Bible in duytsche (Delftse bijbel 1477)

§ Ca xix

1

IOab wort geboetscapt. dat die coninc sijnen soen beweende ende bedroefde:

2

ende in dien dage wort die zege verwandelt alden volc in gewene. Want tvolc hoerde in dien dage segghende dat die coninc is rouwich van sijnen soen.

3

Ende in dien daghe keerde tvolc ende en woude in die stede niet comen: also tvolc pleghet te keren dat keert ende vliet van enen stride.

4

Mer die coninc ouerdecte sijn hoeft: ende riep mit groter stemmen. Sone mijn absolon: absolon sone mijn

5

Ende ioab ghinc hier om totten coninc binnen den huyse ende seide. Du hebste huden alle dijn knechten aensichten bescaemt. die dine ziele behouden hebben ende dijnre sonen ende dijnre dochteren ziele: ende dijnre wijue ende dijnre vriendinnen ziele.

6

Du minste die ghene die dij haten: ende du hebste in hatye die ghene die dij minnen. Ende du heueste huden ghetoent.

[p. *426]

wanttu niet en roecste van dijnen princen. ende van dijnen knechten: ende nv beken ic voerwaer. want waert dat absolon leefde. ende wij alle doet gebleuen waren. so soudt di ghenoghen.

7

Nu hier om stant op ende ganc voert: ende spreec dinen knechten toe ende doch hem genoech. Want ic swere biden here: ist dattu niet wt en gaetste datter een niet mitti bliuen en sal in deser nachte: ende dit sal di quader wesen dan al tquaet dat opti gecomen is. van dijnre ioncheit tot nv.

8

Hier om stont die coninc op: ende sat in die poorte. Ende het wort alden volc geboetscapt: dat die coninc in die poort sat. Ende alle die menichte quam voerden coninc: mer israhel vloe in sijn woninghe.

9

Ende in al den gheslachten van israhel soe street al tvolc ende seiden. Die coninc heeft ons verlost vander philistinen hant: ende van onser vianden hande: ende nv is hij uten lande gheuloghen om absolons wil.

10

Ende absolon die wi bouen ons geconsacreert hadden. is doot bleuen in den stride Hoe langhe swighedi. ende haelt den coninc niet weder?

11

Ende al israhels raet quam totten coninc. Ende die coninc dauid sant tot sadoch ende abyathar den papen ende seide. Spreect totten meesten van gheboerten van iuda. ende segt Waer om sidi tachterste comen om den coninc te halen weder in sijn huus: Want al israhels reden was totten coninc gecomen in sijn huys want die coninc seide. Dit suldi totten volc segghen.

12

Ghi sijt mijn bruederen ende mijn bene ende mijn vleysche sidi. Waer om hael di tachterste den coninc?

13

Ende segt amasa. En bistu niet mijn bene ende mijn vleysche? Dit moet mi god doen ende dit moet hier toe doen: oftu niet wesen en sultste voer mijn maerscalc tot allen tiden vanden ridders ouer ioab.

14

Eude hi neichde alle den mannen van iuda herte als eens mans. Ende si senden totten coninc ende seiden. Keer weder du. ende alle dine knapen.

15

Ende die coninc keerde weder: ende quam totter iordanen. Ende al iuda quam in galgala om den coninc te ghemoete te comen: ende omdat si hem ouer die iordane leiden souden.

16

Ende semei gera soen die gemini sone was van bahurim haeste hem: ende hi quam neder in sconincs dauids gemoete mitten mannen van iuda.

17

Ende si brachten dusent mannen van benyamin mit hem: ende cyba die knape was van sauls huse: ende sijn vijftien sonen ende sijn twintich knapen waren mit hem. Ende si braken in die iordane voerden coninc ende leiden ouer die iordane:

18

om dat sij sconincs huus ouerleiden souden: ende om dat si doen souden na sijn ghebot Ende doe die coninc te hant ouer die iordane ghecomen was: soe viel lancs op die aerde voerden coninc semey gera soen:

19

ende hi seide totten coninc. Coninc here mijn en micke dijns knchts quaetheit niet: noch en bedencke niet dies onrechts dat hij di dede in dien dage dattu wt togeste coninc here mijn wt iherusalem: noch coninc en legt in dijn herte niet.

20

Want ic dijn knecht

[p. *427]

bekenne mijn sonde: ende hier om ben ic huden eerst ghecomen van alle iosephs huse: ende ic bin neder gecomen in sconincs mijns heren ghemoet.

21

Ende abysai seruien soen antwoerde ende seide. En salmen semey niet dootslaen om dese woerden. die sheren geconsacreerden coninc vloecte?

22

Ende dauid seide Wats mi ende v seruien soen? Waer om wardi mi huden wederpertye? Salmen huden in israhel enighen man doden? En weeti niet dat ic huden ghemaect bin coninc bouen israhel?

23

Ende die coninc seide tot semey Du en sulste niet steruen. Ende swoert hem.

24

Ende myfiboseth sauls soen. quam oec in sconincs ghemoeten mit onghedwoghene voeten ende mit onghescoren baerde: ende hi en hadde sine clederen oec niet gedwoghen van dien daghe dattie coninc wt trac: totten daghe dat hi wederkeerde in paeyse.

25

Ende doe hi in iherusalem den coninc te ghemoete ghecomen was so seide hem oec die coninc Mifiboseth waer om en quamstu oec met mi niet?

26

Hi antwoerde ende seide. Coninc here mijn: mine knapen veronwaerden mi. Want ic dijn knecht seide hem dat hi mi enen ezel bereiden soude: dat ic mitten coninc wech trecken mocht. Want ic dijn knecht ben crepel.

27

Hier en bouen heeft hi mi dinen knecht gewroghet: voer den here minen coninc. Mer du here coninc mijn biste ghelijc gods enghel: doch datti genoechlic is

28

Want mijns vaders huis en was anders niet. dan die doot sculdich den coninc minen here: mer du hebste mi dinen knecht gheset. onder die ghene die te dijnre tafelen aten. Want wat heb ic dies ic mi geberechtelijc mach beclagen: ofte wat mach ic meer segghen totten coninc?

29

Hier om seide die coninc. Wat sultstu meer spreken? Hets vast dat ic ghesproken heb. Du ende cyba deelt die possessien.

30

Ende mifiboseth antwoerde den coninc. Hi hebt oec al: na dat die here mijnen coninc paeyselic wedercomen is in sijn huus.

31

Ende berzellai van galaad die zeer oudt was quam oec neder van rogelim. ende leide den coninc ouer die iordane: ende was oec gereet ouer die riviere hem na te volgen

32

Want bersellai van galaad was seer out dat was van tachtich iaren: ende hij gaf den coninc vitaelgie. doe hi inden tenten lach. Want hij was een seer rijke man.

33

Ende die coninc seide tot bersellai Coemt: dattu sekerlijc rusten mogheste mit mi in iherusalem.

34

Ende bersellai seide totten coninc. Hoe vele sijn die daghen mijns leuens: dat ic optiden sal mitten coninc in iherusalem.

35

Ic bin tachtich iaer out huden Groeien mijn sijnnen noch: om tondersceyden tusschen tsuete ende tsuere: of mach dinen knecht ghenoechte geuen spise of dranck. ofte mach ic voertaen horen sanghers ende sanghersschen stemmen? Waer om wort dijn knecht den coninc minen here te laste.

36

Ic dijn knecht sal een luttel voert tiden mitti vander iordanen. Ende des loens en heb ic niet te doen:

37

mer ic bidde dat ic dijn knecht wederkeren mach. ende dat ic steruen mach in mijn stat: ende dat ic mach wor-

[p. *428]

den begrauen in mijns vader en in mijnre moeder gracht. Mer hier is dijn knecht chamaam mijm soen hi sal mitti gaen coninc here mijn: ende doch datti guet dunct.

38

Ende die coninc seide aldus Chamaam sal mit mi ouer trecken: ende ic sal hem doen al datti lief sal wesen: ende al dattu van mi heisschen sultste. dat sultstu gherrighen.

39

Ende doe al tvolc ende die coninc ouer die iordane leden was soe bleuen si staende: ende die coninc custe bersellay ende hij benediden: ende hi keerde weder in sine stat.

40

Dus leet die coninc over in galgalam: ende chamaam mit hem. Want al tvolc van iuda hadde den coninc ouer die iordane gebracht ende half die pertie van israhel en was mer doe daer

41

Ende alle die mannen van israhel. quamen den coninc te ghemoete: ende seiden hem Waer om hebben di ghestolen die mannen van iuda onse bruederen. ende hebben den coninc ende sijn huus ouer die iordane ghehaelt. ende alle dauids mannen mit hem?

42

Ende elc man van iuda antwoerde totten mannen van israhel. Want die coninc is mi naerre. Waer om waerstu gram om dese dinc? Hebben wi yet ghegheten vanden con nc: ofte sijn ons ghiften ghegheuen?

43

Ende die man van israhel sprac totten mannen van iuda: ende seide. Thien deel bin ic meerre voerden coninc: ende dauid behoert meer te mi dan te di. Waer om hebstu mi onrecht ghedaen: ende waer om en wast mi teerste niet ontboden. dat ic minen coninc soude weder halen? Mer die mannen van iuda antwoerden hardeliker dan die mannen van israhel