Bible in duytsche (Delftse bijbel 1477)

Ca .I.

1

ENde die coninc dauid was outgeworden Ende hi had veel daghen van outheden. Ende alsmen hem ouerdecte mit clederen so en verwarmde hi niet.

2

Daer om seiden sine knapen. Soken wi den coninc onsen here een ioncfrouwe een maghet: ende si stae vore den coninc. ende sij voede hem. ende hi slape in haren scoet: ende sij verwarme den coninc onsen here.

3

Hier om sochten si binnen alle den lande van israhel ene schone ioncfrouwe: ende si vonden abysac van sunamiten. ende si brachtense totten coninc

4

Ende die ioncfrouwe was alte schone Ende sij sliep mitten coninc. ende diende hem: mer die coninc en bekendese niet.

5

Ende adonyas aggiths soen verhief ende seide. Ic sal regneren. Ende hi maecte te sijnen behoef enen wagen ende gheredene: ende vijftich mannen die vore hem lopen souden.

6

Ende sijnen vader en begrepen ne ghenen tijt ende seide. Waer om hebstu dit ghedaen? Want hi was oec harde schoen: ende die naeste gheboren na abslaon.

7

Ende sine redene was mit ioab seruien soen. ende met abyathar den pape: die adonias pertyen holpen.

8

Mer sadoch die pape. ende banayas ioiaden soon. ende nathan die prophete ende semei ende

[p. *437]

chereti ende pheleti ende alle die macht van dauids heere en waren mit adonia niet

9

Hier om dode adonia rammen ende calueren ende alle die vette beesten biden stene zoeleth. die neuen die fonteyne roghel was: ende hi node alle sconincs sonen sijn bruederen. ende alle die mannen van iuda sconincs knapen:

10

mer nathan die propheet ende banaiam ioiade soen. ende alle die machtighe ende salomon sijnen brueder dese en node hi niet.

11

Ende nathan seide tot bethsabee salomons moeder En hebtstu niet gehoert dat adonays aggiths soen regneert. ende onse here dauid en weets niet?

12

Daer om come nv ende ontfanc raet van mij: ende behoude dine ziele ende salomons dijns soens.

13

Ganc in totten coninc dauid: ende segt hem. Coninc here mijn. en hebstu mij dijnen ioncwiue niet ghesworen ende ghseit dat salomon dijn soen sal regneren na di. ende hi sal sitten in dijnen trone? Waer om sal dan adonyas regneren?

14

Ende altstu daer noch sultste spreken mitten coninc so sal ic comen na di: ende ic sal dijn reden voldoen.

15

Aldus ghinc bethsabee in totten coninc in die slaepcamer Mer die coninc was alte out geworden: ende abysac van suna diende hem

16

Bethsabee boechde haer neder: ende aenbede den coninc. Ende die coninc seide tot haer. Wat wiltu di?

17

Si antwoerde ende seide. Coninc here mijn. du heefste mi dijnen ioncwijue ghesworen biden here dijnen god ende gheseit. salomon mijn soon sal na mij regneren ende hi sal sitten in minen troen:

18

ende siet nv regneert adonyas. coninc here mijn datuut niet en weetste.

19

Hi heeft gedoot ossen ende vette beesten alre hande ende vele rammen: ende hi heeft alle sconincs sonen ghenoot. ende abyathar oec den pape ende ioab den maerscalck vanden ridderscappe: mer salomon dijnen knecht en node hi niet.

20

Mer nochtan coninc here mijn die oghe van alle israhel sien op di: dattu hem seggen sultste wie sitten sal in dijnen trone na dij coninc here mijn

21

Ende het sal sijn als die coninc mijn here slapen sal mit sijnen vaders: soe sullen wi ic ende mijn sone salomon wesen sonders

22

Doe si noch mitten coninc sprac. soe quam nathan die prophete.

23

Ende si boetscaptet den coninc ende seiden Nathan die prophete is hier. Ende doe hi vore sconincs aenscouwen gecomen was ende hine lancs op die aerde aenbeet had

24

so seide nathan Coninc here mijn. du hebste gheseit. adonyas sal na mi regneren: ende hi sal sitten op mijnen troen?

25

Want hi is huden neder ghetoghen. ende heeft ghedoot ossen ende vette beesten ende vele rammen: ende hi heeft al sconincs sonen ghenoet ende die prince vanden heere. ende abyathar den pape: daer si eten ende drincken vore hem. daer om segghen si die coninc adonyas moet leuen:

26

mer mij dijnen knechte ende sadoch den pape ende banayam ioiadans soen ende salomon dinen knechte en heeft hij niet ghenoet.

27

Is dit woert wtghecomen vanden here mijnen coninc: ende en seitstu niet mij dijnen knech. wie sitten soude in sconincs mijns heren troen na hem?

28

Ende die coninc dauid antwoerde ende seide. Roept

[p. *438]

bethsabee tot mi. Ende doe si vore den coninc in comen was: ende ghestaen was vore hem:

29

soe swoer die coninc ende seide. Leeft die here die mijn ziele verlost heeft van alle vernoeye:

30

want also ic di gesworen heb biden gode van israhel ende geseit. salomon dijn sone sal regneren na mij. ende hi sal sitten op mijnen trone ouer mi: also sal ic huden doen

31

Ende bethsabee liet haer aensicht neder ter aerden vallen: ende aenbede den coninc ende seide Die coninc dauid mijn here moet ewelijc leuen.

32

Ende die coninc dauid seide Roept sadoch den pape tot mi ende nathan die prophete: ende banayam ioiade soen. Ende doe si voer den coninc in gecomen waren.

33

soe seide hi tot hem. Neemt mit v uwes heren kanpen. ende settet salomon mijnen soen op mijne mulinne. ende voerten in gyon:

34

ende sadoch die pape ende nathan die prophete consacreerren hem daer in coninc bouen israhel. Ende gi sult mit trompen blasen. ende segghen. Die coninc salomon moet leuen.

35

Ende gi sult hem achteruolghen ende op comen: in iherusalem ende hi sal sitten op minen trone ende hi sal ouer mi regneren ende ic sal hem beuelen: dat hi leidsman sij bouen israhel ende bouen iudam.

36

Ende banaias ioiadas soen antwodeer den coninc ende seide. Amen. Aldus moet spreken die here mijns conincs god.

37

Also die here gheweest heeft mitten coninc mijnen here. also moet hi wesen mit salomon. Ende hi moet sijnen trone hongher maken. dan mijns here dauids sconincs troen.

38

Hier om toech sadoch die pape neder ende nathan die prophete. ende banayas ioiadas soen. ende serethi. ende felethi Ende si setteden salomon op dauids mulinne: ende si voerden in gyon.

39

Ende sadoch die pape nam vter tabernaculen enen hoerne vol olien. ende saluede salomon. ende si bliesen mit trompen ende alt volc seide Die coninc salomon moet leuen.

40

Ende alle die menichte volghede hem achter na. ende tvolc vanden ghenen die speelden in harpen die verblijden mit groter blijscappen: ende die aerde herlude van haren ropen.

41

Ende adonyas hoerdet: ende alle die gene die van hem genoet waren. Ende die feeste was te hant geenydt. Mer ioab doe hij hoerde dat geluyt vanden trompen. so seide hi Wat wil tgheruchte vander stede die tgherope maect?

42

Ende doe hi nog sprac. So quam ionathas ende abyathar spapen soen. Ende adonyas seide hem. Coemt in. want du biste een starc man: ende brengheste guede nyemare.

43

Ende ionathas antwoerde adonie. Ic en doe niet Want die here dauid die coninc. hi heeft salomon coninc ghemaect:

44

ende hi sant mit hem sadoch den pape ende nathan den propophete. ende banayam ioiadas soen. ende cherethi ende phelethi: ende si setteden salomon op sconincs mulinne.

45

Ende sadoch den pape ende nathan den prophete hebben coninc gheconsacreert in gyon: ende sijn van daer op comen verblijdende: ende die stat verblijde hier af. Dit is dat geluut dat gi gehoert hebt.

46

Mer salomon sittet oec op den trone vanden rike:

47

ende sconincs knapen ghinghenre in. ende hebben ge-

[p. *439]

benedijt den coninc dauid onsen here ende hebben gheseit. God moet salomons name breeden bouen dijnen name: ende hi moet sijnen trone verheffen bouen dine toerne. Ende die coninc aenbeden op sijn bedde:

48

ende hier om seide hi dit Gebenedijt moet wesen die here god van israhel: die huden ghegheuen heeft enen die sittet in mijnen troen daer ict mit mijnen oghen aensie.

49

Ende hier om worden si alle veruaert ende stonden op alle die van adonyas ghenoet waren: ende elc ghinc sijnen wech.

50

Mer adonyas ontsach salomon ende stont op ende ghinc wech in sheren tabernacule: ende hij hielt den hornic vanden outare

51

Ende si seident salomon ende spraken. Sich adonyas om dat hi den coninc salomon ontsiet soe hout hi den hornic vanden outare seggende Die coninc salomon sweer mi huden: dat hi mi sinen knechte niet doden en sal mitten zwaerde.

52

Eude salomon seide. ist dat hij een guet man is. soe en sal ene van sijnen hare op die aerde niet vallen: mer vintmen quaet in hem: soe sal hi steruen.

53

Hier om sant die coninc salomon ende deden vte halen vanden outare: ende hi quam in ende aenbede den coninc salomon Ende salomon seide. Ganc in dijn huys.