Bible in duytsche (Delftse bijbel 1477)

Ca .ix

[p. *455]

1

HEt gheschiede doe salomon volmaect hadde tgestichte van sheren huse ende sconincs ghestichte. ende alle dat hi begheert hadde ende wille te maken:

2

soe openbaerde hem die here anderwarf also hi hem in gabaon geopenbaert had.

3

Ende die here seide tot hem: Ic heb ghehoert dijn orisoen ende dine bedinghe: die du ghebeden hebste voer mi. Ic hebbe dit huys geheilicht dattu gesticht hebste. dat ic daer eweliken minen name setten soude: ende mijn oghen ende mijn herte sullen daer sijn tot allen daghen.

4

Ist dattu oec wanderste voer mi also dijn vader wanderde in simpelheit ende in gerechticheyt van herten. ende duetstu al dat ic di beuolen hebbe ende houtste mijn wette ende mijn vonnissen:

5

soe sal ic eweliken den trone van dinen rike setten bouen israhel. also ic dauid dinen vader heb gesproken ende gheseit: ne ghene manne van dine geslachte en sal worden afghedaen vanden trone van israhel.

6

Mer ist dat gi af kerende v afkeert ghij ende uwe sonen ende ghi mi niet en volghet. noch en wachti mine gheboden niet noch mine oeffeninge die ic v voergeseit heb. mer gaedi wech ende oeffendi vreemde goden ende aenbeedse.

7

so sal ic israhel wech doen vanden lande dat ic hem ghegheuen heb: ende den tempel die ic in minen name gheheilicht hebbe sal ic versteken van minen aenscuwen: ende israhel sal wesen allen luden in een prouerbie ende in een spot:

8

ende dit huys sal wesen in enen exempel. Ende al dier doer liden sal hi sal verwonderen: ende wispelen ende segghen. Waer om heeft die here dus gedaen desen lande ende desen huse?

9

Ende si sullen antwoerden Om dat si ghelaten hebben den here haren god die haer vaderen leide wt egipten. ende om dat si vreemde goden geuolcht sijn ende hebbense aenbeet ende geoffent: hier om so heeft die here op hem ghebracht alle dit quaet.

10

Ende doe twintich iaren gheleden waren nae dien dat salomon gesticht had die twee husen dat was sheren huus.

11

ende tsconincs huis mittien dat hyram die coninc van tyri salomon leuerde cedren houte ende abyegnen houte. ende gout na alle dat hijs te doen hadde: so gaf die coniuc salomon hyram twintich poorten in tlant van galilea

12

Ende hyram quam wt tyro. om die poerten te besien die hem salomon gegheuen had: ende si en ghenoechden hem niet:

13

Ende seide. Sijn dit die steden brueder diestu mi ghegheuen hebste? Ende hi hetese tlant van chabul tot in desen dage.

14

Ende hyram sant totten coninc salomon hondert ende twintich talenten gouts.

15

Dit is die somme vanden wtgheuen die de coninc salomon offerde om te stichten sheren huys. ende sijn huys ende die passaedsen. ende die muer van iherusalem ende heser ende mageddo ende gaser.

16

Pharao die coninc van egipten quam op wt egipten. ende die chananeen die in die stat woenden sloech hi doot: ende hi gafse te huwelike sijnre dochter salomons wiue.

17

Ende salomon stichte gazer. ende tnederste bethoron.

18

ende baalath ende palmiram ende tlant vander wilder-

[p. *456]

nissen: ende alle die weghen die hem toebehoerden ende die sonder mueren waren die beueste hi:

19

ende die steden vanden waghenen. ende die steden vanden rijtpaerden. ende so wat dat hem genoechde te stichten in iherusalem ende inden lybano. ende al tlant van sijnre machten.

20

Ende al tvolc datter bleef vanden amorreen ende die etheen ende die phereseen. ende vanden eueen ende vanden iebuseen.

21

die vanden kinderen van israhel niet en sijn: deser lude kinderen die ghebleuen waren in tlant die de kinder van israhel niet en consten ghedoden. die maecte die coninc salomon tribuyt luden. tot in desen dage.

22

Mer salomon en settede nyemant vanden kinderen van israhel te dienen: mer si waren man vechters ende sijn knapen ende princen ende leidsman. ende prouoest van sinen waghenen ende van sinen paerden

23

Ende bouen al salomons werken worde geset vijfhondert ende vijftich princen: die tvolc onder hem hadden: ende elc beual twerc dat hem gheset was te doen.

24

Ende pharaons dochter quam op van dauids stede in haer huys: dat haer salomon gesticht hadde. Doe stichte salomon die passaedse.

25

Ende salomon offerde drie warue binnen elcken iaer opten outaer die hi den here ghemaect hadde holocauste ende danckelike victimen: ende hij verbrande thimiama voerden here. Ende die tempel was volmaect

26

Ende die coninc salomon maecte een vloot in asyon iaber die neuen aylam is int ouer vander roeder zee: in tlant van ydumea

27

Ende hyram sant in dat vloot sine knapen ende scipmannen die welgheleert waren ter zee. mit salomons knapen:

28

ende doe sij in ophir ghecomen waren: soe namen sij van daer vier hondert ende twintich talenten gouts ende brachtent totten coninc salomon