Bible in duytsche (Delftse bijbel 1477)

§ Capittel .xiiij

1

ENde doe ioab verstont seruien soen dat sconincs herte gekeert was tot absalon waert:

2

sant hij te thecuam ende haelde van daer een vroetwijf ende hi seide tot haer Veinse di seer screiende. ende doch di een droef cleet aen: ende en salue di niet mit geenre olyen: dattu schijnste als een wijf die veel tijts enen doden beweent heeft.

3

Ende du sultste ingaen totten coninc: ende du sultste dusdane reden ieghen hem segghen. Ende ioab leide die woerden in haren mont.

4

Ende doe dit wijf van thecua inghecomen was totten coninc so viel si voer hem op die aerde: ende aenbeden ende seide. Schouwe mi coninc

5

Ende die coninc seide tot haer. Wat saken hebstu? Si antwoerde. Ic bin een wijf een weduwe. Want mijn man is doot

6

ende dijn ioncwijf had twee sonen: ende si worden onderlinghe stridende inden acker daer en was niemant bij diet hem verbieden mochte: ende die ene sloech den anderen ende sloech hem doot.

7

Ende siet alle die maechscip is ieghen dijn ioncwijf. ende seit. Leuer ons die sinen brueder doot ghesleghen heeft. op dat wi hem dootslaen ouer sijn brueders siele dien hi verslagen heeft. ende wi sullen den erfghenoet af doen: ende si soken te blusschene mijn voncke die mi ghebleuen is: dat minen man ne gene name en bliue noch relief op aertrike.

8

Ende die coninc seide totten wiue Ganc in dijn huus: ende ic sal ouer di gebieden.

9

Ende twijf van thecua seide totten coninc Coninc here mijn in mi sijn dese quaetheit ende in mijns vaders huis. mer die coninc ende sijn throen moet ontsculdich bliuen.

10

Ende die coninc seide Die di wederseit brencten te mi: ende hi en salre nemmermeer toedoen dat hij di ghenaken sal.

11

Si seide. Den coninc verdencke sijns heren sijns gods ende si en sullen niet worden gemenichfoudicht die des naestes bluet sullen willen wreken: ende si sullen mijn soen niet doden. Ende die coninc seide. Leeft

[p. *417]

die here soe en sal ne ghene van dijns soens hare vallen op die aerde.

12

Daer om seide twijf. Mach dijn ioncwijf ten here minen coninc een woert spreken Ende die coninc seide Spreket.

13

Ende twijf seide Waer om hebste dusdane dinc ghepenst ieghen gods volc: ende heeft die ioninc dit woert ghesproken om te sondighen: ende dat hi sinen verdreuenen niet en sal doen wedercomen?

14

Wi steruen alle: ende wi vallen neder als water inder aerden die niet wederkeren en sullen. Mer god en wil niet dat die siele verderue: mer voersiende penst hi dat hij altemale niet en verderue die verdreuen is.

15

Hier om bin ic nv ghecomen dat ic dit woert spreken sal totten coninc minen here voer tvolc. Ende dine ioncwijf seide. Ic sal totten coninc spreken: ofte die coninc doen mach sijn ionswijfs woert.

16

Ende die coninc heeft die woerden gehoert om sijn ioncwijf te verlossen. van alder gheenre hant die mi wouden afdoen. ende minen soen te gader van sheren erfachticheden.

17

Daer om sal dijn ioncwijf segghen: dat mijn sheren sconincs woert werden moet. ghelijt sacrificien Want ghelijc den enghel ons heren. also is mijn here die coninc: dat hi niet en wort beruert noch mit benedictien noch mit maledictien. Ende hier bi soe is die here dijn god mitti.

18

Ende die coninc antwoerde ende seide totten wiue. En berch twoert van mi niet: dat ic di vraghe. Ende twijf seide Coninc here mijn spreect.

19

Ende die coninc seide. Is in allen desen ioabs hant mitti yet? Ende twijf antwoerde ende seide Coninc here mijn: bider salicheit dijnre sielen. en is noch ter rechterziden noch ter slinckerziden van alle dien dattie coninc mijn here gesproken heeft Want dine knape ioab heeft mi beuolen: ende hi leide alle dese woerden in dijns ioncwijfs mont:

20

dat ic die figure van desen redenen keren soude. Want ioab dijn knape heeft dit beuolen. Mer coninc mijn du biste wijs. alsoe gods enghel wijsheit heeft: soe dattu alle dinc verstaetste bouen dat aensicht vander werelt.

21

Ende die coninc seide tot ioab. Sich ic ben ghepaeyt ende heb dijn woert ghedaen. Daer om ganc ende roep weder absalon tkint.

22

Ende ioab viel op sijn aensicht in die aerde ende aenbede: ende benedide den coninc. Ende ioab seide. dijn knecht heuet huden verstaen coninc here mijn. dat ic gracie ghevonden heb in dinen oghen. Want du hebste dijns knechts redene ghedaen coninc here mijn.

23

Dus stont ioab op ende ginc wech in gessur: ende hi bracht absalon in iherusalem.

24

Mer die coninc seide. Hi keer weder in sijn huus: ende en sie mijn aensichte niet. Ende absalon keerde weder in sijn huus ende hij en sach des conincs aensichte niet.

25

Ende so sere schoen moghelic man als absalon was soe en was in al israhel niet. Vanden voetstappen sijn voets totten toppe van sinen hoefde: so en was in hem gene smette.

26

Ende als hi sijn haer schoer eenwaruen binnen den iare soe scoer hijt: om dat hem thaer verswaerde: soe woech thaer van sinen hoefde twee hondert

[p. *418]

cyclen van ghemeen ghewichte

27

Ende absalon worden drie sonen gheboren: ende een dochter die thamar hete ende was van vromen maecsele.

28

Dus woende absalon binnen iherusalem twe iaer ende hi en sach sconinncs aensichte niet

29

Ende hi sant tot ioab: om dat hij hem anden coninc senden soude. Ende hi en wilde te hem niet comen. Ende doe hi te hem anderwarf ghesonden had. ende hi tot hem niet comen en wonde:

30

soe sende hi sine knapen Weet ghi ioabs acker die neuen mijnen acker leit: die den ouxt van gersten heeft. Gaet ende ontsteecten mit vyere. Dus ontstaken absalons knapen ioabs coren mit vyere. Ende ioabs knapen quamen ende hadden haer clederen ghescoert ende seiden. Absalons knapen hebben een deel vanden ackere mitten vyere ontsteken.

31

Ende ioab stont op ende quam tot absalon in sijn huys: ende seide. Waer om hebben dijne knapen mijn coren mitten vyere verbrant.

32

Ende absalon seide ioab. Ic sant om dij biddende dattu te mij comon soutste om dat ic di ten coninc senden soude: ende hem segghen soutste. Waer om bin ic comen van gessur. Mij was beter daer te sijn. Hier om bid ic di dat ic sconincs aensichte sien mach. Mer is hi verdenckende mijne quaetheit so slae mij doet.

33

Ende ioab ghinc binnen totten coninc: ende boetscapte hem al. Ende men riep absalon ende hi quam in totten coninc ende hi aenbeden vore hem opt aensichte der aerde. Ende die coninc custe absalon.