Bible in duytsche (Delftse bijbel 1477)

§ Capittel .iiij.

1

EEn wijf die eens propheten wijf was. riep tot helyzeum ende seide. Dijn knecht mijn man is doot: ende du weetste dat hij dijn knecht was een man gode onsiende. Ende sich den genen dien hi sculdich was: comt om mi mine twee sonen te nemen hem te dienenne.

2

Helyzeus seide haer. Wat wilstu dat ic di doe? Segt mi. Wat hebstu in dijn huys? Si antwoerde. Ic dijn ioncwijf en hebbe niet in mijn huys: sonder een luttel olyen daer ic mi mede saluen sal.

3

Hi seide haer Ganc. ende outlene van allen dinen ghebueren ydel vaten ende niet luttel:

4

ende ganc in dijn huys ende slute dijn dore alstu daer in biste du ende dijn sonen. ende doch daer of in allen den vaten: ende als si vol sullen wesen soe sultstuse wech doen.

5

Dus ginc twijf: ende sloot die dore op haer op ende haer sonen. Ende si brachten haer vaten: ende si goter in.

6

Ende doe die vaten vol waren: so seide si tot haren soen. Brenct mi noch een vat. Ende hi antwoerde. Ic en hebs niet. Ende die olye bleef staende.

7

Ende twf quam ende seit den gods man. Ende hi seide haer? Ganc ende vercope die olye ende ghelt den ghenen die ghi sculdich sijt: mer du ende dinen sonen leeft van datter ouerblijft.

8

Het gheschiede op enen dach dat helyzeus leet doer suna die stede. Ende daer was een groot wijf: die hem hielt om broot te eten. Ende om dat hi dicwijl al daer leet: so ghinc hi te haer na om broot te eten.

9

Ende si seide tot haren man. Ic mercke dat dit een gods man is: die dicwijle te ons hier lijt.

10

Daer om laet ons hem maken een cleyn camerkijn daer hi in slaepe: ende setten wi hem daer in een beddekijn ende een tafel ende eenen stuel ende een candelaer dat hi daer in wone als hi tot ons comt.

11

Ende het geschiede op enen dach. dat hi quam ende hi keerde in dit camerkijn: ende hi ruste daer.

12

Ende hi seide tot gyezij sijn kint. Roept dit wijf van suna. Ende doe hijse gheropen hadde ende si voer hem ghestaen was:

13

so seide hi tot giesi sinen knecht. Spreect tot haer. Sich du hebste ons naersteliken gedient: wat wiltstu dat icti doe? Hebstu enigen oerbare ende wiltstu

[p. *488]

dat icti den coninc spreke ofte den maerscalc vanden ridderscepe? Si antwoerde. Ic woen in midden van minen volke.

14

Ende hi seide Wat wil si dat ic haer doen mach? Ende giesi seide hem. En vraghet niet. Want si en heuet ne gheen kint: ende haer man is out.

15

Ende hij beual giezi dat hise ropen soude Ende doe si geropen was ende si voer die dore stont:

16

soe seide hi tot haer. In desen tiden ende in dese selue vre blijfstu te liue: so sultstu enen soen in dinen lichaem hebben. Ende si antwoerde. En wil niet bidden here gods man: en wil dinen ioncwijf niet lieghen.

17

Ende twijf ontfinc: ende gebaerde enen soen. in dien tide. ende in die selue vre die helyzeus voerseit hadde.

18

Ende tkint wies: ende op enen dach doet wtghetijt was ende te sinen vader ghegaen totten ouxters

19

so seide tkint tot sinen vader. Ic heb wee in mijn hooft. Ende hij seide tot enen knape Neemt tkint ende lectet tot sijnre moeder.

20

Ende doe hi tkint ghenomen had ende hijt te sijnre moeder brachte: so leide sijt op haren scoot totten middaghe: ende het starf.

21

Ende si ghinc ende leit op des gods mans bedde: ende si sloot die dore.

22

Ende si ghinc wt ende riep haren man. Ende seide. Ic bidde dattu mit mi sentste enen vanden kinderen ende een ezelinne: dat ic gelope totten gods man. ende ic sal wederkeren. Ende hi seide haer.

23

Om wat saken gaetstu te hem? Huden en sijnt gheen calenden noch saterdach. Ende si antwoerde. Ic salre gaen.

24

Ende si sat op een ezelinne: ende si beual den kinde ende seide.. Driue ende haesti: ende maex mi niet te lanc in te gaen: ende doch dat icti beuele.

25

Ende si tide wech: ende quam totten gods man inden berch van carmelo. Ende doe die gods man haer sach van verre: so seide hi tot sinen kinde giesi. Sich dat wijf van suna.

26

Daer om ganc in haer gemoet: ende seg haer. doedmen yet gerechtelic te di waert ende te dinen man ende te dinen soen Si antwoerde Gerechtelike

27

Ende doe si totten gods manne gecomen was opten berch so greep si sijn voeten: ende gyesi quam voert dat hijse daer of heffen soude. Ende die gods man seide. Laetse leggen Want haer ziele is in bitterheden. ende die here heeftet verborghen van mi. ende en heuet mi niet geseit Ende si seide hem.

28

Heisschede ic enen sone van minen here? En seide ic di niet: en bespotte mi niet?

29

Ende helyzeus seide tot giezi. Gorde toe dijn lendenen: ende neem minen stock in dijn hant ende ganc. Ofte di enich mensche te ghemoet coemt soe en gruets niet: ende grueti yemant soe en antwoert hem niet. Ende du sultste minen stock leggen op tskints aensichte.

30

Mer tkints moeder seide. Leeft die here ende leeft dine siele: soe en sal ic di niet laten Hier om stont hi op: ende volgede haer

31

Ende giezi was voer hem gegaen: ende had den stock gheleit op tskints aensichte: ende ne gheen stemme noch sin en was in tkint. Ende giezi keerde weder in helizeus ghemoet: ende boetscapte hem ende seide. Tkint en stont niet op.

32

Ende helyzeus quam in thuys: ende sich tkint lach doot op sijn bedde.

33

Ende

[p. *489]

doe hiere in gecomen was soe sloet hi die doer op hem ende op tkint: ende hi bede totten here

34

Ende hi ghinc. ende lach op tkint: ende hi leide sinen mont op tskins mont ende sijn ogen op tskints oghen. ende sijn handen op tskints handen ende hi lach neder op tkint: ende tskints vleysch wort verwarmt.

35

Ende helizeus keerde weder. ende wanderde in thuus een waruen hier ende daer: ende hi ghinc op ende lach op tkint. Ende tkint verademde seuenweruen: ende dede sijn oghen op.

36

Ende helizeus riep giezi: ende seide hem Roopt dat wijf van suna. Ende doe hijse gheropen hadde so quam si tot hem binnen Ende helizeus seide neem dinen soen.

37

Ende si quam ende viel voer sijn voeten: ende aenbeden op die aerde. Ende si nam haren soen ende si ghinc wt:

38

ende helizeus keerde weder in galgala. Die hongher was in tlant: ende der propheten kinderen woenden voer helizeo: ende helizeus seide enen van sinen kinderen. Sette enen groten pot: ende siet der propheten kinderen inden potte teten.

39

Ende een ginc wt inden acker: om wilt cruut te lesen Ende hij vant enen wilden wijngaert. ende hi lasser af die bladeren ende hij volde sinen mantele: ende hij keerde weder ende hi scoerdese inden pot vanden pot etene Want hi en wiste niet wattet was.

40

Ende die gheselle rechtet op om te etene. Ende doe si vanden ghesoden ghesmaect hadden: so riepen si ende seiden. Gods man. die doot is inden pot. Ende si en mochtens niet eten

41

Ende helizeus seide brenct meel. Ende doe sijt hem ghebracht hadden: soe dede hijt inden pot ende seide. Rechtet der scaren dat sijt eten. Ende niet meer en wortment bitters ghewaer inden potte.

42

Een man quam van balsalisa ende hi brachte den gods man brode van primicien: ende twintich gersten broden: ende nyewe tarwe in sijn sackelkine. Ende helizeus seide. Gheeft den volke dattet ete.

43

Ende sijn dienre antwoerde hem. Hoe vele is dit dat ict voer hondert man legghen sal? Ende helyzeus seide echter: gheeft den volke dattet ete. Want dit seit die here Si sullen eten: ende het sal ouerbliuen.

44

Ende aldus leide hijt voer hem luden. Ende sij atent: ende het bleef ouer nae sheren woert