Bible in duytsche (Delftse bijbel 1477)

§ Ca .xij

1

ROboam quam in sychem Want daer was al israhel vergadert om hem coninc te maken.

2

Ende iheroboam nabaths soen die noch ballinc was in egipten van sconincs salomons aensichte: doe hij hoerde dat hij doot was. so keerde hi weder wt egipten.

3

Ende si senden ende riepen hem. Dus quam iheroboam ende al die menichte van israhel: ende si spraken tot roboam ende seiden.

4

Dijn vader heeft alte harden iocke op ons geleit: hier om so minder een luttel van dijns vaders alrehande ghebode ende neem van ons sinen zwaren iocke dat hi op ons geset heeft: ende wi sullen di dienen.

5

Ende hi seide te hem. Gaet ende coemt weder te mi: ten derden dage. Ende doe tvolc wech ghegaen was:

6

so had die coninc roboam raet mitten ouders. die stonden voer salomon sinen vader doe hi noch leue-

[p. *461]

de: ende hi seide. Wat rade geefdi mi dat ic antwoerden mach den volke?

7

Si seiden hem. Ist dattu huden desen volke gehoersaem sijtste ende dientste. ende duetstu haren heyssche: ende spreecstu hem toe sachte woerden: soe sullen sij tallen daghen uwe knechten wesen.

8

Ende roboam liet achter der ouder raet die si hem ghegheuen hadden: ende nammer toe ionghelinghen die mit hem opgeuoet waren ende die voer hem stonden:

9

ende hi seide tot hem. Wat rade gheefdi mij dat ic antwoerden mach desen volke: die mi geseit hebben. make lichter den last die dijn vader op ons gheleit heeft?

10

Ende die ionghelinghen seiden hem die mit hem op gheuoet waren. Dus sultstu den volke spreken: die totti ghesproken hebben ende seiden: dijn vader heeft ons laste verwaert: verlichte du ons. Aldus sultstu hem spreken. Mijn minste vinger is groter dan mijns vaders rugge.

11

Ende nv heeft mijn vader op v geleit ene zware last: mer ic salre toe doen op v last. Mijn vader sloech v mit gheselen: mer ic sal v slaen mit scorpionen. .

12

Dus quam iheroboam: ende al tvolc ten derden daghe. tot roboam alsoe die coninc ghesproken hadde segghende. coemt weder te mij ten derden daghe.

13

Ende die coninc antwoerde den volc harde woerden. ende liet achter der ouders raet die sie hem ghegheuen haden:

14

ende hi sprac hem na der ionghelingen raet ende seide. Mijn vader heeft v last verswaert: mer ic salre v toedoen op v last. Mijn vader sloech v mit geeselen: mer ic sal v slaen mit scorpionen.

15

Ende die coninc en hoerde na tvolc niet want die here was hem ieghen geworden. om dat hi verwecken soude sijn woert dat die here ghesproken hadde in ahias van sylo hant tot iheroboam nabaths soen.

16

Ende doe tvolk sach datse die coninc niet en woude horen: soe antwoerden si hem ende seiden Wat dele is ons in dauid. of wat erueachticheit in ysay sone? Israhel ganc in dijn woninghen Sich nv dauid dijn huys. Ende Israhel ghinc in sijn woninghen.

17

Ende bouen alle die kinder van israhel. die woenden inden steden van iuda. daer bouen regneerde roboam.

18

Ende die coninc roboam sant aduram die bouen die tribute was: ende alt volc steenden: ende hi bleef doot Ende die coninc roboam sat haestelijc op sijnen wagen ende vloe in iherusalem:

19

ende israhel ghinc af van dauids huse tot in desen daghe.

20

Ende het gheschiede doe al israhel verhoerde dat iheroboam wedercomen was so senden si daer om ende riepen hem daer die menichte vergadert was: ende sie maecten coninc bouen al trike van israhel: ende nyemant en volghede dauids huys sonder allene iudas gheslachte.

21

Ende roboam quam in iherusalem ende hi vergaderde al thuys van iuda ende van benyamins gheslachte. hondert dusent ende tachtich dusent wtuercoren mannen vechters: om dat si vechten souden ieghen thuys van israhel: ende dat si trike weder brenghen souden tot roboam salomons soen

22

Ende sheren woert wort ghedaen tot semeyam gods manne seggende.

23

Spreec tot roboam salomon

[p. *462]

sconincs soen van iuda. ende tot al iuda ende benyamin ende totten anderen van den volke ende segt.

24

Dit seit die here Ghi en sult niet op trecken: noch vechten ieghen uwen bruederen die kinder van israhel. Elc manne keer weder in sijn huys. Want dit woert is van mi gedaen Ende si gehoerden scheren woert. ende keerden weder vanden wege also hem die here beuolen had.

25

Ende iheroboam stichte sychem in effeayms berghe: ende daer woende hi. Ende hi toech van daer ende stichte phanuel.

26

Ende iheroboam seide in sijn herte. Nu sal trike weder tot dauids huys comen.

27

op dat dit volc opgaet ende offert sijn sacreficien in sheren huys in iherusalem: ende des volcs herte sal weder worden ghekeert te sinen here roboam den coninc van iuda: ende si sullen mij dootslaen ende weder tot hem keren.

28

Ende hi versierde enen raet ende maecte twe gulden calueren. ende hi seide den volke. En wilt voert meer niet op gaen tot iherusalem. Israhel siet hier v goden: die v wt egipten gheleit hebben.

29

Ende hi sette dat een calf in bethel. ende tander in dan.

30

ende dit woert is gheworden israhel in sonde. Ende tvolc ginc om aen te bidden dat calf tot in dan.

31

Ende hij maecte tempelen in die hoecheit: ende papen vanden achtersten vanden volke die van leuijs sonen niet en waren.

32

Ende hi maecte enen feesteliken dach in die achtenste maent. inden vijfthiensten dage vander maent: in dier gelikenisse der hoecheit die gehouwen wort in iuda. Ende also opclimmende totten outare dede hi des ghelijcs in bethel: om dat hi offerhande doen soude den calueren di welcke hi gemaect hadde. Ende hi maecte papen der hoecheden in bethel die hi gemaect hadde:

33

ende hi clam op ten outare dat hi ghemaect had in bethel : inden vijfthiensten daghe vander achster maent dien hi verziert had in sijn harte. Ende maecte den kinderen van israhel ene solempniteit: ende hi ghinc op ten outaer om wieroec te verbranden.