Bible in duytsche (Delftse bijbel 1477)

§ Capit .xiiij.

1

IN die tiden so was siek abyas iheroboams soen.

2

Ende iheroboam seide tot sijnen wijue. Stant op ende verwandele dijne cledere dattu niet bekent en wortste dattu iheroboams wijf biste: ende ganc in sylo daer ahyas die propheet is die mi seide dat ic soude bouen dit volc regneren

3

Draech oec in dijn hant thien broden ende enen keysterlinc ende een vat seems: ende ganc tot hem. Want hi sal di seggen: wat desen kinde geschien sal.

4

Ende iheroboams wijf dede alsoe hi gheseit hadde. ende sij stont op ende ghinc wech in sylo: ende si quam in ahyas huys. Mer hi en mochte niet sien: want sijn ogen waren verdonckert van outheden.

5

Ende die here seide tot ahyam. Sich iheroboams wijf comt hier in om dat sij te rade comen sal van haren sone die sieck is. Dit ende dit sultstu haer segghen Ende doe si in comen was ende si haer vyesde te sijn die sij was.

6

Soe hoerde ahyas tgheluyt van haren voeten dat si ter doren in quam: ende hi seide. Com ihe-

[p. *465]

roboams wijf Waer om veynstu di een ander te wesen? Want ic bin te di gesonden een hert bode.

7

Ganc ende segt iheroboam. Dit seit die here god van israhel. Om dat ic di verheuen hebbe van midden den volke. ende ic heb di gegeuen prince bouen mijn volc van israhel.

8

ende ic heb ghescoert trike van dauids huse ende ic hebt di ghegeuen. ende om dattu niet gheweest en hebtste gelijc dauid mijnen knechte die mijn geboden wachte. ende mi volghede in alle sijn herte ende dede dat genoechtlijc was in mijnen aenscouwen:

9

mer du hebste qualijc ghedaen bouen alle die ghene die voer dij gheweest hebben. ende du hebste di vreemde goden ghemaect ende ghegoten goden. om dattu mi te gramscepen verporren soutste. mer mi hebstu achter dijnen rugge gheworpen:

10

hier om siet so sal ic quaet bringhen op iheroboams huys. ende ic sal van iheroboam verslaen. den ghenen die ter want waert seict ende den beslotenen ende den achtersten in israhel. Ende ic sal die reliquien van iheroboams huse suueren alsomen pleghet te suueren drues tot dattet al reyne is.

11

Want die van iheroboam doot sullen wesen in die stat die honde sullense eten: mer die inden acker sullen steruen die voghelen des hemels sullense eten: want die here heuet ghesproken.

12

Nu stant op di ende ganc in dijn huys: ende alstu mit dijnen voeten in huys coemen sultste so sal tkint steruen.

13

ende al israhel salt bewenen ende begrauen. Want dit kint salmen alleen in graue leggen van iheroboams huyse: want ene guede redene is op hem gheuonden vanden here gode van israhel in alle iheroboams huys.

14

Ende die here sal hem luden ene coninc bouen israhel maken: ende die iheroboams huyse verslaen sal in desen daghe. ende te desen tiden:

15

ende die here god sal israhel slaen: alsomen riet pleghet te bernen inden watere. Ende die here sal israhel steken wt desen gueden lande dat hi haer vaders gaf: ende hij salse driuen over die riuiere: want si hebben te hare behoef bosschen ghemaect om den here te verbelghen.

16

Ende die here god sal israhel leueren om iheroboams sonde die hi sondichde: ende hi heeft israhel doen sondighen.

17

Dus stond iheroboams wijf op: ende ghinc wech. Ende quam te thersa. Ende doe si binnen den dorpel van haren huse quam. soe starf tkint:

18

ende si grouent ende al israhel beweendet. na sheren woert dat hi sprac in sijns knechts ahyas des propheten hant.

19

Mer dander van iheroboams woerden hoe hi vacht. ende hoe hi regnerede. sich si sijn bescreuen inden boke der woerden vanden daghen der coninghen van israhel.

20

Ende die daghen die iheroboam regneerde: waren twe ende twintih iaer Ende iheroboam sliepe mit sijnen vaders: ende nadab sine sone regneerde ouer hem

21

Ende roboam salomons soen regneerde in iuda. Roboam was een ende veertich iaer out doe hi begonste te regneren: ende hij regneerde seuentien iaer in iherusalem die stede die die here vercoren hadde wt alden geslachte van israhel dat hi daer

[p. *466]

sijnen name setten soude. Ende sijnre moeder name was naama van amans geslachte.

22

Ende iudas dede quaet voer den here: ende sij vergramden hem bouen al dien dat haer vaders ghedaen hadden ende in haren sonden die sij ghesondicht hadden.

23

Want sij maecten oeck te haren behoef outaren. ende beelden ende busschen ende afgoden op elken hoghen berch ende onder elc gelouert hout.

24

mer oec waren verdroghede binnen den lande: ende si daden alle die onwaerdicheden vanden heydenen. die die here verderft hadde voer die kinder van israkels aensichte

25

ende inden vijfsten iare van roboams rike so quam op te iherusalem sesac den coninc van egipten:

26

ende hi nam die tresore van sheren huys ende sconincs tresoer: ende hij namt al: hi nam oec die gulden schilden die die coninc salomon ghemaect hadde.

27

ende die coninc roboam maecter er latoenen schilden ouer. ende hi leuerdese inder princen vander scildenaren hant. ende inder geenre hant die wachte daden voer die dore van sconincs huys.

28

Ende als die coninc gaen soude in sijn huys so droeghense die ghene die officie hadden vorer hem te gaen: ende daer na droeghen sijse weder ten wapen huse der schildenaers.

29

Mer dander van roboams reden ende al dat hi dede: sich si sijn ghescreuen inde boke van den redenen der coninghen van iuda?

30

Ende tallen dagen was strijt tusschen roboam ende iheroboam.

31

Ende aldus sliepe roboam mit sijnen vaders. ende hi wort mit hem begrauen in dauids st.de. Sijnre moedee name was naama van amans gheslacht. Ende abia sijn soen regneerde ouer hem