Bible in duytsche (Delftse bijbel 1477)

§ Capittel .xv.

1

ABsalon maecte hier na te sijnen behoef waghene ende gheredene: ende vijftich mannen die voer hem lopen souden

2

Ende absalon stont smorgens vroech op ende stont inden inganc vander poorten inden wech: ende elcken man die boetscap had tot om sconincs vonnisse te comen dien riep absalon te hem: ende seide. Van wat stede bistu? Hi antwoerde ende seide. Wt enen gheslachte van israhel bin ic dijn knecht.

3

Ende absalon antwoerde hem. Dijn redenen dincken mij guet ende gherechtich: mer nyeman en is gheset vanden coninc die dij horen sal.

4

Ende absalon seide. Wie sal mi maken rechter van tlant. dat si tot mi moghen comen alle die boetscappe hebben ende dat icse gherechtelic mach vonnissen?

5

Mer als een man tot hem quam om hem te grueten. soe stac hi sijn hant voert: ende grepen ende custen.

6

Ende dit dede hi al israhel. dat te vonnissen quam om ghehoert te worden vanden coninc: ende hi verwecte seer die mannen van israhels herten

7

Ende na veertich iaren seide absalon totten coninc dauid Ic sal gaen ende ghelden mine beloften die ic inden here beloeft hebbe in hebron.

8

Want belouende beloefde dijn knecht doe ic in gessur van syrien was ende ic beloefde ende seide. Ist dat mi die here doet wedercomen in iherusalem: soe sal ic den here offeren.

9

Ende die coninc dauid seide hem. Ganc in paeyse. Ende hi stont op: om wech te tiden in hebron.

10

Ende absalon sende spiers in alden gheslachten van israhel ende seide. Tehant als ghi gheluut sult horen vanden trompen soe sult gi segghen.

[p. *419]

Absalon sal regneren in hebron.

11

Ende twe hondert mannen waren gheropen van iherusalem: die mit absalon ghinghen mit simpelre herten: die albedalle die sake niet en wisten.

12

Ende absalon dede halen achitofel van gylo die dauids raet was: van sijnre stede gylo Ende doe absalon offerde. soe wort daer een machtich besweren ghedaen: ende tvolc liep te gader ende wies mit absalon.

13

Ende een bode quam tot dauid ende seide. Al israhel volghet mit alder herten absalon.

14

Ende dauid seide sinen knapen: die mit hem waren in iherusalem Staet op: ende vlien wi: want van absalons aensichte en sal ons gene toevlucht sijn. Haestu wt te trecken: dat hi machschien niet en come ende ons omlegghe. ende dat hi dan die val op ons voldoe: ende dat hi die stat dan verslae in swaerts mont.

15

Ende sconincs knapen seiden tot hem. Al dat die coninc onse here sal ghebieden dat sullen dine knechten gaerne voldoen.

16

Ende aldus trac die coninc wt ende al sijn huys mit haren voeten. Ende die coninc liet daer thien wijuen sine vriendinnen: om thuys te wachten.

17

Ende hi trac wt ende al israhel mit haren voeten

18

ende die coninc stont verre van huus: ende al israhels knapen wanderden mit hem: ende die scaren van selethy ende phelety. ende alle die wachters van geth ende machtighe ses hondert man die hem gheuolghet waren van geth mit haren voeten ende si ghinghen voerden coninc.

19

Ende die coninc seide tot ethay van geth. Waer om coemstu mit ons? Keer weder ende woen mitten coninc: want du biste een vreemde. ende wt dinen lande comen

20

Du quaemste ghisteren. ende waerste huden ghedwongen mit ons wt te gaen? want ic sal gaen derwaerts dat ic gaen sal Keer weder. ende leide mitti dine bruederen: ende die here moet mitti doen ontfermherticheit ende waerheit: want du hebste ghetoent minne ende trouwe.

21

Ende ethay antwoerde die coninc ende seide Leeft die here ende leeft dine ziele coninc here mijn: want in wat steden dattu wesen sultste coninc here mijn daer sal ic gaen: weder dattet wesen sal in die doot of in tleuen. daer sal dijn knecht wesen.

22

Ende die coninc seide tot ethay. Com ende ganc ouer. Ende ethay van geth ghinc ouer. ende die coninc ende die mit hem waren: ende alle die menichte ende al tvolc ghinc ouer.

23

Ende alle die mannen weenden mit luder stemmen. Ende die coninc ginc ouer die riuiere cedron: ende al tvolc trac ieghen den wech die scouwet ten wildernisse waert.

24

Ende sadoch quam oec ende alle die leuiten mit hem. ende si brachten sheren arke mit hem: ende si settense neder. Ende abyathar dat was die den here te rade ginc. ginc op tot dat al tvolc voldaen was dat in der poort getoghen was.

25

Ende die coninc seide tot sadoch Drach weder gods arke in die poorte. Vinde ic gracie in sheren oghen so sal hi mi weder brengen. ende thonense mi. ende sijn tabernacule:

26

ende ist dat hi mi seit du en ghenogheste mi niet. so bin ic ghereet: so doe dat guet is voer hem.

27

Ende die co-

[p. *420]

ninc seide tot sadoch den pape. O siende keer weder mit paeyse in die poort ende achymaas dijn soen ende ionathas abyathars soen. uwer twe sonen sullen mit v wesen.

28

Sich ic sal worden verborghen inden campaengen vander wildernissen: tot dat van v luden reden comen sal mi ontbiedende.

29

Hier om droghen sadoch ende abyathar gods arke in iherusalem: ende si bleuen daer.

30

Ende dauid ghinc opten berch vander olyuen: ende hi ghinc al wenende mit verdecten ogen ende hoefde. Mer oec mede al dat volc dat mit hem was: is opgheclommen screyende mit bedecte hoefden.

31

Ende dauid wort gheboetscapt: dat achytofel was inder besweringhe van absalon. Ende dauid seide Here ic bidde versotte achytofels raet

32

Ende doe dauid quam op die hoecheyt vanden berghe daer hi den here aenbeden soude: sich soe quam hem te ghemoet chusi van arath met gheschoerden clederen. ende hij hadde thoeft bouen vol aerden.

33

Ende dauid seide tot hem. coemstu tot mi soe sultstu mi last wesen:

34

met ist dattu weder in die stat keerste ende segste tot absolon. ic bin dijn knecht coninc. ghedoghe mi leuende. alsoe ic dijns vaders knecht gheweest hebbe. alsoe sal ic dijn knecht wesen: so sultstu achitofels raet scheiden.

35

Ende du hebste mitti die pape sadoch ende abyathar: ende so wat woerden dattu horen sultste van sconincs huus: dat sultstu ontbieden sadoch ende abyathar den papen.

36

Ende haer twee sonen sijn mit hem achymaas sadochs soen. ende ionathas abyathars soen: ende ghi sult mit hem te mi senden so wat woerden dat ghi horen sult.

37

Ende doe chusi dauids vrient dus in die stat quam. so quam absalon oec binnen iherusalem ende achitofel mit hem