Bible in duytsche (Delftse bijbel 1477)

§ Capittel .ij

1

HEt ghesciede doe die here helyam opheffen wilde bi bedruyssche inden hemel: dat helyas ende helyzeus ghinghen van galgala.

2

Ende helyas seide tot helyzeum Sittet hier: want die heer heeft mi ghesonden tot in bethel. Ende helizeus seide tot hem Leeft die here. ende leeft dine ziele: so en sal ic di niet laten. Ende doe si neder ghecomen waren in bethel:

3

so quamen die propheten sonen wt die in bethel waren tot helizeum: ende seiden hem. En weetstu niet: dattie here huden dinen here van di nemen sal? Hi antwoerde. Ic weet. Swighet.

4

Ende helyas seide tot helyzeum. Sitte hier: want die here heeft mi ghesonden in ihericho Ende hi seide. Leeft die here: ende leuet dine ziele: so en sal ic di niet laten Ende doe si te ihericho ghecomen waren:

5

so quamen der propheten sonen die in ihericho waren tot helyzeum: ende seiden tot hem. En weetstu niet dattie here huden dinen here vandi nemen sal? Ende hij seide. Ic weet. Swighet.

6

Ende helyas seide hem. Sitte hier: want die here heeft mi ghesonden totter iordnen. Ende hi seide. Leeft die here. ende leeft dine ziele: so en sal ic di niet laten. Dus ghinghen si beide te gader:

7

ende vijftich mannen van der propheten sonen volgheden hem na. Ende si stondenre iege van verre. Ende dese twee stonden opter iordanen.

8

Ende helyas nam sinen mantel ende wanten te gadere: ende sloech er mede twater vander iordanen ende het sceide hem in beide ziden: ende si ledenre beide ouer opt droghe.

9

Ende doe si ouer gegaen waren: so seide helyas tot helyzeum. Heyssche adttu wilste. dat ict di doe eer ic van di sal worde ghenomen. Ende helyzeus serde. Ic bidde dat dijn tweeuoudighe geest in mi worde.

10

Helyas antwoerde. Du heueste een pijnlic dinc geheysschet Mer nochtan ist dattu mi sietste als ic van di sal worden ghenomen soe salt sijn dattu geheysschet hebste: mer en sietstu mi niet: so en salt niet sijn.

11

Doe si ghingen ende al voert tidende onderlinghe spraken: sich so scheydese beide een vyerighe waghen ende vyierighe paerden. Ende helyas voer op mitten bedruissche inden hemel:

12

ende helizeus sacht: ende riep. Vader mijn vader mijn: israhels waghen ende sijn waghenmenre. Ende hi en sach hem voert niet meer. Ende hi ghegreep sijn clederen: ende schoerdese in tween stucken.

13

Ende hi hief helyas mantel op die hem neder gheuallen was. Ende hi keerde

[p. *485]

weder ende hi stont opt ouer vander iordanen:

14

ende hi sloech twater mit helias mantel die hem neder gheuallen was ende ten scheyde hem niet. Ende hij seide Waer is helyas god oec nv? Ende hi sloech twater. ende het sceide hem hier ende daer: ende helyzeus ghinc ouer.

15

Ende doet der propheten sonen die in ihericho waren saghen van daer ieghen soe seiden si. Helyas gheest is gerust op helyzeus. Ende si ghinghen hem te ghemoete ende aenbeden langes op die aerde:

16

ende si seiden hem. Sich mit dinen knechte sijn vijftich stercke mannen. die gaen moghen. Ende soken dinen here: ofte macschien sheren gheest hem ghenomen heeft ende heeften gheworpen op een vanden berghen ofte in een vanden valeyen. Ende hi seide. En wilter niet senden.

17

Si dwongen hem tot dat hijt hem oerloefde ende seide Senter. Ende si sonden vijftich mannen. Ende doen si hem drie dagen gesocht hadden: so en vonden sijns niet.

18

Ende si keerden weder te hem. Ende hi woende in ihericho: ende hi seide hem. En seide ict v niet: en wilt niet senden?

19

Ende die mannen vander steden seiden tot helyzeum. Sich die woninge van deser stat is alte guet also du selue sietste here: mer twater is alte quaet: ende tlant ondrachtich.

20

Ende helyzeus seide. Brenget te mi een nyeu vat: ende doet daer sout in. Ende doe sijt hem ghebracht hadden:

21

so ghinc hi wt ten fonteyne vanden wateren ende deder sout in: ende seide. Dit seit die here. Ic hebbe dit water gheganst: ende daer en sal voertmeer niet in wesen die doot noch ondrachticheit.

22

Dus worden die wateren gheganst tot in desen daghe: na helyzeus woert dat hi sprac.

23

Ende helyzeus ginc van daer op in bethel. Eude doe hi alle den wech op leet so quamen tot hem cleyne kinderen vter steden: ende bespotteden hem ende seiden. Ganc op cluaert: ganc op caluaert

24

Ende doe hi sijn oghen ophief soe saih hijse: ende vloectese in sheren name. Ende het quamen twee beeren vten woude: ende scoerden van dien twee ende veertich kinderen.

25

Ende hi ghinc van daer opten berghe van carmelo: ende van daer keerde hi weder in samarien