Bible in duytsche (Delftse bijbel 1477)

§ Ca .xx

1

BEnadab die coninc van syrien vergaderde alle sijn heere: ende twee ende dertich coninghen mit hem. ende paerden ende waghenen. ende hi toech op ende vacht ieghen samarien: ende hij omleit.

2

Ende hi sant boden tot achab den coninc van israhel in die stede

3

ende seide Dit seit benadab. Dijn siluer ende dijn gout is mijn: ende dijn wijuen ende sonen sijn mijn alre beste.

4

Ende die coninc van israhel antwoerde. Coninc here mijn na dijn woerden. so bin ic dijn ende al dat mijn is.

5

Ende die boden keerden weder ende seiden. Dit seit benadab die ons te di ghesonden heeft. Dijn siluer ende dijn gout dijn wiuen ende dijne kinderen sultstu mi gheuen.

6

Van morghen in dese selve vre so sal ic mijn knapen te di senden: ende sij sullen ondersoken dijn huys ende dijnre knapen huys: ende al dat hem ghenoghen sal sullen sij in haer hande nemen ende wech dragen.

7

Ende die coninc van israhel vergaderde alle sijn ouders. ende seide Merckt ende besiet. dat hi na ons spiet. Want hi heuet te mi ghesonden om mijn wijuen ende om mijn kinderen ende om mijn siluer ende om mijn gout: ende ic en hebs hem niet ontseit.

8

Ende alle die meeste van gheboerten ende al tvolc seide tot hem. En hoers niet: noch en duets niet dat hij heyschet.

9

Ende hij antwoerde aldus benadabs boden. Segt den coninc minen here. Al daerstu te mi dinen knechte om sontste inden beghinne dat sal ic doen: mer dese dinc en mach ic niet doen

10

Ende die boden keerden weder: ende drogent al den coninc ouer Ende hi sant weder ende seide. Dit moeten mi die goden doen

[p. *476]

ende dit moeten siere mi toe doen: ofte tghemul van samarien ghenoech wesen sal den hantuollen van al den volke dat mi volghet.

11

Ende die coninc van israhel antwoerde ende seide. Segt hem. Hi en verheffe hem niet gegort. also ofte hi gegort waer.

12

Ende het geschiede dat benadab dit woert gehoert had so dranc hi ende die coninghen mit hem in loodzen: ende hi seide tot sinen knapen. Om legt die stede. Ende si omleidense.

13

Ende sich een propheet quamtot achab den coninc van israhel ende seide Dit seit die here god. Sich hebstu dese alte grote menichte ghesien Sich ic salse huden in dinen handen leueren. om dattu weten sultste dat ic die here bin.

14

Ende achab seide. Bi wien? Ende hi seide hem. Dit seit die here. Biden princen vanden landen camerlinghen Ende achab seide. Wie sal beghinnen te striden? Ende die prophete seide. Du

15

Daer so tellede acahab die princen camerlinghen vanden lande: ende hi vanter in ghetale twee hondert ende twe ende dertich. Ende na hem so tellede tvolc alle die kinder ven israhel seuen dusent

16

ende si toghen te middaghe wt. Ende benadab dranc al droncken in sijn loodze: ende twee ende dertich coninghen met hem die te sinen hulpe gecomen waren.

17

Ende der princen kinderen vanden lande toghen wt in deerste voerhoeft. Ende benadab sant aldus die ghene: diet hem boetscapten seggende. Die mannen sijn wt samarien ghetoghen.

18

Ende hi seide hem Weder dat si comen om paeys begrijtpse leuende: ofte comen sij om stride vaetse leuende.

19

Dus toghen die princen vanden landen camerlinghen wt: ende dat ander heere volghede hem.

20

Ende elc versloech den man die ieghen hem quam: ende die van syrien vloghen: ende die coninc van israhel volghede hem na. Ende benadab die conic van syrien vloe op een poort mit sinen paerden.

21

Ende die coninc van israhel toech wt ende sloech die paerden ende die wagenen: ende hi sloech syrien mit seer groter plagen.

22

Ende die prophete quam totten coninc van israhel ende seide hem Ganc ende werde vrome: ende weet ende sich wattu doen sultste want in tander iaer hier na. so sal die coninc van syrien ieghen di comen.

23

Ende sconincs van sirien knapen seiden hem. die goden van israhel sijn goden vanden berghen: ende daer om verwinnen si ons.. Daer om ist beter dat wi ieghen hem vechten inden campaengien: ende wi sullense verwinnen.

24

Daer om sultstu dit woert doen. Doch of elken coninc van dijnen heere: ende sette princen ouer hem:

25

ende uermake tghetal vanden ridders die vanden dinen gheuallen sijn ende die paerde na deerste paerde. ende dat wagen na die wagene diestu te voren hadste: ende wi sullen ieghen hem vechten in die campaengien: ende du sultste sien dat wijse verwinnen sullen. Benadab beloefde horen rade: ende dede also.

26

Doe dat iaer geleden was doe tellede benadab die van syrien ende hi toech op in affec: om te vechten ieghen israhel.

27

Ende men tellede die kinder van israhel ende si namen vitaelgie ende sij

[p. *477]

toghen hem ieghen: ende si sloghen tenten ieghen hem als twee cleyne cuddekijn van gheiten: mer die van syrien veruolden tlant.

28

Ende een gods man quam totten coninc van israhel ende seide. Dit seit die here god. Om dat die van syren geseit hebben dattie here. god vanden berghen is. ende niet god vanden valeyen: so sal ic alle dese grote menichte in dijn hant geuen: ende ghi sult weten dat ic die here bin.

29

Si setteden seuen dage betaelgie dene teghen dandere: ende in den seuenden daghe daden sij den strijt. Ende die kinderen van israhel sloeghen van die van syrien hondert dusent te voet in dien daghe.

30

Ende die van syrien die gene die ouerbleuen waren die vlogen in affec in haer stede: ende die muere vielen op seuen ende twintich dusent mannen die r ghebleuen waren. Ende benadab quam al vliende in die stede ende hi ginc in een camerkijn dat binnen eenre cameren was:

31

ende sijn knapen seiden hem. Sich wij hebben ghehoert dattie coninghen vanden huse van israhel guedertieren sijn. Hier om laet ons sacken legghen op onse lendenen ende coorden op onse hoefden ende gaen wi totten coninc van israhel: machschien hi sal onse ziel behouden

32

Hier om gorden si haer lendenen met sacken ende si leiden coorden op haer hoefden: ende si quamen totten coninc van israhel ende seiden hem. Benadab dijn knecht seit. Ic bidde di dat mine ziele leuen mach. Ende achab seide. Leeft hij noch: so is hi mijn brueder

33

Ende die mannen ontfinghen dat ouer spot: ende si namen haestelijc dat woert wt sinen mont: ende seiden Benadab dijn brueder leeft. Ende hi seide hem. Gaet ende brencten te mi Hier om quam benadab tot hem: ende hi hiefen op wt sinen wagene.

34

Ene benadab seide hem. Ic sal di weder gheuen die steden die mijn vader van dinen vader nam: ende maect di die straten in damasco: alsoe mijn vader dede in samarien: ende ic sal onder dese belofte vandi varen. Dus maecte achab belofte mit hem: ende si lieten varen.

35

Doe seide een man vander propheten sonen in sheren redene tot sinen geselle Slach mi. Ende die en wouts niet doen

36

Ende die prophete seide hem. Om dattu sheren reden niet horen en woutste. sich so sultstu van mi gaen: ende een leeu sal di slaen. Ende doe hi een luttel van hem ghegaen was: so vant hem enen leeu ende sloech hem.

37

Ende die prophete sach enen anderen man: ende hij seide tot hem. Slach mij. Ende hi sloech hem: ende wondene.

38

Ende die prophete ghinc aldus wech ende quam den coninc te ghemoete inden weghe: ende hi verwandelde sinen mont ende sijn ogen mit ghemul dat hi daer op stroeyde.

39

Ende doe die coninc liden soude: soe riep hi totten coninc ende seide. Dijn knecht toech wt om te vechten van di Ende doe enen man ontslouwen was. so brachten een tot mi: ende seide. Wachte desen man. Ist dat hi di ontvliet so sal dijn siel voer sijn ziel wesen: of du sultster een talente siluers voer geuen.

40

Ende doe ic mi van verstoernissen darwaert ende ghinswaert omkeerde: haes-

[p. *478]

telike so en sach icx niet. Ende die coninc van israhel seide tot hem Dats dine vonnisse: dattu selue wt ghegeuen hebstte.

41

Ende die prophete vaghede te hant tghemul van sinen aensichte: ende die coninc van israhel bekendene dat hij vanden propheten was.

42

Ende hij seide totten coninc. Dit seit die here. Om dattu heueste laten gaen een man die der doot sculdich is wt dijnre hant. soe sal dijn siel voer sine ziele wesen: ende dijn volc voer sijn volc

43

Dus keere die coninc van israhel weder in sijn huis ende veronwaerdet te horen: ende al verwoet quam hi in samarien