Bible in duytsche (Delftse bijbel 1477)

[p. *435]

Capittel .xxiiij.

1

SHeren grmscap deder noch toe vergramt te worden iegen israhel: ende beruerde dauid hier in dat hi tot ioab seide. Ganc ende telle mi israhel ende iudam.

2

Ende die coninc seide tot ioab den maerscalc van sijnen heere. Wandel doer alle die gheslachten van israhel. van dan tot bersabee: ende tellet dat volc: dat ic sijn ghetale weten mach

3

Ende ioab seide totten coninc. Die here dijn god moet den volc doen daer toe alsoe vele als nv is: ende echter moet hijt hondertfoudighen in sconincs mijns heren aenscouwen. Mer wat wil mijn here die coninc in deser dinc?

4

Mer sconincs reden behielt ioabs woerden: ende der princen vanden heere Ende ioab toech wt ende die prince van sheren ridders van sconincs aensichte. om dat si tvolc van israhel tellen souden.

5

Ende doe sij ouer die ioerdaen leden waren. so quamen si in aroer ter rechter zide vander poorten die in gads valeye is: ende doer iasar

6

leden si in galaad. ende int nederste lant van hodsi: ende si quamen int bosschelen dan. Si voeren om neuen sydonen

7

ende si leden biden wteruesten van tyri ende alle ereus ende chananeus lant: ende si quamen ten suden van iuda in bersabee::

8

ende doe si alt lant om gheuaren waren. so waren sij weder in iherusalem na neghen maent ende twintich daghe.

9

Ende ioab gaf den coninc tgetal ende des volcs in ghescrifte. Ende men vant van israhel acht hondert dusent starcke mannen die zwaerde wt trecken mochten: ende van iuda vijf hondert dusent vechters.

10

Ende dauid sloech sijn herte na dien dat volc getelt was. Ende dauid seide totten here. ic heb sere gesondicht in dese daet: mer ic bidde here dattu dijns knechts sonde wiltste ouer dragen: want ic hebbe sere sottelijc gedaen

11

Hier om stont dauid vroech op: ende sheren reden wort ghedaen tot gad den prophete ende dauids siende ende die here seide.

12

Ganc ende segt tot dauid. Dit seit die here. Men gheeft die kore van drien dinghen: kies ene van desen wiltste: dat ic di doe.

13

Ende doe gad gecomen was tot dauid: soe boetscapte hij hem ende seide. Seuen iaer sal die hongher in dijn lant wesen: of drie maent lanc sultstu vlien voer dijne vianden: ende si sullen di veruolghen: of drie daghe sal sterfste wesen in dijnen lande. Nu hier om ontcommer di: ende besich wat reden dat ic hem antwoerden sal die mi ghesonden heeft.

14

Ende dauid seide tot gad. In allen ziden bin ic sere ghecringhelt. Mer tis beter dat ic in sheren handen valle: want sijne ontfermicheden sijn vele: dan inder menschen hande.

15

Ende god sant die sterfste in israhel. van smorghens totten tide dien hi geset hadde: ende van dan tot bersabee waren vanden volke doot ghebleuen. tseuentich dusent mannen.

16

Ende doe sheren enghel sijn hant wtghesteken hadde bouen iherusalem om dat hijse slaen soude. So hadde die here ontfermicheit opt verdriet. ende hi seide totten engel die tvolc sloech Hets nu ghenoech houde dijn hant bi dij. Ende sheren enghel was neuen areuna des iebuzeus

[p. *436]

vloer.

17

Ende dauid seide totten here: doe hi den enghel tvolc sach slaen. Ic bent die ghesondicht hebbe. ic heb ongherechtelijc ghedaen: wat hebben dese ghedaen die scapen sijn? Ic bidde dat dijn hant ieghen mij kere: ende ieghen mijns vaders huys.

18

Ende in dien daghe quam gad tot dauid: ende seide Ganc op ende sette enen outaer den here: in areuna des iebuzeus vloer.

19

Ende dauid ginc op na gods woerde: als hem die here beuolen had.

20

Ende areuna sach ende mercte dattie coninc ende sijne knapen tot hem quamen: ende hi ghinc vte ende aenbede en coninc mit aensichte lancs op die aerde. ende seide.

21

Wat saken ist dat die coninc mijn here coemt te sijnen knechte? Ende dauid seide. Om dat ic van di enen vloer copen sal: ende daer den here enen outare maken: dattie doot slach ophoude die tvolc woest. ende areuna seide tot dauid

22

Die coninc mijn here nemen: ende offeren alsoe hem ghenoecht Du hebste ossen te holocauste: ende enen wagen ende een paer ossen daer toe om hout te halen

23

Al dit ghaf areuna den coninc. Ende areuna seide totten coninc Die here dijn god moet dijn begeerte ontfaen.

24

Ende die coninc antwoerde ende seide. Ic en sals niet doen also du wiltste. mer ic sal den dorchuloere van di copen mit ghelde: ende ic en sal den here mijn god niet offeren holocauste die ic te dancke ontfaen heb. Dus cochte dauid die dorschuloer ende die ossen om vijftich cicle siluers:

25

ende dauid maecte daer den here een outaer: ende offerde daer op danckelike holocauste. Ende die here wort den lande weder guedertieren: ende die plaghe wort verboden van israhel.

Hier eyndt dat anderde boec der coninghen.