Bible in duytsche (Delftse bijbel 1477)

§ Ca .xxiij

1

DIt sijn die achterste woerden: die dauid ysay sone sprac. Een man seide die bloeft is van cristo iacobs god: een voerbarich sangher in israhel.

2

Sheren gheest bi mi ghesproken: ende sijn redenen bi mijnre tonghen.

3

God van israhel seide: die starcke van israhel heeft te mi gesproken. Ende die der menschen is gerechte heerscap: ende heerscap in sheren vrese

4

Alsoe die dagheraet vliet smorghens als die sonne opgaet sonder wolcken: ende also tcruut vter aerden groeyt mitten regenen.

5

Ende mijn huus en is so groot niet voer gode. dat hi ewelic belofte mit mi aengaen soude: vast in allen ende beureet. Want alle mijn salicheit ende alle mijn wille: ende daer wt en is niet dat niet en groeyt.

6

Want alle die ouerdadigen salmen wtroden gelijc doernen: diemen mitten handen niet wech en draghet.

7

Ende soe wie dat hem ghenaken wil. sal hem genaken mit ysere ghewapent ende mit langen houte: ende men salse mit vyer ontsteken ende verbrandense te nyete.

8

Dit sijn dauids starcke mannen name Dauid sittende in sinen zetele: hij is die alre wijste prince onder die drie. Hi is als een alte teder wormkijn dat int hout is: ende hi dode achte hondert man mit enen bedruyssche:

9

Na desen was eleazar van ahoy dauids oems soen onder die drie starcke die mit dauid waren: doe die phisistinen versmaden ende sij daer vergadert waren ten stride. Ende doe die mannen van israhel opghetoghen waren.

10

soe bleef hi staende ende sloech die philistinen: tot dat sijn hant aemachtich wort. ende tot dat si verstiuede mitten zwaerde. Ende god dede grote salicheit in dien daghe: ende tvolc dat was gheuloghen keerde weder. om der versleghenen roef af te trecken.

11

Ende na desen was sammaa agge soen: van arari. Ende die philistinen waren vergadert in betaeldien. Want daer was een acker vol wicken ende doe tvolc geulogen was vander phi-

[p. *434]

listinen aensicht:

12

so stont dese in midden den acker ende hi beschermeden. Ende hi sloech die philistinen: ende die here dede grote salicheit.

13

Oec waren die drie die princen waren onder die dertich nedergecomen: ende inden tide vanden ouxte waren si ghecomen tot dauid in die speloncke odollam. Ende der philistinen tenten waren gesettet inder gyganten valeye:

14

ende dauid was inde salcoerse: oec was doe die betaelgie van den philistinen in bethleem.

15

Doe begheerde dauid ende seide. Och of mij yemant gaue water vten putte: die in bethleem is neuen die poorte.

16

Daer om braken die drie starcke mannen doer die tenten vanden philistinen: ende si sciepen water vter cysternen van bethleem. die was bider poorten: ende sij brachtent tot dauid. Mer hi en wouds niet drincken:mer hi stortet den here

17

ende hi seide. Die here moet mi ghenadich wesen: dat ic dese dinc niet doen en moet. Sal ic deser mannen bluet drincken dier om ghetijt sijn: ende der zielen vrese? Daer om en woude hijs niet drincken. Dit daden drie die alre starcste.

18

Ende abysay seruien soen. ioabs brueder: was prince van desen drien. Hij ist die sijn speer op hief ieghen die drie hondert man die hi dootsloech: hij is ghenoemt in die drie:

19

ende onder die drie was hi die edelste: ende hi was haer prince: mer totten drie eerste en was hi niet ghecomen.

20

Ende banaias ioiade soen een alte starcken man van groten daden: die van capseel was. Hi sloech twe leeuwen van moab: ende hi ginc neder ende versloech enen leeu in midden enen cysterne inden dage dat snee lach.

21

Hi dode oec enen man van egipten: enen man diemen wel van wondere aensien mochte: die in sijn hant had een speer. Ende doe banaias teghen hem ghegaen was mit eenre rueden. so trac hi mit crachte wt des mans van egipten hant dat spere: ende stacken doot mit sijns selfs spere.

22

Dit dede banaias ioiade soen. Ende hi is ghenoemt onder die drie vrome.

23

die de edelste waren onder die dertich: ende dauid maecten te sijnen behoef enen raedsman van heymelicheden.

24

Azahel ioabs brueder was onder die dertich. Ende eleanan sijn oemssoen van bethleem.

25

Semma van arari. Elycha van arodi.

26

Heles van phalti. Hira acces soen van thecua. Eleph banaa soen: ende hij was oec van nethophat.

27

Abyezer van anathot. Mobonnay van vsathi.

28

Selmon van ahoy. Macharai van nethophat.

29

Itai ribay: soen van gebeeth dat van benyamins kinder is.

30

Banai van pharathon. Helday van die vluet gaas

31

albialbon van arbat tithe. Asmaneth van boromi.

32

Elyaba van salboni Iasen sonen: ionathas:

33

ende semma van orody. Hayan sarar soen van arothites:

34

elyfeleth aasbay soen. die maachati soen was. Helyas achitofels zoen van gelonites.

35

Esrai van carmelo Pharay van arby

36

Igaal nathans soen. van soba Bomi van gaddi.

37

Selech van ammoni Naarai van beroth ioabs seruien soens schiltknape.

38

hira van ihetri. Gareb ende was oec van ihetri.

39

Uryas van etheen. Alles wasser seuen ende dertich.