Bible in duytsche (Delftse bijbel 1477)

§ Capitttel .xviij.

1

ALs dauid sijn volc gemerct hadde. so settede hi daer bouen dusent heren ende hondert heren:

2

ende hi gaf dene dat derdendeel vanden volke onder ioabs hant. ende tander derdendeel onder abysay saruiens soens hant ioabs brueder: ende dat derde derdendeel onder ethyas hant die van geth was. Ende die coninc seide totten volke. Ic sal oeck mit v wt trecken.

3

Ende tvolc antwoerde. Du en sultste niet vte comen. Want waert dat wi vlien niet al bedalle en sal hem an ons legghen: ofte valt die ene helfte van ons luden. si en sullens niet sere roken. Want du alleen biste gherekent ouer thien dusent. Want hier om ist beter dattu ons sijtste in die poorte te salcoerse.

4

Ende die coninc seide tot hem. Dat v rechte dunct dat sal ic doen Ende die coninc stont neuen die poorte Ende tvolc toech vte bi sijnen scaren: ende bi honderden. ende bi dusentighen.

5

Ende die coninc beual ioab ende abysay ende

[p. *424]

ethay ende hi seide. Hout mij dat kint absalon. Ende al tvolc hoerde dat die coninc den princen beval van absolon

6

Ende aldus toech tvolc vte te velde ieghen israhel: ende men vocht den strijt in effrayms bussche.

7

Ende tvolc van israhel wort daer versleghen van dauids heere ende het wort in dien daghe ene grote plaghe van twintich dusent mannen

8

Want die strijt wort daer ghespraeyt op daensichte van allen dien lande: ende het wasser vele meer die die bussche dode vanden volke: dan die waren in dien dage diet swaert dode.

9

Ende het gegheschiede dat absalon dauids knapen te ghemoete quam op ene mule sittende. Ende doe die mule ghegaen was onder een dicke eyke ende groot. so bleef absolons hoeft in die eyke hangende: ende hi bleef hanghende tusschen hemel ende aerde: ende die mule daer hi op sat leet ouer.

10

Dit sach een: ende boetscaptet ioab ende seide. Ic sach absalon hanghen aan een eyke.

11

Ende ioab seide totten manne diet hem seide. Oftune saechste waer om en doernaghelstune in die aerde niet: ende ic soude di thien cycle siluers ghegheuen hebben ende een gordele?

12

Ende hi seide tot ioab. Al weechdestu in mijnen handen dusent silueren penninghe: ic en soude ne gene sins mijn hant aen sconincs soon doen. Want die coninc beual di ende abysay ende ethay daer wijt hoerden en seide. Wacht mijn kint absolon.

13

Mer had ic oec vromelijc ghedaen ieghen mijne ziele ten soude ne ghene sins verborgen hebben geweest vore den coninc: ende du soutster oec ieghen staen.

14

Ende ioab seide. Ten sal niet sijn also du wiltste: mer ic sal hem voer di angaen. Hier om nam ioab drie speren in sijn hant: ende stacse int herte van absalon. Ende doe hi noch ruerde daer hi aen die eike hinc:

15

so quamenre thien ionghelinge toelopen ioabs sthilt knapen: ende si sloghen hem doet.

16

Ende ioab trompte mitten trompetten. ende behiltet volc: dattet israhel niet nauolgen en soude die vloen: om dat hi die menichte woude sparen.

17

Ende si namen absolon. ende worpen in enen groten putte binnen den bussche: ende sij droghen om hem een seer grote hope stenen. Ende al israhel vloe te sijnen woninghen waert.

18

Doe absalon noch leuede. so had hi te sijnen behoef enen tytel verheuen. in sconincs valeye Want hi seide. Ic en heb ne ghenen sone: ende dit sal ene herdencken wesen mijns namen. Hi hiete den tytel mit sijnen name: ende men hieten absalons hant tot in desen daghe.

19

Ende achymaas sadochs sone seide. Ic sal lopen ende den coninc boetscappen: dat hem die here vonnisse heuet ghedaen van sijnre vianden hant.

20

Ende ioab seide tot hem. Du en sultste in desen daghe ne ghene bode wesen: mer du sulstet boetscappen in enen anderen daghe. Want ic en wil niet dattuut huden boetscappes. Want sconincs sone is doet.

21

Ende ioab seide tot chusai. Ganc: ende boetscap den coninc dattu ghesien hebste. Ende chusai aenbede ioab: ende liep.

22

Ende achimaas sadochs sone seide echter tot ioab wat verlet ic of ic oec loep na chusai? Ende

[p. *425]

ioab seide Wat wiltste lopen sone mijn Com harwaert Du en sulste niet dragher wesen vander gueder boetscap.

23

Ende achimaas andtwoerde hem. Wat ist dan al lope ic? Ende ioab seide hem Loept. ende achimaas liep alden cortsten wech ende leet chusai.

24

Ende dauid sat tusschen die twee poorten. Ende die wachter die daer was in die hoocheit des poerts bouen die mure. hi hief sijn oghen op ende sach enen man allene lopende:

25

ende hi riep ende seidet den coninc. Ende die coninc seide Is hi allene: so is een guede boetscap in sijnen mont. Ende doe dese toe quam ende hi naerre comen was.

26

so sach die wachter enen anderen man lopende: ropende van bouen ende seide. Mij openbaert noch een ander man: allene lopende. Ende die coninc seide Dits een guet bode.

27

Ende die wachter seide. ic merke des eersten lope: ghelijc achymaas sadochs soons loep. Ende die coninc seyde. Het is een guet man: ende hi coemt ene guede boetscap brenghen.

28

Ende achymaas riep ende seide totten coninc. Coninc god houdi. Ende hi aenbede den coninc vore hem lancs op die aerde. ende hi seide. Ghebenedijt so moet wesen die here dijn god: die den mensche besloten heeft die haer handen op hieuen ieghen den coninc mijnen here.

29

Ende die coninc seide. Is absolon den kinde paeys? Ende achymaas seide. O coninc ic sach ene grote geruchte. doe mi dinen knechte ioab sant. ic en weets el niet.

30

Ende die coninc seide tot hem: com ouer ende stant hier. Ende doe hi ouer gegaen was ende stont:

31

so openbaerde chusai. Ende hi quam ende seide. Conc here mijn. ic brenghe guede boetscap. Want die here heeft huden gheuonnist ouer di: van alle der gheenre hant die ieghen di verresen waren.

32

Ende die coninc seide tot chusai. Es absolon den kinde paeys? Ende chusai antwoerde hem. Alle sconincs mijns heren viande moeten worden ghelijc den kinde absolon: ende alle die ghene die ieghen hem opstaen in quade.

33

Ende doe wort die coninc bedroeft. ende hi ginc op die camer van der poorten ende weende. Ende al gaende sprac hi aldus. Sone mijn absolon: absolon sone mijn Wie sal mij geuen als dat ic steruen mocht voer die soen mijn absolon