Bible in duytsche (Delftse bijbel 1477)

§ Ca .xxi.

1

IN dauids daghen wort die hongher eenpaerlijc drie iare dore. Ende dauid ghinc sheren oracule te rade: ende die here seide. Dits om sauls wil ende om sijn huys ende om tbluet want hi sloech die van gabaon doot.

2

Hier om riep die coninc die van gabaon:ende seide tot hem. Want die van gabaon en waren vanden kinderen van israhel niet: mer si waren ouerghebleuen vanden amorreen. Want die kinnderen van israhel hadden hem ghesworen: dat sijse niet doden en souden: ende saul woudse verslaen als van toerne ouer die kinder van israhel ende van iuda.

3

Daer om seide die coninc tot die van gabaon. Wat sal ic v doen: ende wat sal uwe beteringhe wesen dat ghi gods erueachticheit benedijt?

4

Ende die van gabaon seiden. Ons en is ne gene questie van goude noch van siluere: mer ieghen saul ende ieghen sijn huys: ende wij en willen niet datmen enighen man van israhel slae. Ende die coninc seide. Wat wildi dan dat ic v luden doe?

5

Si seiden den coninc. Dien man die ons verteret ende ongherechtelijc tonder dede. Dien sullen wij alsoe te nyete maken: so dat ene allene niet ouerblijuen en sal. van alle sijnen gheslachte binnen alle die termine van israhel

6

Men gheue ons die seuen mannen van sinen kinderen: dat wijse den here crucen in sauls gabaa die wijlen sheren wt uercoren was. Ende doe die coninc seide Ic salse v gheuen

7

Ende die coninc spaerde misiboseth ionathas soon die sauls soen was. om dat sheren eet: die tusschen dauid was ende ionathas sauls soen.

8

Ende hier om nam die coninc respha ahya dochter twee sonen. dien si saul ghebaert hadde. armonium ende myfiboseth. ende merob sauls dochter vijf sonen die si ghebaert hadde hadrielle bersellay soen die van molathi was:

9

ende hi gafse in dier van gabaon hande en sij cruistense op enen berch voer den here. Ende dese seuen vielen te gader. Ende sij waren ghedoot inden daghe vanden eersten ouxste doemen die gherste begonste te ouxsten.

10

Ende respha ahia dochter nam een haren cleet ende leidet onder haer op enen steen. vanden beghinne vanden ouxste. tot dat vanden hemel water op hem drope: ende si en lietse sdaghes die voghelen niet scoren: noch die beesten bi nachte.

11

Ende dauid wort gheseit wat respha ahya dochter sauls vriendinne gedaen hadde.

12

Ende dauid ghinc wech. ende haelde sauls ghebeente. ende ionathas sijns soens vanden mannen van iabes in galaad. diese ghestolen hadde vander straten van bethsan. daerse die philistinen in hadden ghehanghen doen si saul versleghen hadden in gelboe:

13

ende hi brachte daer sauls ghebeente ende ionathas sijns soens: ende si vergaderden

[p. *431]

der gebeente die ghecruyst waren.

14

ende si grouense mit sauls ghebeente. ende ionathas sijns soens: in beniamins lant in dene zide in sauls vaders graft cis. Ende si daden alle dat die coninc beuolen had: ende hier na wort die here den lande guedertieren weder.

15

Ende hier na gesciede echter enen strijt vanden philistinen ieghen israhel: ende dauid trac neder ende sijne knapen mit hem: ende sij vochten ieghen die philistinen. Ende doe dauid amachtich worden was.

16

iesbi van nob. die van arapha geslachte was. ende sijn yser van sijnen spere woech drie hondert onsen. ende hi was ghegort mit enen nyewen zwaerde. ende hi pijnde hem dauid te slaen:

17

ende abysai seruien soen was hem te salcoerse: ende hi sloech den philistijm doot. Doe zworen dauids mannen ende seiden. Voertmeer en sultstu te stride mit ons niet wt trecken: dattu tlicht van israhel niet en blussches.

18

Een ander strijt was oeck in gob: ieghen die philistijnen. Doe sloech sobothay van vsathi zaph die van arafa gheslachte was:

19

ende vander gyganten gheslachte Ende die derde strijt was oeck in gob. ieghen die philistijnen inden welken dauid van gode ghegheuen een soon des bossches van beseleels gheslachte te bethleem gheboren versloech golyath van geth wiens scacht des speers was ghelijc eens weuers garen boem

20

Die vierde strijt was in geth. ende daer was een lanc man in. die aen die hande ende aen die voete hadde ses vingheren dat waren vier ende twintich vingheren: ende hi was van arapha gheboren:

21

ende hij blasfemeerde israhel. Ende het versloech hem ionathas sone samma. dauids brueder soon.

22

Dese vyer waren geboren van arapha in geth: ende sij vielen in dauids ende in sijnre knapen handen