.

11

Ende scoinncs herte van syrien wort ghestoert om dese dinc: ende hi vergaderde sijn knapen ende seide. Waer om en seg di mi niet wie mijn verrader is voerden coninc van israhel?

12

Ende een van sinen knapen seide. Nene niet coninc here mijn: die prophete helizeus die in israhel is hi seit die coninc van israhel alle die woerden die du spreecste in belokenen doren.:.

13

hi seide hem Gaet ende siet waer hij is: ende ic salre senden ende ic sallen vaen. Ende si boetscapten hem ende seiden Sich hi woent in dothaim.

14

Daer om sant die coninc van syrien darwaert waghenen ende paerden: ende die crachte van sinen heere. Ende doe si bi nachte gecomen waren. soe omleiden si die stat

15

Ende des gods mans dienre stont vroech op ende ginc wt: ende sach al theere al om en tomme die stat ende die paerden ende die waghenen. Ende hi boetscaptet hem ende seide. Ay mi ay mi ay mi here mijn wat sullen wi doen?

16

Ende helizeus antwoerde. En wil niet ontsien. Want het isser meer mit ons: dan mit hem.

17

Ende doe helizeus ghebeet hadde soe seide hi Here: ondoet des kints ogen dattet sien mach. En die here ondede des kints oghen: ende het sach: ende sich die berch al om en tomme helizeo. was vol vyerighe paerden ende waghenen.

18

Ende die vianden quamen neder te hem Ende helizeus bedede totten here ende seide. Ic bidde dattu dese luden slaetste mit blintheden. Ende die here sloechse soe dat si niet en kenden: nae helizeus woert.

19

Ende helizeus seide tot hem. Dit en is die wech niet: dit en is die stede niet. Volghet mi: ende ic sal di den man toghen dien ghi soect. Ende hi leide se binnen samaeien.

20

Ende doe si binen samarien ghecomen waren: so seide helizeus Here: ondoet deser luden oghen dat sij sien wogen. Ende die here ondede haer oghen: ende si saghen dat si in midden samarien waren.

21

Ende die coninc van israhel seide tot helizeum. doe hijse gesien hadde. Vader mijn sal icse slaen?

22

Ende hi seide. Du en sultstese niet slaen Want du en hebtstese niet geuaen mit dinen zwaerde ende mit dinen boge: soe dattuse slaen sultste. Mer sette voer hem broot ende water. dat si eten moghen ende drincken: ende tot haren here weder gaen

23

Ende men leide hem voer een groot bereiden van spisen: ende si aten ende droncken: ende hi lietse gaen: ende si gingen wech tot haren here. Ende voertan en quamen ne ghene rouers meer van syrien in tlant van israhel.

24

Ende hier na gheschiede dat benadab die coninc van syrien vergaderden al sijn heere: ende toech op ende omleide al samarien.

25

Ende het wort groot hongher in samarien: ende die poort was so lange omleit tot dat men cochte een ezels hooft om tachtich silueren penninghen: ende datmen tvierendeel vander maten cadus van duuen stront cochte vijf silueren penninghen

[p. *493]

26

Ende die coninc van israhel ghinc al op den muer: soe riep een wijf an hem ende seide. Coninc here mijn behout mi.

27

Ende hi seide. Die here en behout di niet. Waer mede sal ic di behouden mogen? Vanden dorsche vloer: of vander wijnperse?.

28

Ende die coninc seide haer. Wat wiltstu di? Si antwoerde. Dit wijf seide mi. Gheef mi dijn kint dat wijt huden eten: ende wij sullen morghen mijn kint eten.

29

Dus soden wij mijn kint. ende wi hebbent ghegheten: ende ic seide haer sanderdaghes. Ghif dijn kint. dat wijt eten Ende si heeft haer kint gheborghen.

30

Ende doe dit die coninc ghehoert hadde so scoerde hi sijn cleder: ende ghinc ouer die muere. Ende al tvolc sach die hare daer die coninc mede ghecleet was op sijn vleysch onder

31

Ende die coninc seide. Dit moet mij god doen. ende dit moet hier mi toe doen ofte helizeus salphats soens hoeft huden op hem staen sal.

32

Want helizeus sat in sijn huys: ende die ouders saten mit hem. Ende aldus sant die coninc enen man voer: ende eer die bode quam: soe seide helizeus totten ouders En weti niet dat eens manslachtichs soen heeft harwaert gesonden datmen mi mijn hoeft of slae? Hier om besiet als die bode coemt so sluut die dore: ende en laets niet incomen. Want dat gheluut van sijns heren voeten comt achter hem.

33

Ende doe helizeus noch totten ouders sprac: so saghen si den bode die tot hem quam. Ende die coninc quam ende seide. Sich dus groot quaet is vanden here. Wat sal ic meer ontbeiden vanden here?