Bible in duytsche (Delftse bijbel 1477)

§ Capit .iiij

1

SAlomon die coninc regneerde bouen al israhel.

2

Ende dit waren die princen die hi had. Azarias sadochs soen was pape.

3

Helyoreph ende ahya sesaen sonen waren scriben. Iosaphat ahiluds soen was scriueyn vanden gesten.

4

Banaias ioiaden soen was bouen theer. Sadoch ende abyathar waren papen:

5

azaryas nathans soen was bouen die ghene die omtrent den coninc waren Zabuth nathans soen was cancelier: ende sconincs vrient.

6

ende ahisar was drossate vanden huse: ende adonyram abdaen soen was bouen die tribute.

7

Ende salomon had bouen al israhel twalef princen: die den coninc leuerden lijftocht binnen sinen huse. Want een maent binnen den iaer so diende elc den coninc

[p. *444]

sinen noetdorfte.

8

Ende dit waren haer namen. benhur in effrayms berghe.

9

Bendetar in macces. ende in salebim. ende in bethsames. ende in helon ende in bethanan.

10

Ende beneseth in araboth. Socho was sijn ende al tlant van elpher.

11

Benabynadab. sijn was al tlant van nephador: taphet salomons dochter hadde hij te wiue.

12

Bana ahiluds soen hij regneerde thanach. ende magedo ende alle bethsan. die neuen sartana is onder israhel: van bethsan tot abelmeula iegen dat rijc van iecmaan.

13

Bengabar in ramoth van galaad hij hadde auothiair manasses sone in galaad Hi was bouen al trike van argob. die in basan is: bouen tsestich grote ghemuerde steden die coperen sloten hadden.

14

Ahinadab addo soen was bouen manaim.

15

Ende achimaas in neptalim. Mer hi had oec basemath salomons dochter in huwelike

16

Banaa husi soen. in aiaser ende in baloth.

17

Iosaphat pharue soen. in ysachar.

18

Semey hela soen in benyamin.

19

Gaber suri soen in tlant van galaad. ende in seons lant des conincs van amorreen ende in ogs sconincs rike van basan: bouen al dat in dien lande was.

20

Iuda ende israhel waren onghetallich in menichten gelijc den sande vander zee: ende si waren etende ende drinckende ende verblidende

21

Want salomon was hebbende in sijnre rijcheit met alle die riken vanden lande vander riuieren vander philistinen lande. totten termine van egipten: ende sij brachten hem ghiften ende dienden hem alle die dagen sijns leuens.

22

Ende salomons spise was alle dage dertich chore blomen. ende veertich chore meels

23

ende tien vette ossen. ende twintich mestende ossen: ende hondert rammen: al sonder tfenisoen van herten ende van reen ende van buffels ende van vetten voghelen

24

Want hi behilt al tlantscap dat ouer die riuiere was als van thapsa tot gasam. ende hi had paeys in allen ziden al om en tomme.

25

Ende israhel ende iuda woende sonder enighe vrese elke onder sinen wijngaert ende onder sinen vigheboem. van dan tot barsabee: alle salomons daghe

26

Ende salomon hadde veertich dusent waghen paerden: ende twalef dusent ride paerden:

27

ende die voerseide sconincs princen voedense: ende si leuerden oec in haren tiden mit groter sorghen dat notorftich was sconincs salomons tafelen.

28

Ende si brochten oec in die stat der die coninc was gerste ende stro den paerden ende den vee: alsoe hem beuolen was.

29

Ende god gaf salomon oec wijsheit ende veel vroetscepen ende breetheid sijnre herten. gelijc den sande dat inden ouer vander zee is:

30

ende salomons wijsheit ghinc bouen alle der gheenre wijsheit van oeste ende van egipten:

31

ende was wijser dan alle menschen. Wiser dan ethan van esraite. ende heman. ende calchal. ende dorda mahols sonen: ende hij was vermaert in allen luden al om ende tomme.

32

Ende salomon sprac oec drie dusent parabolen: ende sijnre sanghen waren vijf dusent.

33

Ende hij disputeerde op thout vander cederen die opten libanus is totter ysopen die vter want wast: ende hi onderscheide vanden beesten ende

[p. *445]

vanden voghelen. ende vanden wormen ende vanden visschen.

34

Ende si quamen wt allen volcken om salomons wijsheit te horen: ende van alle coningen van aertrike die salomons wijsheit hoerden.