Bible in duytsche (Delftse bijbel 1477)

§ Ca .ij.

1

HEt naecte den daghe dat dauid steruen soude: ende hi beual salomon sijnen soen ende seide

2

Sich ic gae inden wech van alle der aerden. Wes ghetroest ende wes een starc man:

3

ende behoude die wachten sheren dijns gods. soe dattu wandelste in sinen weghe. ende wachte sine oeffeninghe ende sijn gheboden. ende sijn vonnissen ende sijn oercondscappe alsoet gescreuen is in moeyses wet: soe dattu verstaen mogheste al dattu doetste. ende so warwaert dattu di keertste:

4

dat die here vastmake sine redenen: die hij van mi ghesproken heeft ende gheseit Ist dat. dat dijn sonen hem wachten ende wandelen sij vore mij in waerheden. ende in al haer haerte. ende in al hare ziele: so en sal di ne ghene man afghedaen worden vanden throne van israhel.

5

Du weetste oec wat mij ghedaen heeft ioab seruien soen. Wat hij ghedaen heeft den tween princen des heers van israhel. dats abner ners soen ende amase iethers soen die hi dode. ende hi stortte dat bluet vanden stride wt in paeyse: ende hi leide tbluet van den stride in sijn gordel. dat omtrent sijne lendene was: inden ghescoeyte dat in sijnen voeten was.

6

Daer om sultstu hem doen na dijne wijshet: ende du en sultste dijn outheit niet leiden mit paeyse ter hellen.

7

Mer du sulles bersellais soen van galaad danc weten. ende si sullen wesen etende op dine tafele. Want si quamen mij te gemoete: doe ic vloe van absolons dijns brueders aensichte.

8

Du heueste oec bij dij semei gera soen die iemini soen was van bahurim. die mij volecte alte quaden vloke doe ic ten tente waert ginc. Mer om dat hi in mine gemoete quam doe ic ouer die ioerdane quam. soe zwoer ic hem biden here ende seide. Ic en sal di niet doden mitten zwaerde:

9

du en wil niet ghedoghen dat hi ontsculdich bliue. Want

[p. *440]

du biste een wijs man. ende du sultste weten wat dattu hem doen snltste: ende du sultste sijn outheit leiden mit bluede ter hellen.

10

Dus sliep dauid mit sijnen vaders: ende hi is begrauen in dauids stede.

11

Die dage die dauid bouen israhel regneerde: waren veertich iaer. In hebron regneerde hi seuen iaer: ende in iherusalem drie ende dertich iaer.

12

Ende salomon sat op dauids sijns vaders troen ende sijn rike wort alte sere ghestarct

13

Ende adonyas aggyths soon ginc in tot bethsabee salomons moeder. Ende si seide hem. Is dijn incomen paeyselijc? Hi antwoerde. Hi is paeyselijc.

14

Ende hi seider toe Mi is ene redene te di. Si seide hem. Spreect.

15

Ende hi seide. Du weetste dat trike mijn was. ende al israhel had mi voert geset tot enen coninc: mer trike is ouer ghedraghen ende hets mijns brueders gheworden. Want het is hem ghegheuen vanden here

16

Nv daer om bidde ic van di een bede: en bescame mijn aensichte niet. Ende si seide tot hem. Spreeck.

17

Ende hi seide. Ic bidde dattu den coninc salomon segste: want hi en mach di niet outsegghen: dat hij mi te wiue gheue abysac van suna.

18

Ende bethsabee seide. Wel ic sal den coninc uoer di spreken.

19

Hier om quam bethsabee totten coninc salomon: om dat sij hem spreken soude ouer adonya. Ende die coninc stont op in haer gemoete ende hi aenbedese: ende hi sat op sinen troen. Ende men settede sconincs moeder oec enen troen: ende si sat te sijnre rechterziden:

20

ende si seide hem. Ic bidde van di een clene bedinghe: en bescame mijn aensichte niet. Ende die coninc seide. Heyssche moeder mijn. Want ten is gheen rechte: dat ic dijn aensichte afkeren sal.

21

Si seide. Men gheue abysac van suna adonya dinen brueder te wiue.

22

Ende die coninc salomon antwoerde: ende seide sijnre moeder. Waer om heysschestu abysac van suna te adonyas behoef? Heyssche hem oec trike Want hi is mijn brueder meerre dan ic: ende hij heeft abyathar den pape. ende ioab seruien soen.

23

Ende hier om swoer die coninc salomon biden here ende seide. Dit moet mi god doen ende dit moet hier mi toe doen: want adonyas heuet dit woert gesproken ieghen sine ziele.

24

Ende nv leeft die here die mi vastgemaect heeft. ende die mi geset heeft op dauid mijns vaders troen: ende die mi een huys ghemaect heeft also hi ghesprokee heeft: want huden salmen adonyam dootslaen.

25

Ende die coninc sant bi banayas yoiaden sonens hant: ende hi versloech hem ende hi bleef doot.

26

Ende die coninc seide tot abyathar den pape. Ganc in anathot te dinen ackere Wanttu biste een man der doot: mer ic en sal di huden niet doden: wanttu droechste sheren arcke voer dauid minen vader: ende du ghedogheste den arbeit in alle dien dat mijn vader pijnde.

27

Dus verdreef salomon abyathar dat hi sheren pape niet wesen en soude: om dat sheren reden veruolt soude worden. die hi sprac op hely huys in sylo

28

Ende een bode quam tot salomon dat ioab gekeert was na adonyam: ende dat hi na salomon niet ghekeert en was. Hier om vloe ioab

[p. *441]

in sheren tabernacule: ende hi begreep den hoernike vanden outaer.

29

Ende het wort den coninc salomon geboetscapt dat ioab in sheren tabernakel gheuloghen was: ende dat hi neuen den outaer was. Ende salomon sant banayam ioiaden sone ende seide Ganc ende steken doot

30

Ende banayas quam tot sheren tabernakel ende seide tot hem. Dit seit die coninc. Com wt. Hi antwoerde ic en salre niet wtcomen. Mer ic sal hier steruen. Ende banaias ontboot den coninc sine redene ende seide. Dit spreect ioab: dit heeft hi mi gheantwoert.

31

Ende die coninc seide hem. Doch dat hi gesproken heeft: ende slach hem doot ende begrauen: ende du sultste dat onsculdige bluet dat van ioab wtghestort is van mi ende van mijns vaders huys afdoen:

32

ende die here moet hem sijn bluet op sijn hoeft ghelden: want hi sloech twee gherechtighe mannen doot die beter waren dan hi: ende hi sloech se doot mitten zwaerde. dats dauid minen vader niet en wiste: abner ners soen den maerscalc van israhels ridderscap: ende amasam gethers soen den prince van iudas heere.

33

Ende haer bluet moet wederkeren op ioabs hooft. ende op sijns saets hooft tot inden eweliken: mer dauid ende sijn sade ende sijn huus ende sinen troen moet eweliken paeys wesen vanden here.

34

Ende hier om ghinc banaias ioiade soen op ende hi aenghinghen ende hi sloech hem doot: ende hi is begrauen inder wildernissen in sijn huys.

35

Ende die coninc settede ouer hem bouen there banaian ioiaden soen: ende hi settede sadoch pape ouer abyathar

36

Ende die coninc sant oec ende riep semey: ende seide hem. Make di een huys in iherusalem. ende woen daer: ende du en sultster niet wtgaen hier ende daer.

37

Want in soe wat dage dattu daer wtgaen sultste ende du ouer die riuiere cedron lijdtste: so sultstu weten datmen di doden sal. Ende dijn bluet sal op dijn hooft wesen.

38

Ende semey seide totten coninc. Hets een guet woort dat ic ghehoert hebbe. Alsoe die coninc mijn here ghesproken heeft: alsoe sal dijn knecht doen. Aldus woende semey veel daghen in iherusalem.

39

Ende het gheschiede na drie iaer: dat semeys knapen vloghen tot achis maacha soen den coninc van geth. Ende het is semey gheboetscapt. dat sijn knapen waren ghegaen in geth.

40

Ende semey stont op ende berede sinen ezel: ende hi ghinc in geth tot achis om sijn knapen te heysschen: ende hi brachtse weder van geth.

41

Ende den coninc salomon wort tot geboetscapt. dat semey wt iherusalem te geth ghegaen was: ende dat hij weder ghecomen was

42

Ende hi sant ende riepen: ende seide hem. En oercondic di niet biden here. ende voerseide ic di niet. in so wat daghe dattu wtgaen sultste hier ende daer. so sultstu weten datmen di doden sal? Ende du andwoerdeste mij Hets mij een guet woert dat ic ghehoert hebbe.

43

Waer om en wachtstu dan niet sheren eedt: ende tgebod dat ic dij beuolen had?

44

Ende hi seide tot semey Du weetste alle dat quaet vanden welken dijn herte sculdich kent: dattu gedaen hebste dauid minen vader. Die here heeft dine quaetheit ghegouden

[p. *442]

op dijn hooft:

45

ende die coninc salomon is gebenedijt: ende dauids trone sal gestadich wesen voerden here tot inden eweliken

46

Ende die coninc beualt banaia ioiaden soen: ende hi aenginc hem ende sloech hem doot ende bleef doot