Bible in duytsche (Delftse bijbel 1477)

§ Capittel .vi.

1

HEt gheschiede inden vierhondertsten ende tachtichsten iaer nae dat die kinder van israhel vten lande ghegaen waren inden vierden iaer in die maent zio. dat is die ander maent sconincs salomons bouen israhel: soe begontste hi den here een huys te stichten.

2

Ende thuus dat die coninc salomon stichte den here had in lencte tsestich cubiten: ende in die wide twintich cubiten: ende in die hoechte dertich cubiten

3

Ende voer den tempel was een poertael dat twintich cubiten lanc was na die mate destempels wijde: ende het hadde tien cubiten in die wide voer dat aensichte vanden tempel:

4

ende hi maecte inden tempel gheuelde veinsteren.

5

Ende hi maecte op die wanden vanden tempel gescutsele van berderen al om en tomme den tempel ende den oracule: ende hij maecte camerkijns al om ende tomme aen

6

die zide dat ghescutsel vanden berden dat onder was dat had vijf cubiten in die wide: ende tmiddelste scutsele was ses cubiten wijt: ende dat derde gescutsele hadde seuen cubiten in die wijde. Want hi leide in thuus die balcken buyten comende al om en tomme: so dat sij niet en waren aen die muere vanden tempel.

7

Want doemen thuys stichtede. so stichtement van gheeffende ende gehelen stenen. ende doemen thuys stichte so en hoerdemen niet int huys hamer noch aex noch ghene yseren wapen.

8

Die dore van die middelste camer was in die want vanden rechten huse: ende met een wentelsteene ghincmen op in die middelste camere: ende vanden middelsten in die derde camer

9

Ende hi stichtet huys. ende volmaectet. Ende hi bedecte oec thuys mit cedren corbelen:

10

ende hi maecte tscutsel van berderen bouen al thuys vijf cubiten hoghe: ende hi ouerdecte thuys mit cedren houte.

11

Ende tseren woert wort tot salomon gedaen ende seide.

12

Dit huys dattu stichste. op dattu wanderste in mine gheboden. ende duetste mijn vonnissen. ende wachtste alle mine gheboden ende wanderste daer in: so sal ic di mine redene vastmaken die ic ghesproken heb tot dauid dinen vader.

13

ende ic sal wonen in midden den kinderen van israhel: ende ic en sal mijn volc van israhel niet laten.

14

Aldus stichte salomon thuys: ende volmaectet.

15

Ende hij stichte die wande binnen in thuys mit scutsele van cederen berderen. vanden fondamente van den huys totten hoecheden vanden wanden. ende toten corbelen: so ouerdecte hijt mit cederen houten binnen: ende hi decte dat pauement vanden huse mit abiegnen tafelen.

16

Hi maecte oec ten achtersten einde vanden tempel een scutsel van cedren tafelen. vanden pauemente opwaert twintich cubiten hoghe: ende hi maecte tbinnenste huys vanden oracule in sanctumscantorum.

17

Want die tempel was veertich cubiten lanc voer die dore vanden oracule:

18

ende men clede al thuys bin-

[p. *447]

nen mit cedere. ende het hadde gewracht subtilic lijn wtsnidinghen ende sijn woninghen: ende verheuen wtsnidinghen. Men dectet al mit cedren tafelen: ende nyewerts in die wandt en mochtmenne ghene steen ghesien albedalle.

19

Want hij hadde die oracule ghemaect in die achterste zide in midden thuys: om dat hi daer setten soude die arcke van sheren beloften.

20

Ende die oracule hadde twintich cubiten in die lencte ende twintich cubiten in die wijde. ende twintich cubiten in die hoecheit. ende hi ouerdectet ende cledet mit alten puren goude. Mer den outaer clede hij oec met cedere.

21

Ende thuys oec voer die oracule ouerdecte hij mit alte finen goude: ende hi naghelder die platen aen met gouden naghelen.

22

Ende niet en was binnen den tempel: dat mit goude niet ouerdect en was. Mer oec ouerdecte hi den outaer al mit goude vanden oracule.

23

Ende hi maecte binnen den oracule twee enghel cherubin van oliuen houte: tien cubiten hoghe.

24

Die ene vloghel vanden cherubin was vijf cubiten lanc. ende des ander cherub vlogel. vijf cubiten lanc. dat is si hadden tien cubiten. vanden enen eynde tot den eynde vanden anderen voghele.

25

Ende die ander cherub elc was van tien cubiten in die selue mate: ende een werc was in beide den cherubinnen:

26

dat die ene cherubin had tien cubiten in lenghede. ende oec also die ander cherub.

27

Ende hi settede die cherubin in die middewaert vanden binnensten tempel. Ende die enghelen staken haer vlogelen wt: ende dene vlogel ghenaecte die ene want. ende die vlogele vanden anderen enghel ghenaecte die ander want. mer die ander twee vlogelen ghenaecten dene dander in midden den tempel.

28

Hi ouerdecte die engelen mit goude.

29

Ende alle die wanden vanden tempel al om en tomme sneet hij wt mit menigerhande wtgrouinge ende hij maecter in cherubin ende palmen ende menigerhande ghemaelt werc die alsoe opverheuen wort dat si vter want quamen.

30

Mer oec so ouerdecte hi binnen ende buyten tpauimente vanden huse mit goude.

31

Ende inden inganc vanden oracule soe maecte hi twee doerkijns van olyuen houte. ende die posten vanden hoken waren viue:

32

ende twe doren van olyuen houte. Ende hi sneter aen prenterien van enghelen ende ghelike van palmen. ende opgheheuen werc seer hoghe. ende hi ouerdectese mit goude ende hi ouerdecte: beide enghelen ende palmen ende al tander mit goude.

33

Ende hi maecte inden inganc vanden tempel stilen viercante van olyuen houte.

34

ende twe doren van abiegnen houte. ende ouer elcke zide ende elke dore was dubbel: ende die een an die ander houdende so dedemense op.

35

Ende hi sneter in engelen ende palmen ende prenterien die seer verheuen waren: ende hi oueredctet mit gulden platen met viercanten wercke ter regulen.

36

Ende hi maecte tbinnenste vrijthof mit drie ordinancien van ghehouwen stenen: ende mit een ordinancie van cedren houte.