Bible in duytsche (Delftse bijbel 1477)

§ Ca .iij.

1

DUs was trike van israhel vast gemaect in salomons hant: ende hij wort mit maechscap geuoecht aen pharaone den coninc van egipten. Want hi nam sijn dochter: ende brochtse in dauids stede: tot dat hij voldede sijn huys te maken. ende sheren huys ende den mure van iherusalem al om en tomme

2

Mer nochtan offerde tvolc inden hoecheden. Want tot in dien dage: so en was dien tempel noch niet gesticht in sheren name.

3

Eude salomon minde den here. ende hij wanderde in dauid sijns vaders gheboden. dien wtghenomen dat hi offerde inden hoecheden: ende dat hi thimiama verbrande.

4

Ende hi ghinc wech in gabaon: dat hi daer offeren soude. Want dit was die meeste hoecheit Want salomon offerde op dien outare in gabaon dusentich hostien in holocauste.

5

Ende des nachtes openbaerde die here salomon ende seide. Heyssche dattu wiltste: dat ict di geue.

6

Ende salomon seide du hebste gedaen mit dauid minen vader grote ontfermherticheit: gelijc dat hi wanderde in dinen aenschouwen in waerheit ende in gherechticeit ende in gherechtigher herten met di Soe heuestu hem ghewacht mit dine grote ontfermherticheit: ende du hebste hem ghegeuen enen sone die sittet op sinen trone alsoet huden is.

7

Ende nv here god du hebtste dinen knecht doen regneren: ouer dauid minen vader. Mer ic bin een cleyn kint. ende en weet niet minen inganc ende minen wtganc:

8

ende dijn knecht is in midden dinen volc dattu vercoren hebste: dat ongetallic volc is: datmen ouermits die menichte niet tellen en mach noch gherekenen.

9

Daer om sultstu dinen knecht gheuen een gheleert herte. dat hi dinen volcke vonnissen moghe: ende onderscheiden tusschen guet ende quaet. Want wie mach dit volc gheuonnissen: dijn volc dies soe vele is?

10

Dese redene ghenoechde voerden here: dat salomon dusdane dinc gheysschet had.

11

Ende die here seide tot salomon. Om dattu dit woert geeysschet hebste. ende om dattu tot dinen dage niet en heyschedes veel dagen noch rijcheden noch dijnre vianden ziele: mer dattu dij gheeysschet hebste wijsheit om vonnissen te onderscheiden:

12

sich soe heb ic di gedaen na dinen woerde. Ende ic heb dij ghegheuen een wijs hart ende verstandel: in alsoe velen. dat voer dij nyemant des ghelijc gheweest en heeft noch hier na en sal nyemant dijns gelijc verrisen.

13

Mer ende dit dattu niet en heyssches. oec heb ict di ghegeuen dat is te weten rijcheit ende glorie: so dat nyemant dijns ghelijc en heeft geweest inden coninghen. die in alle daghen hier te voren gheweest hebben.

14

Ende ist dattu wanderste in minen weghen. ende wachtstu mine gheboden ende dat ic beuolen heb: alsoe dijn vader wanderde: so sal ic dine daghen lanc maken.

15

Dus ontwaecte salomon: ende

[p. *443]

verstont dat dit een droem was. Ende doe hi te iherusalem ghecomen was. so stont hi voer die arcke van sheren belofte. ende hi offerde holocauste. ende danckelike hostien: ende hi maecte enen groten werscappe sinen knapen.

16

Dus quamen twee lichte wiuen tot den coninc: ende si stonden voer hem.

17

Ende die ene vanden beiden seide. Ic bidde here mijn: ic ende dit ioncwijf woenden te gader in een huus: ende ic ghebaerde bi haer in een camere.

18

Mer den derden daghe na dien dat ic ghebaerde: so ghebaerde dese oec. Ende wij waren te gader. ende nyemant anders mit ons int huys: sonder wij twee.

19

Ende snachts so starf des wijfs kint. Want al slapende soe verplatte sijt.

20

Ende si stont op in die doncker nacht al swighende. ende sij nam mijn kint van mijnre ziden dijns ioncwijfs die sliep: ende si leit in haren scoot: mer haer dat doot was. leid se in minen scoot.

21

Ende doe ic smorgens op ghestaen was om minen kinde melc te gheuen. so scheent doot. Ende doe ict naerstelic besach biden claren licht: so word ict gewaer dattet mijn kint niet en was dat ic ghebaert had.

22

Ende dat ander wijf antwoerde. Ten is also niet: mer dijn kint is doot: ende mijn kint leeft. Ende die ander seider contrary. Du liechs. Want mijn kint leeft: ende dijn kint is doot. In deser manieren so keuen si voerden coninc.

23

Doe seide die coninc. Dese seit mijn kint leeft ende dijn kint is doot. Ende dese antwoert ten is soe niet: dijn kint is doot ende mijn kint leeft.

24

Daer om seide die coninc. Brenct mi een zwaert. Ende doe si een zwaert voerden coninc ghebracht hadden

25

so seide hi. Deelt dat leuende kint in tween stucken: ende gheeft der eenre helft der eenre. ende die ander helft der ander.

26

Ende twijf dies kint dat leuende was seide totten coninc: want haer inadere wort beruert op haer kint. Ic bidde here geeft haer tkint leuende ende en willes niet doden. Mer die ander seide contrary Ten si mi noch di: mer men deelt.

27

Ende die coninc antwoerde ende seide. Geeft deser vrouwen tkint leuende ende men doods niet. want dit is sijn moeder.

28

Ende aldus hoerde al israhel dit vonnisse dattie coninc gheuonnist had: ende si ontsaghen den coninc om dat si saghen dat gods wijsheit in hem was om vonnisse te onderscheiden ende te doen