Bible in duytsche (Delftse bijbel 1477)

§ Capittel .x

1

ALse die conincginne van saba gehoert had die nyemare van salomon. so quam si in sheren name om hem te prouen mit raetselen.

2

Ende si quam in iherusalem mit groten gheselscap ende mit groter rijcheden. met kemels die brachten specien. ende seer ontallijc sgouts ende veel precioser stenen. ende sij quam tot salomon den coninc: ende si seide hem al dat si in haer harte hadde.

3

Ende salomon leerde haer alle die woerden die si voer geseit had. Want ne gene reden en was. die den coninc verborghen sijn mochte: ende daer hi haer niet of antwoerden en mochte.

4

Ende doe die coninginne van saba alle sconincs wijsheit sach. ende thuys dat hij ghesticht had.

5

ende die spise van sijnre tafelen. ende die woninghe van sinen knapen ende der dienrers ordinancie ende haer clederen. ende die scenckeren ende die holocauste die hi in sheren huys offerde. so en had si voert ne ghenen geest:

6

ende si seide totten coninc. Die redene die ic in mijn lant hoerde van dinen redenen ende van dijnre wijsheit is waer:

7

ende ic en gheloefdes niet den genen diet mi seiden. voer dat ic selue ghecomen bin ende hebt ghesien mit minen oghen: ende ic heb gheprooft dattet mij niet half gheseit en was. Want dijn wijsheit is meerre ende dijn wercken: dan die niemaer die ic ghehoert heb-

[p. *457]

be.

8

Salich sijn dijn mannen. ende salich sijn dijn knechten die altoes voerdi staen ende horen dine wijsheit.

9

Die here dijn god dien du bequaem sijtste moet ghebenedijt sijn: ende die di geset heeft opten trone van israhel om dat die heer israhel in eweliken ghemint heeft: ende heeft di coninc gemaect om dattu vonnisse ende gherechticheit doen soutste.

10

Dus gaf sij den coninc hondert ende twintich talenten gouts: ende seer veel specien: ende preciose stenen Voert meer en waren so vele specien niet gebracht als het waren die de coninghinne van saba den coninc salomon gaf.

11

Mer hyrams vloot oec die dat gout van ophir brachte. dat brachte oec wt ophir hout van thijna seer vele: ende preciose stenen.

12

Ende die coninc maecte van thijna hout die lenen van sheren huus ende van sconincs huys: ende den canters cytharen ende lyeren. Men brachte noyt tot in desen daghe dustanige hout thijna: noch men sachs noyt.

13

Ende die coninc salomon gaf der coninghinnen van saba alle dat si wilde ende dat sij hem heysschede: al sonder dat hij van haer had ghepresenteert al willens van coninctliker ghitfen. Ende si keerde weder: ende voer wech in haer lant met haer knapen.

14

Ende tgewichte vanden goude datmen salomon alle iaer brachte was ses hondert ende ses ende tsestich talenten gouts:

15

dien wtghenomen dattie mannen brachten die bouen die tollenen waren ende al sonder dat brachten die comanscap daden. ende al die schilde vercochten: ende alle die coninghen van arabien ende die princen vanden lande

16

Ende die coninc salomon maecte twee hondert schilden van alte finen goude. Hi gaf die platen van elken schilde ses hondert sycle gouts:

17

ende hi maecte drie hondert bokelaren van ghefineerden goude. Drie hondert mijnen gouts: clede elken bokelaer. Ende die coninc leidse int huys van libanus bosschaeldien.

18

Ende die coninc salomon maecte oec enen groten trone van yuore: ende hi cleden mit sere blinckenden goude:

19

ende hi had ses trappen. Ende tbouenste vanden trone was achter ront. ende twe handen waren die een in die ene zide ende die ander in die ander zide ende hielden den zetel: ende twe lybaerden stonden neuen beide die handen:

20

ende twalef lupaerdekens stonden op ses graden harwaert ende darwaert. Alsulcken werc en was in ghene rijc ghemaect.

21

Mer oec al die vaten daer die coninc salomon wt dranc waren gulden. Ende alle decselen vanden huse van lybanus bosschaeldien waren van alte finen goude. In salomons daghen ende was tsiluer niet waert noch men achter niet op.

22

Want sconincs volc ginc telken drie iaren met hyrams volc in tharsis: ende brachten van daer siluer ende gout. ende olyfanten tanden. ende simmen ende paeuwen.

23

Dus was die coninc salomon verheuen bouen alle die coningen van aertrijc in rijcheden ende in wijsheden:

24

ende al tlant begheerde salomons aensichte. om dat sij sijn wijsheit horen souden: die die here in sijn herte ghegheuen hadde:

25

ende elc bracht ghiften. silueren vaten ende gulden va-

[p. *458]

ten. ende clederen ende wapenen mede te striden. ende specien ende paerden ende mulen elcs iaers.

26

Ende salomon gerede waghenen ende geredenen. ende hem isser gemaect dusent ende vier hondert waghenen ende twalef dusent gheredenen: ende hi besettese in sinen ghemuerden steden: ende mitten coninc in iherusalem.

27

Ende hi dede dat alsoe grote ouertallichlijc tsiluers binnen iherusalem was als stenen: ende hi gaf menichte van cedren: als verdroghede moerbome die op tuelt wassen.

28

Ende men brachte salomon paerden wt egipten ende van choa. Want sconincs coopluden cochtense van choa: ende om enen ghesetten loon brachten sijse wt choa.

29

Want enen wagen quam wt egipten om ses hondert silueren syclen: ende een paert om hondert ende vijftich silueren syclen Ende in deser manieren vercochten al die coninghen van etheen ende van syrien die paerden