Bible in duytsche (Delftse bijbel 1477)

§ Capit .xix

1

AChab seide iesabel alle dat helyas ghedaen hadde: ende hoe hij mitten swaerde verslegen hadde alle baals propheten.

2

Ende iesabel sant enen bode tot helyam ende seide. Dit moeten mi die goden doen ende dit moeten si mij daer toe doen: of ic morghen tot deser seluer vren niet en sal setten dine siele als een siele van dien.

3

Hier om ontsach hem helyas ende hi stont op ende ghinc henen soe warwaert datten die wille droech: ende hi quam in iudas barsabee. ende daer liet hi sijn kint:

4

ende ginc wech inder wildernissen den wech eens dages. Ende doe hi daer ghecomen was ende hi geseten was onder enen iunipere boem: so bat hij sijnre sielen dat hi steruen soude. Ende seide Here hets mi genoech neem mine ziele. Want ic en bin niet beter dan mine vaders.

5

Ende hi warp hem neder: ende hi wort slapende inder scaduwe vander iuniperen. Ende sich sheren engel tastede hem an ende seide Stant op ende eet.

6

Hi sach op: ende sich onder sinen hoefde was een broot onder die assche ghebacken ende een vat borns Daer om at hi ende dranc: ende hij wort echter slapende.

7

Ende sheren enghel keerde anderwarf weder ende hi noepten: ende seide hem. Stant op ende eet. Want du hebste noch groten wech te gaen.

8

Ende doe hi opghestaen was so at hi ende dranc: ende hi wanderde inder cracht van deser spisen veertich dagen ende veertich nachten tot gods berge oreb.

9

Ende doe hij daer gecomen was: so woende hi in een hol. Ende siet sheren woert wort tot hem ghedaen: ende seide hem. Helyas wat duetstu hier?

10

Ende hi seide. Mit toorne heb ic toorne ghedaen om sheren gods wil vanden heeren: want die kinder van israhel hebben sheren belofte achter ghelaten Si hebben dijn outaer ghebroken. ende dijn propheten verslegen mitten swaerde: ende ic bin allene ouerbleuen: ende si soken mine ziele. dat sijse wechdoen sullen.

11

Ende die here seide hem. Com vte ende stant opten berch voerden here. Ende sich die here gaet: ende voerden here leet een grote wint ende starc. die berch omwerpende: ende die stenen verporrenden. Inden winde en was die here niet. Ende naden winde was berueringe Ende in die berueringhe en was die here niet.

12

Ende nader berueringe quam vyer. Ende inden vier en was die here niet. Ende naden vyer quam een wispelen van tederen luchte. Ende daer was die here.

13

Ende doe helyas dat gehoert hadde so ouerdecte hi sijn aensichte mit sinen mantele: ende hi ginc wt ende stont int gat vander speluncke: ende sich tot hem sprac een stemme ende seide. Wat duetstu hier helyas?

14

Ende hi seide. Met toorne heb ic toorne ghedaen om sheren gods wille vanden heeren. want die kinder van israhel hebben dine belofte achter ghelaten Si hebben dijn outaren te broken ende si hebben dijn propheten versleghen mitten zwaerde: ende ic bin allene ouerbleuen: ende si soken mine

[p. *475]

ziele dat sijse wechdoen sullen.

15

Ende die here seide tot hem. Ganc ende keer weder al dinen wech. in damasco doer die wildernissen. Ende altstu daer gecomen biste. soe sultstu asahel saluen coninc bouen syrien:

16

ende iehu namsi sone sultstu coninc saluen bouen israhel ende helzeum salphats sone die van abelmaula is dien sultstu prophete saluen ouer di.

17

Ende het sal so wesen wie asahels zwaerde ontulien sal die sal iehu doden: ende so wie dat iehu zwaerde ontvlien sal die sal helizeus doden

18

Ende ic sal te minen behoef in israhel laten seuen dusent man welkere knyen voer baal niet gheboghen en hebben: ende elken mont die niet aenbeet en heeft hem die hant cussende

19

Ende hier om tide helyas van oreb want hi vant helizeum salphats soen ackerende in twalef iocken van ossen: ende hi was die ene onder den twalef iocken ossen die ackerden. Ende doe helyas gecomen was tot hem soe warp hi sijnen mantel op hem.

20

Ende hi liet stappans sijn ossen ende liepe na helyam. Ende seide. Ic bidde di dat ic mach cussen mijnre vader ende mijnre moeder: ende dan sal ic di volghen. Ende helyas seide hem Ganc ende kere weder. Want dat mijne was te doen dat heb ic di ghedaen.

21

Ende doe hij van hem weder gekeert was soe nam hi een paer osssen ende sloechse doot: ende mitter ploech soet hi der ossen vleysche. ende hi gaft den volke ende si atent. Ende hi stont op ende ghinc wech ende volgede helyam: ende diende hem